ശ്രീനഗർ : ജമ്മു കശ്മീരിലെ അവന്തിപോറയിൽ ജെയ്ഷെ മുഹമ്മദിന്റെ ഒളിത്താവളം കണ്ടെത്തി തകർത്ത് സുരക്ഷാസേന. പ്രദേശത്തു നിന്നും തീവ്രവാദികൾക്ക് സഹായിയായി പ്രവർത്തിച്ചിരുന്ന ഒരാളെ സുരക്ഷാസേന അറസ്റ്റ് ചെയ്തിട്ടുണ്ട്. ഇയാളുടെ പക്കൽ നിന്നും നിരവധി സ്ഫോടക വസ്തുക്കളും കണ്ടെടുത്തു.
ദക്ഷിണ കശ്മീരിലെ അവന്തിപോറയിൽ സുരക്ഷാസേന നടത്തിയ തിരച്ചിലിൽ ആണ് സ്ഫോടകവസ്തുക്കളുമായി ഒരാളെ പിടികൂടിയത്. ഒരു ഐഇഡി, രണ്ട് ചൈനീസ് നിർമ്മിത ഗ്രനേഡുകൾ, ഒരു ഡിറ്റണേറ്റർ, മറ്റ് ഉപകരണങ്ങൾ എന്നിവയാണ് ഇയാളിൽ നിന്നും കണ്ടെടുത്തത്. ജെയ്ഷെ മുഹമ്മദുമായി ബന്ധമുള്ള ഭീകരരുടെ സഹായിയായി പ്രവർത്തിച്ചിരുന്ന ആളാണ് അറസ്റ്റിൽ ആയതെന്ന് സുരക്ഷാസേന അറിയിച്ചു.
പുൽവാമ ജില്ലയിലെ അവന്തിപോറയ്ക്ക് സമീപം തീവ്രവാദികൾ ബോംബ് സ്ഫോടനം നടത്താൻ പദ്ധതിയിടുന്നതായി രഹസ്യ വിവരം ലഭിച്ചതിനെ തുടർന്നാണ് ജമ്മുകശ്മീർ പോലീസും സൈന്യവും ഈ മേഖലയിൽ വിശദമായ തിരച്ചിൽ നടത്തിയിരുന്നത്. പോലീസിന്റെ സ്പെഷ്യൽ ഓപ്പറേഷൻസ് ഗ്രൂപ്പിലെ (എസ്ഒജി) ഉദ്യോഗസ്ഥരും സിആർപിഎഫിന്റെ 180-ാം ബറ്റാലിയനിലെ ഉദ്യോഗസ്ഥരും സംയുക്തമായി നടത്തിയ തിരച്ചിലിൽ ജെയ്ഷെ മുഹമ്മദിന്റെ ഒളിത്താവളവും ഭീകരരുടെ സഹായിയെയും കണ്ടെത്തുകയായിരുന്നു. നാനർ ഗുജ്ജാർ സെറ്റിൽമെന്റിൽ നിന്നുള്ള നസീർ അഹമ്മദ് ഘാനി എന്നയാളാണ് അറസ്റ്റിലായതെന്ന് സുരക്ഷാസേന സ്ഥിരീകരിച്ചു.
Discussion about this post