ഭൂമിയെ അക്ഷരാർത്ഥത്തിൽ ചുട്ടുപൊള്ളിക്കാൻ പോകുന്ന വിനാശകരമായ മറ്റൊരു പ്രതിഭാസത്തിന് ആഗോള കാലാവസ്ഥ സാക്ഷ്യം വഹിക്കാൻ പോകുന്നുവെന്ന ഞെട്ടിക്കുന്ന മുന്നറിയിപ്പുമായി ശാസ്ത്രലോകം. പസിഫിക് സമുദ്രത്തിൽ രൂപപ്പെടുന്ന അടുത്ത ‘സൂപ്പർ എൽ നിനോ’യെ (Super El Niño) നേരിടാൻ ഇന്ത്യ അടിയന്തരമായി സജ്ജമാകണമെന്ന് രാജ്യത്തെ ഇരുനൂറോളം പാരിസ്ഥിതിക ശാസ്ത്രജ്ഞരും ഗവേഷകരും നയരൂപീകരണ വിദഗ്ധരോടും പൊതുജനങ്ങളോടും ആഹ്വാനം ചെയ്തു. 2024-ൽ സംഭവിച്ച അതിതീവ്രമായ എൽ നിനോയ്ക്ക് ശേഷം, വെറും രണ്ട് വർഷത്തിനിപ്പുറം വീണ്ടുമൊരു അതിതീവ്ര കാലാവസ്ഥാ വ്യതിയാനം വന്നെത്തുന്നത് ദക്ഷിണേഷ്യയിൽ, പ്രത്യേകിച്ച് ഇന്ത്യയിൽ വലിയ ആശങ്കയാണ് സൃഷ്ടിക്കുന്നത്.
സെപ്റ്റംബർ 16-ന് ശാസ്ത്രജ്ഞർ തയാറാക്കി സെപ്റ്റംബർ 19-ന് പുറത്തുവിട്ട ‘കോൾ ടു ആക്ഷൻ’ (Call to Action) എന്ന തുറന്ന കത്തിലാണ് രാജ്യത്തെ കാർഷിക, സാമ്പത്തിക, പാരിസ്ഥിതിക മേഖലകളെ തകിടം മറിക്കാൻ പോകുന്ന ഈ കാലാവസ്ഥാ പ്രതിഭാസത്തെക്കുറിച്ച് വിശദീകരിക്കുന്നത്. പസിഫിക് സമുദ്രത്തിലെ ജലത്തിന്റെ ഉപരിതല താപനിലയിലുണ്ടാകുന്ന അസാധാരണമായ വർദ്ധനവ് മൂലമുണ്ടാകുന്ന പ്രകൃതി പ്രതിഭാസമാണ് ‘എൽ നിനോ സതേൺ ഓസിലേഷൻ’ (ENSO). ഇത് ആഗോളതലത്തിൽ, പ്രത്യേകിച്ച് ഇന്ത്യ ഉൾപ്പെടുന്ന തെക്കേ ഏഷ്യൻ രാജ്യങ്ങളിൽ മൺസൂൺ മഴയുടെ അളവ് വൻതോതിൽ കുറയ്ക്കുകയും അതികഠിനമായ ഉഷ്ണതരംഗത്തിനും കടുത്ത കുടിവെള്ള ക്ഷാമത്തിനും കാരണമാകുകയും ചെയ്യുന്നു.
എൽ നിനോ രൂക്ഷമാകുന്നതോടെ രാജ്യത്ത് കാലവർഷം കടുപ്പമേറിയ വരൾച്ചയിലേക്ക് വഴിമാറുമെന്നും കൃഷിനാശം വർദ്ധിച്ച് ഭക്ഷ്യസുരക്ഷയെ ബാധിക്കുമെന്നും വിദഗ്ധർ ചൂണ്ടിക്കാട്ടുന്നു. തടാകങ്ങളും ജലാശയങ്ങളും വറ്റിവരളുന്നതിനൊപ്പം ഊർജ്ജ ആവശ്യകത കുത്തനെ ഉയരുകയും ചെയ്യും. ഈ സാഹചര്യത്തിൽ ഭൂഗർഭജല സംരക്ഷണം, ബദൽ ജലസേചന രീതികൾ, പ്രതികൂല കാലാവസ്ഥയെ അതിജീവിക്കുന്ന വിളകളുടെ കൃഷി തുടങ്ങിയ അടിയന്തര പ്രതിരോധ നടപടികളിലേക്ക് കേന്ദ്ര-സംസ്ഥാന സർക്കാരുകൾ ഉടനടി കടക്കണമെന്ന് ശാസ്ത്രജ്ഞർ തങ്ങളുടെ മുന്നറിയിപ്പിൽ ആവശ്യപ്പെടുന്നു.
