ചൈനയും പാകിസ്താനും വിറയ്ക്കും! അതിർത്തി കാക്കാൻ ഭാരതത്തിന്റെ ‘ഡ്രോൺ കരുത്ത്’; മീററ്റിൽ വരുന്നത് രാജ്യത്തെ ആദ്യ ഡ്രോൺ റൺവേ!

യുദ്ധമുഖത്ത് ഡ്രോണുകളുടെ പ്രസക്തി വർദ്ധിച്ചുവരുന്ന സാഹചര്യത്തിൽ നിർണ്ണായക നീക്കവുമായി ഭാരത സർക്കാർ. ഡ്രോണുകൾക്കും റിമോട്ട്‌ലി പൈലറ്റഡ് എയർക്രാഫ്റ്റുകൾക്കും (RPA) മാത്രമായി രാജ്യത്തെ ആദ്യത്തെ സമർപ്പിത റൺവേ ഉത്തർപ്രദേശിലെ മീററ്റിൽ സ്ഥാപിക്കാനൊരുങ്ങുന്നു. 900 ഏക്കറിലധികം വരുന്ന വിസ്തൃതമായ പ്രദേശത്താണ് ഈ വമ്പൻ പദ്ധതി യാഥാർത്ഥ്യമാകുന്നത്. പ്രതിരോധ മന്ത്രാലയത്തിന് കീഴിലുള്ള ബോർഡർ റോഡ് ഓർഗനൈസേഷൻ (BRO) ആണ് ഈ ഹൈ-ടെക് വ്യോമതാവളത്തിന്റെ നിർമ്മാണത്തിന് നേതൃത്വം നൽകുന്നത്. ഏകദേശം 406 കോടി രൂപയാണ് പദ്ധതിക്കായി കണക്കാക്കിയിരിക്കുന്ന ചിലവ്. ശത്രുരാജ്യങ്ങളുടെ നീക്കങ്ങൾ നിരീക്ഷിക്കാനും മിന്നലാക്രമണങ്ങൾക്കും ഡ്രോണുകൾ പ്രധാന ആയുധമായി മാറിയ ആധുനിക യുദ്ധതന്ത്രങ്ങളുടെ പശ്ചാത്തലത്തിലാണ് ഇത്തരമൊരു നീക്കം.

ഓപ്പറേഷൻ സിന്ദൂറിന്റെ വേളയിൽ ഇന്ത്യൻ സൈന്യം ഡ്രോണുകൾ ഉപയോഗിച്ച് നടത്തിയ നീക്കങ്ങൾ വലിയ വിജയമായിരുന്നു. സൈനികരുടെ ജീവൻ അപകടത്തിലാക്കാതെ തന്നെ ശത്രു കേന്ദ്രങ്ങൾ കണ്ടെത്താനും തകർക്കാനും ഡ്രോണുകൾക്ക് സാധിക്കുമെന്ന് അന്ന് തെളിയിക്കപ്പെട്ടു. ഇത് മുൻനിർത്തിയാണ് ഉന്നത നിലവാരത്തിലുള്ള ‘ഹൈ ഓൾട്ടിറ്റ്യൂഡ് ലോങ് എൻഡ്യൂറൻസ്’ (HALE) ഡ്രോണുകൾക്കായി പ്രത്യേക താവളം ഒരുക്കാൻ കേന്ദ്രം തീരുമാനിച്ചത്. ഈ വ്യോമതാവളത്തിന്റെ മധ്യഭാഗത്തായി 2,110 മീറ്റർ നീളവും 45 മീറ്റർ വീതിയുമുള്ള അത്യാധുനിക റൺവേയാണ് നിർമ്മിക്കുന്നത്. ഡ്രോണുകൾക്ക് പുറമെ സി-295, സി-130 ക്ലാസുകളിൽപ്പെട്ട വമ്പൻ സൈനിക വിമാനങ്ങൾക്കും ഈ റൺവേ പ്രയോജനപ്പെടുത്താൻ സാധിക്കും. രാത്രികാലങ്ങളിലും മൂടൽമഞ്ഞുള്ള സമയത്തും സുരക്ഷിതമായി വിമാനമിറക്കാൻ ഐസിഎഒ കാറ്റഗറി-2 (ICAO CAT-II) ലൈറ്റിംഗ് സംവിധാനവും ഇവിടെയുണ്ടാകും.

അതിർത്തിയിലെ സങ്കീർണ്ണമായ സാഹചര്യങ്ങൾ നിരീക്ഷിക്കാനും വിവരങ്ങൾ തത്സമയം കൈമാറാനും ശേഷിയുള്ള ഡ്രോണുകൾക്ക് ഈ റൺവേ വലിയൊരു കുതിച്ചുചാട്ടമാകും. 85 മാസത്തിനുള്ളിൽ നിർമ്മാണം പൂർത്തിയാക്കാൻ ലക്ഷ്യമിടുന്ന ഈ പദ്ധതിക്കായി ബിആർഒ ടെണ്ടറുകൾ ക്ഷണിച്ചുകഴിഞ്ഞു. ഡ്രോണുകൾ സൂക്ഷിക്കാനും അറ്റകുറ്റപ്പണികൾക്കുമായി വലിയ ഹാങ്കറുകളും (Hangars) സമുച്ചയങ്ങളും ഇവിടെയുണ്ടാകും. ചൈനയും പാകിസ്താനും അതിർത്തികളിൽ നടത്തുന്ന പ്രകോപനങ്ങൾക്ക് ഡ്രോൺ കരുത്തിലൂടെ മറുപടി നൽകാൻ ഭാരതത്തെ ഈ പദ്ധതി പ്രാപ്തമാക്കും. ആത്മനിർഭർ ഭാരത് പദ്ധതിയുടെ ഭാഗമായി തദ്ദേശീയമായി നിർമ്മിച്ച അത്യാധുനിക ഡ്രോണുകൾ കൂടി എത്തുന്നതോടെ അതിർത്തി കാക്കാൻ ഇനി ഡ്രോൺ സൈന്യം മുൻനിരയിലുണ്ടാകും.