പശ്ചിമ ബംഗാൾ നിയമസഭാ തിരഞ്ഞെടുപ്പ് ഗോദയിൽ തൃണമൂൽ കോൺഗ്രസിനെ ഞെട്ടിച്ചുകൊണ്ട് ഉത്തർപ്രദേശിലെ ‘എൻകൗണ്ടർ സ്പെഷ്യലിസ്റ്റ്’ ഐപിഎസ് ഉദ്യോഗസ്ഥൻ അജയ് പാൽ ശർമ്മയുടെ എൻട്രി. അതീവ സംവേദനക്ഷമമായ സൗത്ത് 24 പർഗാനാസ് മേഖലയിൽ ഇലക്ഷൻ ഒബ്സർവറായി അജയ് പാൽ ശർമ്മ എത്തിയതോടെ ബംഗാൾ രാഷ്ട്രീയം അക്ഷരാർത്ഥത്തിൽ ചൂടുപിടിച്ചിരിക്കുകയാണ്. തൃണമൂൽ കോൺഗ്രസ് സ്ഥാനാർത്ഥി ജഹാംഗീർ ഖാന്റെ അനുയായികൾക്ക് പരസ്യമായി മുന്നറിയിപ്പ് നൽകുന്ന ശർമ്മയുടെ വീഡിയോ സമൂഹമാധ്യമങ്ങളിൽ വൈറലായതോടെ ബിജെപിയും ടിഎംസിയും തമ്മിലുള്ള വാക്പോര് രൂക്ഷമായി.
പഞ്ചാബിലെ ലുധിയാന സ്വദേശിയായ അജയ് പാൽ ശർമ്മ 2011 ബാച്ച് ഐപിഎസ് ഉദ്യോഗസ്ഥനാണ്. ഔദ്യോഗിക ജീവിതം തുടങ്ങുന്നതിന് മുൻപ് അദ്ദേഹം ഒരു ദന്തഡോക്ടറായിരുന്നു എന്നത് പലർക്കും അജ്ഞാതമായ കാര്യമാണ്. മാതാപിതാക്കളുടെ താല്പര്യപ്രകാരം സിവിൽ സർവീസ് പരീക്ഷ എഴുതിയ അജയ് പാൽ ശർമ്മയും സഹോദരനും ഒരേ വർഷം തന്നെ യഥാക്രമം ഐപിഎസ്, ഐഎഎസ് പദവികളിലേക്ക് തിരഞ്ഞെടുക്കപ്പെട്ടു. നിലവിൽ പ്രയാഗ്രാജ് അഡീഷണൽ പോലീസ് കമ്മീഷണറായ അദ്ദേഹം, മുഖ്യമന്ത്രി യോഗി ആദിത്യനാഥിന്റെ ‘കുറ്റകൃത്യമുക്ത യുപി’ എന്ന ദൗത്യത്തിന്റെ മുൻനിര പോരാളിയായാണ് അറിയപ്പെടുന്നത്. യുപിയിലെ നോയിഡ, രാംപൂർ, ശാമിലി എന്നിവിടങ്ങളിൽ സേവനമനുഷ്ഠിച്ച കാലത്ത് നൂറോളം കുറ്റവാളികളെ വെടിവെച്ചു വീഴ്ത്തുകയും നിരവധി എൻകൗണ്ടറുകൾക്ക് നേതൃത്വം നൽകുകയും ചെയ്തതോടെയാണ് ‘സിംഗം’ എന്ന വിളിപ്പേര് ഇദ്ദേഹത്തിന് ലഭിച്ചത്.
ബംഗാളിൽ എത്തിയതിന് പിന്നാലെ തൃണമൂൽ നേതാവ് അഭിഷേക് ബാനർജിയുടെ തട്ടകമായ സൗത്ത് 24 പർഗാനാസിൽ അജയ് പാൽ ശർമ്മ നേരിട്ട് പരിശോധനകൾ നടത്തി. വോട്ടർമാരെ ഭീഷണിപ്പെടുത്തുന്നവർക്കെതിരെ കടുത്ത നടപടിയുണ്ടാകുമെന്ന് അദ്ദേഹം താക്കീത് നൽകി. “മര്യാദയ്ക്ക് നിന്നില്ലെങ്കിൽ കരയേണ്ടി വരും” എന്ന് ടിഎംസി ഗുണ്ടകളോട് പറയുന്ന ശർമ്മയുടെ വീഡിയോ പുറത്തുവന്നതോടെ ടിഎംസി നേതൃത്വം കടുത്ത പ്രതിഷേധവുമായി രംഗത്തെത്തി. ഇത് ഉത്തർപ്രദേശല്ലെന്നും ‘ട്രിഗർ ഹാപ്പി കൗബോയ്’ കളി ബംഗാളിൽ നടക്കില്ലെന്നുമാണ് തൃണമൂൽ നൽകിയ മുന്നറിയിപ്പ്. സമാജ്വാദി പാർട്ടി അധ്യക്ഷൻ അഖിലേഷ് യാദവും ശർമ്മയുടെ നിയമനത്തെ ചോദ്യം ചെയ്ത് രംഗത്തെത്തിയിട്ടുണ്ട്.
അതേസമയം, അജയ് പാൽ ശർമ്മയുടെ കരിയർ പൂർണ്ണമായും വിവാദരഹിതമല്ല. രാംപൂരിൽ എസ്പിയായിരിക്കെ സ്ഥാനക്കയറ്റത്തിനായി പണം വാങ്ങിയെന്ന ആരോപണവും, വ്യാജ ഏറ്റുമുട്ടലുകളെക്കുറിച്ചുള്ള പരാതികളും ഇദ്ദേഹത്തിന് നേരെ ഉയർന്നിട്ടുണ്ട്. എന്നാൽ ഇത്തരം ആരോപണങ്ങളൊന്നും അദ്ദേഹത്തിന്റെ ജനപ്രീതിയെ ബാധിച്ചിട്ടില്ല. സോഷ്യൽ മീഡിയയിൽ ലക്ഷക്കണക്കിന് ഫോളോവേഴ്സുള്ള ഈ ഉദ്യോഗസ്ഥൻ ബംഗാളിലെ തിരഞ്ഞെടുപ്പ് ക്രമസമാധാന പാലനത്തിൽ നിർണ്ണായക സ്വാധീനമാകുമെന്നാണ് വിലയിരുത്തൽ. രണ്ടാം ഘട്ട വോട്ടെടുപ്പിന് മുന്നോടിയായി അജയ് പാൽ ശർമ്മയുടെ ഓരോ നീക്കവും അതീവ ജാഗ്രതയോടെയാണ് രാഷ്ട്രീയ പാർട്ടികൾ ഉറ്റുനോക്കുന്നത്.
