ബോളിവുഡിനെ അക്ഷരാർത്ഥത്തിൽ വിറപ്പിച്ചുകൊണ്ട് രൺവീർ സിംഗ് ചിത്രം ‘ധുരന്ധർ: ദി റിവഞ്ച്’ ബോക്സ് ഓഫീസിൽ ജൈത്രയാത്ര തുടരുന്നു. വെറും രണ്ട് ദിവസം കൊണ്ട് ചിത്രം 200 കോടി ക്ലബ്ബിൽ ഇടംപിടിച്ചു. ആദ്യ ദിനത്തിലെ റെക്കോർഡ് ഓപ്പണിംഗിന് പിന്നാലെ രണ്ടാം ദിനമായ വെള്ളിയാഴ്ചയും ചിത്രം തീയേറ്ററുകളിൽ പടയോട്ടം നടത്തി. ട്രേഡ് വെബ്സൈറ്റായ സാക്നിൽകിന്റെ (Sacnilk) കണക്കുകൾ പ്രകാരം വെള്ളിയാഴ്ച മാത്രം ചിത്രം 80.72 കോടി രൂപയാണ് നേടിയത്. ബുധനാഴ്ച നടന്ന പെയ്ഡ് പ്രിവ്യൂകൾ ഉൾപ്പെടെയുള്ള കണക്കുകൾ പരിശോധിക്കുമ്പോൾ ഇന്ത്യയിൽ നിന്ന് മാത്രം രണ്ട് ദിവസം കൊണ്ട് 226.27 കോടി രൂപയാണ് ചിത്രം വാരിക്കൂട്ടിയത്. പശ്ചിമേഷ്യൻ സംഘർഷത്തിന്റെ പശ്ചാത്തലത്തിൽ ആഗോളതലത്തിൽ സാമ്പത്തിക അനിശ്ചിതത്വം നിലനിൽക്കുമ്പോഴും സിനിമാ പ്രേമികൾ ‘ധുരന്ധറി’നെ ഇരുകൈയ്യും നീട്ടി സ്വീകരിക്കുന്ന കാഴ്ചയാണ് കാണുന്നത്.
ആദിത്യ ധർ സംവിധാനം ചെയ്ത ഈ ആക്ഷൻ ത്രില്ലർ വരാനിരിക്കുന്ന ഈദ് അവധി ദിനങ്ങളിൽ ബോക്സ് ഓഫീസിൽ വലിയ വിപ്ലവം സൃഷ്ടിക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. പെയ്ഡ് പ്രിവ്യൂകളിലൂടെ ലഭിച്ച 43 കോടിയും ആദ്യ ദിനത്തിലെ 102.55 കോടിയും ചേർത്തപ്പോൾ തന്നെ ചിത്രം ചരിത്രം കുറിച്ചിരുന്നു. രണ്ടാം ദിനവും കളക്ഷനിൽ വലിയ ഇടിവുണ്ടാകാതെ മുന്നേറുന്നത് ചിത്രത്തിന് പ്രേക്ഷകർക്കിടയിലുള്ള സ്വീകാര്യതയാണ് വ്യക്തമാക്കുന്നത്. പാകിസ്ഥാനിൽ ചിത്രം ചോർന്ന വാർത്തകൾ പുറത്തുവന്നിരുന്നെങ്കിലും അത് ചിത്രത്തിന്റെ ഔദ്യോഗിക കളക്ഷനെ ഒട്ടും ബാധിച്ചിട്ടില്ല എന്നത് ശ്രദ്ധേയമാണ്.
രൺവീർ സിംഗിന്റെ കരിയറിലെ ഏറ്റവും വലിയ വിജയമായി ‘ധുരന്ധർ 2’ മാറിക്കഴിഞ്ഞു. രാജ്യത്തെ പ്രധാന നഗരങ്ങളിലെല്ലാം ചിത്രം ഹൗസ് ഫുൾ ഷോകളുമായാണ് മുന്നേറുന്നത്. ശനി, ഞായർ ദിവസങ്ങളിൽ കളക്ഷൻ ഇനിയും വർദ്ധിക്കാനാണ് സാധ്യത. ഇതിനോടകം തന്നെ ബോളിവുഡിലെ പല വമ്പൻ ചിത്രങ്ങളുടെയും റെക്കോർഡുകൾ ധുരന്ധർ മറികടന്നു കഴിഞ്ഞു. ഇന്ത്യക്ക് പുറമെ വിദേശ വിപണികളിലും ചിത്രം മികച്ച പ്രകടനമാണ് നടത്തുന്നത്. വരാനിരിക്കുന്ന വാരന്ത്യത്തിൽ ചിത്രം 300 കോടി കടക്കുമെന്നാണ് സിനിമ ലോകത്തെ പുതിയ പ്രവചനം.
