പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തിയതിന്റെ ചിത്രങ്ങൾ സമൂഹമാധ്യമങ്ങളിലൂടെ പങ്കുവെച്ച് നടൻ ദുൽഖർ സൽമാൻ. ”നമ്മുടെ ബഹുമാനപ്പെട്ട ഇന്ത്യൻ പ്രധാനമന്ത്രി ശ്രീ നരേന്ദ്ര മോദി ജിയെ കാണാനും അദ്ദേഹത്തോടൊപ്പം സമയം ചെലവഴിക്കാനും കഴിഞ്ഞത് തികച്ചും ഒരു ബഹുമതിയായി കരുതുന്നു. എന്റെ അച്ഛൻ ശ്രീ മമ്മൂട്ടിക്ക് അദ്ദേഹത്തിന്റെ സമാനതകളില്ലാത്ത ജീവിതകാലത്തെ പ്രയത്നങ്ങൾക്ക് രാജ്യം നൽകിയ വലിയ ആദരവിന് ഞങ്ങൾ സാക്ഷ്യം വഹിച്ചു. ഞങ്ങളുടെ കുടുംബത്തിന് ഇത് തികച്ചും അവിസ്മരണീയമായ ഒരു ദിവസമാണ്,” എന്നാ വൈകാരികമായ കുറിയാണ് ദുൽഖർ സൽമാൻ പ്രധാനമന്ത്രിക്ക് ഒപ്പമുള്ള ചിത്രങ്ങൾ സമൂഹമാധ്യമങ്ങളിലൂടെ പങ്കുവെച്ചത്.
മലയാളത്തിന്റെ മെഗാസ്റ്റാർ മമ്മൂട്ടിക്ക് രാജ്യം പത്മഭൂഷൺ പുരസ്കാരം നൽകി ആദരിച്ച ചരിത്ര നിമിഷത്തിന് പിന്നാലെയാണ് മമ്മൂട്ടിയും ദുൽഖർ സൽമാനും കുടുംബവും ചേർന്ന് പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയത്. ഡൽഹി രാഷ്ട്രപതി ഭവനിൽ നടന്ന പ്രൗഢഗംഭീരമായ ചടങ്ങിൽ വെച്ചാണ് മമ്മൂട്ടി പുരസ്കാരം ഏറ്റുവാങ്ങിയത്. പുരസ്കാര ചടങ്ങുകൾക്ക് ശേഷം പ്രധാനമന്ത്രി നരേന്ദ്ര മോദി മമ്മൂട്ടിയെയും അദ്ദേഹത്തിന്റെ കുടുംബാംഗങ്ങളെയും നേരിട്ട് കണ്ട് സംസാരിച്ചിരുന്നു. മമ്മൂട്ടി, ഭാര്യ സുൽഫത്ത് കുട്ടി, മകൻ ദുൽഖർ സൽമാൻ, മകൾ സുറുമി, ദുൽഖറിന്റെ ഭാര്യ അമാൽ സൂഫിയ എന്നിവരടങ്ങുന്ന കുടുംബത്തോടൊപ്പമുള്ള ചിത്രങ്ങൾ പ്രധാനമന്ത്രി നരേന്ദ്രമോദിയും സമൂഹമാധ്യമങ്ങളിലൂടെ പങ്കുവെച്ചിരുന്നു. ഇതിന് പിന്നാലെയാണ് ഇപ്പോൾ ദുൽഖർ സൽമാനും ഈ ചിത്രങ്ങൾ പങ്കുവെച്ച് സന്തോഷം അറിയിച്ചിരിക്കുന്നത്.
