തിരുവനന്തപുരം : കരിമണൽ കമ്പനിയായ സിഎംആർഎല്ലും പ്രതിപക്ഷ നേതാവ് പിണറായി വിജയന്റെ മകൾ വീണാ വിജയന്റെ ഉടമസ്ഥതയിലുള്ള എക്സാലോജിക് സൊല്യൂഷൻസും തമ്മിൽ നടത്തിയ സാമ്പത്തിക ഇടപാടുകളിൽ നിർണായക തെളിവുകൾ ലഭിച്ചതായി എൻഫോഴ്സ്മെന്റ് ഡയറക്ടറേറ്റ്. സേവനങ്ങളൊന്നും നൽകാതെ സിഎംആർഎല്ലിൽ നിന്ന് മാസപ്പടിയായി വൻതുക കൈപ്പറ്റിയെന്ന ആരോപണത്തിലാണ് ഇഡിയുടെ കൊച്ചി യൂണിറ്റ് കള്ളപ്പണം വെളുപ്പിക്കൽ നിരോധന നിയമപ്രകാരം അന്വേഷണം നടത്തുന്നത്. കേസുമായി ബന്ധപ്പെട്ട് വരും ദിവസങ്ങളിൽ വീണാ വിജയന് ഇഡി സമൻസ് അയച്ചേക്കുമെന്നാണ് സൂചന.
എക്സാലോജിക്കിന് സിഎംആർഎൽ 1.72 കോടി രൂപ നൽകിയെന്നും, എന്നാൽ ഈ തുകയ്ക്ക് ആനുപാതികമായ യാതൊരു സേവനവും എക്സാലോജിക് നൽകിയിട്ടില്ലെന്നുമാണ് നേരത്തെ ആദായനികുതി തർക്ക പരിഹാര ബോർഡ് കണ്ടെത്തിയിട്ടുള്ളത്.
കഴിഞ്ഞ ദിവസങ്ങളിൽ സിഎംആർഎൽ സിഎംഡി ശശിധരൻ കർത്താ, കമ്പനിയിലെ മറ്റ് ഉന്നത ഉദ്യോഗസ്ഥർ എന്നിവരെ ഇഡി വിശദമായി ചോദ്യം ചെയ്തിരുന്നു. ഇതിന് പിന്നാലെ കമ്പനി ഓഫീസുകളിൽ നിന്ന് പിടിച്ചെടുത്ത ഡിജിറ്റൽ തെളിവുകളും ബാങ്ക് ഇടപാട് രേഖകളും പരിശോധിച്ചതിലൂടെയാണ് ഇഡിക്ക് നിർണായക വിവരങ്ങൾ ലഭിച്ചത്. ലഭിച്ച ഡിജിറ്റൽ തെളിവുകളുടെയും മൊഴികളുടെയും അടിസ്ഥാനത്തിൽ വീണാ വിജയനെ നേരിട്ട് ചോദ്യം ചെയ്യേണ്ടത് അനിവാര്യമാണെന്നാണ് ഇഡിയുടെ വിലയിരുത്തൽ.
ഐടി സേവനങ്ങൾ നൽകിയെന്ന പേരിൽ എക്സാലോജിക്കിലേക്ക് എത്തിയ പണം പിന്നീട് എങ്ങോട്ടൊക്കെ പോയി, ഇതിന് പിന്നിൽ മറ്റ് അവിശുദ്ധ ഇടപാടുകൾ നടന്നിട്ടുണ്ടോ എന്നാണ് ഇഡി പ്രധാനമായും പരിശോധിക്കുന്നത്. പ്രാഥമിക പരിശോധനകൾ പൂർത്തിയാകുന്നതോടെ ചോദ്യം ചെയ്യലിന് ഹാജരാകാൻ ആവശ്യപ്പെട്ട് വീണയ്ക്ക് നോട്ടീസ് നൽകും.
