ശ്രീനഗര്: കശ്മീരില് 40 ദിവസം നീണ്ടുനില്ക്കുന്ന അതിശൈത്യ കാലഘട്ടമാണ് ചില്ലായ് കലാന്. രക്തം മരവിപ്പിക്കുന്ന തണുപ്പനുഭവപ്പെടുന്ന ‘ചില്ലായ് കലാനി’ല് ജമ്മു കശ്മീരിലെ ശ്രീനഗറില് താപനില മൈനസ് 8.5 ഡിഗ്രി സെല്ഷ്യസിലെത്തി. 50 വര്ഷത്തിനിടെ ഡിസംബറില് അനുഭവപ്പെടുന്ന ഏറ്റവും തണുത്ത കാലാവസ്ഥയാണിത്.
ശ്രീനഗറില്, കഴിഞ്ഞ രാത്രിയില് മൈനസ് 6.2 ഡിഗ്രി സെല്ഷ്യസ് ആയിരുന്ന താപനില വെള്ളിയാഴ്ച രാത്രിയോടെ മൈനസ് 8.5 ഡിഗ്രി സെല്ഷ്യസായി കുറഞ്ഞതായി കാലാവസ്ഥാ വകുപ്പ് അറിയിച്ചു. ശ്രീനഗറിലെ താഴ്വരകളിലും സമാന രീതിയില് താപനില മൈനസ് 8.5 ഡിഗ്രി സെല്ഷ്യസായി കുറഞ്ഞു
കടുത്ത തണുപ്പും മഞ്ഞുവീഴ്ച്ചയും മൂലം പ്രശസ്തമായ ദാല് തടാകത്തിന്റെ ചില ഭാഗങ്ങള് ഉള്പ്പെടെ നിരവധി ജലാശയങ്ങളും പല പ്രദേശങ്ങളിലും ജലവിതരണ പൈപ്പുകളും ഐസ് കട്ടകളാല് നിറഞ്ഞു. അമര്നാഥ് യാത്രയുടെ ബേസ് ക്യാമ്പുകളിലൊന്നായ ദക്ഷിണ കശ്മീരിലെ വിനോദസഞ്ചാര കേന്ദ്രമായ പഹല്ഗാമില് കുറഞ്ഞത് മൈനസ് 8.6 ഡിഗ്രി സെല്ഷ്യസും പ്രശസ്തമായ സ്കീ റിസോര്ട്ടായ ഗുല്മാര്ഗില് കുറഞ്ഞത് മൈനസ് 6.2 ഡിഗ്രി സെല്ഷ്യസും രേഖപ്പെടുത്തി.
1974 ന് ശേഷമുള്ള ശ്രീനഗറിലെ ഏറ്റവും തണുപ്പുള്ള ഡിസംബര് രാത്രിയാണിത്. അന്ന് മൈനസ് 10.3 ഡിഗ്രി സെല്ഷ്യസ് വരെ താപനില താഴ്ന്നിരുന്നു.
ചില്ലായ് കലാന് എന്നത് ഒരു പേര്ഷ്യന് പദമാണ്. കൊടും തണുപ്പ് അല്ലെങ്കില് അതികഠിനമായ മഞ്ഞുവീഴ്ച എന്നാണ് അതിന്റെ അര്ത്ഥം. ചില്ലായ് കലാന് ശേഷം 20 ദിവസം നീണ്ടുനില്ക്കുന്ന ചെറിയ മഞ്ഞുവീഴ്ച ചില്ലായ് ഖുര്ദ് എന്നും 10 ദിവസം നീണ്ടുനില്ക്കുന്ന നേരിയ മഞ്ഞുവീഴ്ച ചില്ലായ് ബച്ച എന്നുമാണ് അറിയപ്പെടുന്നത്.
Srinagar records coldest night at -8.5 degree freezing Dal lake making it hard for Shikara’s to float. pic.twitter.com/juo7m1pXQS
— Firdous Qadri (@FirdousQadriph1) December 21, 2024
Discussion about this post