വന്നു, കണ്ടു, കീഴടക്കി! സഞ്ജു ഇട്ട തീ ആളിപ്പടർത്തി ഇഷാൻ കിഷൻ; വിക്കറ്റ് കീപ്പർമാരിലെ പുതിയ രാജാവ്

നമീബിയക്കെതിരായ ടി20 ലോകകപ്പ് പോരാട്ടത്തിൽ ഇന്ത്യൻ വിക്കറ്റ് കീപ്പർ ബാറ്റർ ഇഷാൻ കിഷൻ പുതിയ ചരിത്രമെഴുതി. ഡൽഹിയിലെ ആരാധകരെ സാക്ഷിയാക്കി വെറും 24 പന്തിൽ നിന്ന് 61 റൺസാണ് ഇഷാൻ അടിച്ചുകൂട്ടിയത്. ഇതോടെ ടി20 ലോകകപ്പ് ചരിത്രത്തിൽ ഒരു ഇന്ത്യൻ വിക്കറ്റ് കീപ്പർ നേടുന്ന ഏറ്റവും ഉയർന്ന വ്യക്തിഗത സ്കോർ എന്ന റെക്കോർഡ് ഇഷാൻ സ്വന്തം പേരിൽ കുറിച്ചു.

സഹഓപ്പണർ സഞ്ജു സാംസൺ നൽകിയ തകർപ്പൻ തുടക്കം പാഴാക്കാതെ ഇഷാൻ കിഷൻ ഏറ്റെടുക്കുകയായിരുന്നു. നമീബിയൻ ബോളർമാരെ സ്റ്റേഡിയത്തിന്റെ എല്ലാ മൂലയിലേക്കും പറത്തിയ ഇഷാൻ വെറും 24 പന്തിൽ നിന്നാണ് 61 റൺസ് നേടിയത്. തന്റെ വെടിക്കെട്ട് ഇന്നിംഗ്സ് അവസാനിപ്പിച്ചു പവലിയനിലേക്ക് മടങ്ങിയ ഇഷാൻ കിഷന് ഡൽഹിയിലെ കാണികൾ എഴുന്നേറ്റു നിന്ന് കൈയടിച്ചാണ് ആദരവ് നൽകിയത്.

വിക്കറ്റ് കീപ്പർ സ്ഥാനത്തിനായി സഞ്ജു സാംസൺ, റിഷഭ് പന്ത്, ഇഷാൻ കിഷൻ എന്നിവർ തമ്മിൽ കടുത്ത മത്സരം നടക്കുമ്പോൾ, ഇഷാന്റെ ഈ പ്രകടനം ടീം മാനേജ്‌മെന്റിന് വലിയ ആത്മവിശ്വാസം നൽകുന്നതാണ്. കഴിഞ്ഞ കിവി പരമ്പരയിൽ തുടർന്ന മികച്ച ഫോം ഇന്നും ഇഷാൻ തുടർന്നപ്പോൾ അത് വരും മത്സരങ്ങളിൽ ടീമിന് ഗുണം ചെയ്യും.

നിലവിൽ 134- 4 എന്ന നിലയിൽ നിൽക്കുന്ന ഇന്ത്യ വമ്പൻ സ്കോർ ആണ് ലക്ഷ്യമിടുന്നത്.