സംസ്ഥാനത്തെ വിവിധ ജില്ലകളിലായി ഇരുപതോളം പോക്സോ കേസുകളിൽ പ്രതിയായ മദ്രസ അദ്ധ്യാപകൻ ഒടുവിൽ പോലീസ് പിടിയിലായി. മലപ്പുറം ആതവനാട് കുറുമ്പത്തൂർ സ്വദേശിയായ എം.കെ. മുഹമ്മദിനെയാണ് (39) ബിഹാറിൽ വെച്ച് വളാഞ്ചേരി പോലീസ് അതിസാഹസികമായി പിടികൂടിയത്. പ്രായപൂർത്തിയാകാത്ത നിരവധി ആൺകുട്ടികളെ ക്രൂരമായ പ്രകൃതിവിരുദ്ധ പീഡനത്തിന് ഇരയാക്കിയ ശേഷം വർഷങ്ങളായി ഒളിവിൽ കഴിയുകയായിരുന്നു ഇയാൾ. കേസിൽ പോലീസ് ലുക്ക് ഔട്ട് നോട്ടീസ് ഉൾപ്പെടെ പുറപ്പെടുവിച്ച് അന്വേഷണം ഊർജ്ജിതമാക്കിയതോടെ നേപ്പാൾ വഴി വിദേശത്തേക്ക് രക്ഷപ്പെടാൻ പദ്ധതിയിടുന്നതിനിടയിലാണ് പ്രതി വലയിലാകുന്നത്.
പ്രായപൂർത്തിയാകാത്ത ആൺകുട്ടികളെ ഭീഷണിപ്പെടുത്തിയും പ്രലോഭിപ്പിച്ചും സ്വന്തം മുറിയിലേക്ക് വിളിച്ചുവരുത്തി മസാജ് ചെയ്യിപ്പിക്കലായിരുന്നു പ്രതിയുടെ പ്രധാന രീതിയെന്ന് പൊലീസ് പറയുന്നു. തുടർന്ന് കുട്ടികളെ ക്രൂരമായ ലൈംഗിക പീഡനത്തിന് ഇരയാക്കുകയായിരുന്നു. പുറത്തുപറഞ്ഞാൽ കൊന്നുകളയുമെന്ന ഭയം കാരണവും കടുത്ത മാനക്കേട് ഓർത്തും പല കുട്ടികളും വിവരം വീട്ടുകാരോട് പറയാൻ മടിച്ചിരുന്നു. എന്നാൽ അടുത്ത കാലത്ത് ചില കുട്ടികൾ തങ്ങൾ നേരിട്ട ദുരനുഭവം ചൈൽഡ്ലൈൻ പ്രവർത്തകരോടും മാതാപിതാക്കളോടും വെളിപ്പെടുത്തിയതോടെയാണ് ഇയാൾക്കെതിരെ പരാതികൾ പ്രവഹിക്കാൻ തുടങ്ങിയത്. ഇതോടെ അധ്യാപക ജോലി ഉപേക്ഷിച്ച് പ്രതി നാടുവിടുകയായിരുന്നു.
പ്രതിക്കായി മലപ്പുറം ജില്ലാ പോലീസ് മേധാവിയുടെ നിർദ്ദേശപ്രകാരം പ്രത്യേക അന്വേഷണസംഘം രൂപീകരിച്ചിരുന്നു. പോലീസ് കേസെടുത്ത് അന്വേഷണം തുടങ്ങിയതോടെ രാജസ്ഥാനിലെ അജ്മീരിൽ പോയി ഒളിവിൽ താമസിക്കുകയായിരുന്നു പ്രതി. എന്നാൽ പോലീസ് സംഘം അജ്മീറിലെ ഒളിസങ്കേതത്തിൽ എത്തിയെന്ന രഹസ്യവിവരം ചോർന്നുകിട്ടിയതോടെ ഇയാൾ അവിടെ നിന്നും അതിവേഗം ബിഹാറിലേക്ക് മുങ്ങുകയായിരുന്നു. ബിഹാറിലെ ഉൾഗ്രാമത്തിൽ താമസിച്ച് വ്യാജരേഖകൾ ചമച്ച് വിദേശത്തേക്ക് കടക്കാനായിരുന്നു ലക്ഷ്യം. എന്നാൽ പ്രതിയുടെ ഫോൺ ലൊക്കേഷനും സൈബർ സെല്ലിന്റെ സഹായത്തോടെയുള്ള നീക്കങ്ങളും കൃത്യമായി നിരീക്ഷിച്ച വളാഞ്ചേരി പോലീസ് സംഘം ബിഹാറിലെ ഒളിത്താവളം വളഞ്ഞ് ഇയാളെ കീഴ്പ്പെടുത്തുകയായിരുന്നു.
പ്രതിക്കെതിരെ നിലവിൽ മലപ്പുറം, കാസർകോട് ജില്ലകളിലായി 20 ഓളം കേസുകളാണ് രജിസ്റ്റർ ചെയ്തിട്ടുള്ളത്. ഇതിൽ വളാഞ്ചേരി പോലീസ് സ്റ്റേഷനിൽ മാത്രം 14 കേസുകളും താനൂരിൽ നാല് കേസുകളും കാസർകോട് ബേക്കൽ പോലീസ് സ്റ്റേഷനിൽ രണ്ട് കേസുകളും നിലവിലുണ്ട്. കൂടുതൽ കുട്ടികൾ ഇയാളുടെ ക്രൂരതയ്ക്ക് ഇരയായിട്ടുണ്ടോ എന്ന് പോലീസ് അന്വേഷിച്ചുവരികയാണ്. കസ്റ്റഡിയിലെടുത്ത പ്രതിയുമായി പോലീസ് സംഘം കേരളത്തിലേക്ക് തിരിച്ചു കഴിഞ്ഞു. കോടതിയിൽ ഹാജരാക്കിയ ശേഷം പ്രതിയെ കൂടുതൽ ചോദ്യം ചെയ്യലിനായി പോലീസ് കസ്റ്റഡിയിൽ വാങ്ങും.
