മുംബൈ : മഹാരാഷ്ട്രയിലെ പുണെ ജില്ലയിലുള്ള ബാരാമതിയിൽ വീണ്ടും വിമാനാപകടം. റെഡ്ബേർഡ് ഫ്ലൈറ്റ് ട്രെയിനിങ് അക്കാദമിയുടെ പരിശീലന വിമാനം ആണ് തകർന്നു വീണത്. ബാരാമതി വിമാനത്താവളത്തിന് സമീപം ഗോജുബാവി ഗ്രാമത്തിലെ കൃഷിയിടത്തിൽ ബുധനാഴ്ച രാവിലെ 8:50-ഓടെയാണ് അപകടമുണ്ടായത്. ഏതാനും മാസങ്ങൾക്ക് മുൻപ് ഇതേ പ്രദേശത്ത് വെച്ചാണ് മുൻ ഉപമുഖ്യമന്ത്രി അജിത് പവാർ സഞ്ചരിച്ചിരുന്ന വിമാനം തകർന്നു വീണ് അദ്ദേഹം കൊല്ലപ്പെട്ടിരുന്നത്.
സ്വകാര്യ ഏവിയേഷൻ കമ്പനിയായ റെഡ്ബേർഡ് ഫ്ലൈറ്റ് ട്രെയിനിങ് അക്കാദമിയുടെ ഉടമസ്ഥതയിലുള്ള വിമാനമാണ് തകർന്നത്. പറന്നുയർന്നതിന് തൊട്ടുപിന്നാലെ വിമാനത്തിന് സാങ്കേതിക തകരാർ അനുഭവപ്പെട്ടതായി പ്രാഥമിക നിഗമനം. താഴ്ന്നു പറക്കുകയായിരുന്ന വിമാനം അടിയന്തരമായി ഇറക്കാൻ ശ്രമിക്കുന്നതിനിടെ ഒരു വൈദ്യുതി പോസ്റ്റിലിടിക്കുകയും തുടർന്ന് തറയിൽ പതിക്കുകയുമായിരുന്നു. അപകടസമയത്ത് ട്രെയിനി പൈലറ്റ് മാത്രമാണ് വിമാനത്തിലുണ്ടായിരുന്നത്. വിമാനം തകർന്നെങ്കിലും പൈലറ്റ് പരിക്കേൽക്കാതെ അത്ഭുതകരമായി രക്ഷപ്പെട്ടു. അപകടസ്ഥലത്ത് ഉടൻ തന്നെ പോലീസും അഗ്നിശമനസേനയും എത്തി രക്ഷാപ്രവർത്തനം നടത്തി.
