ഓടിക്കൊണ്ടിരിക്കുന്ന ഇ-റിക്ഷകളുടെയോ മറ്റ് ബാറ്ററി വാഹനങ്ങളുടെയോ പ്രവർത്തനം റോഡിൽ വെച്ച് പെട്ടെന്ന് നിർത്തിക്കാൻ ദുരുപയോഗം ചെയ്യുന്ന മൂന്ന് മൊബൈൽ ആപ്ലിക്കേഷനുകൾ നിരോധിക്കാൻ കേന്ദ്രസർക്കാർ ഉത്തരവിട്ടു. BAT-BMS, Lossigy, Epoch-i-ion എന്നീ മൂന്ന് മൊബൈൽ ആപ്പുകൾ ഉടൻ തന്നെ പ്ലേസ്റ്റോറുകളിൽ നിന്നും മറ്റ് പ്ലാറ്റ്‌ഫോമുകളിൽ നിന്നും നീക്കം ചെയ്യാനാണ് ഇലക്ട്രോണിക്സ് ആൻഡ് ഐടി മന്ത്രാലയം നിർദ്ദേശം നൽകിയിരിക്കുന്നത്.
കുറച്ചുദിവസങ്ങളായി സോഷ്യൽ മീഡിയയിൽ ചില വീഡിയോകൾ വ്യാപകമായി പ്രചരിച്ചിരുന്നു. ആളുകൾ വഴിയിലൂടെ പോകുന്ന ഇ-റിക്ഷകൾക്ക് സമീപം ചെന്ന് മൊബൈൽ ആപ്പ് ഉപയോഗിച്ച് അവയെ പാതിവഴിയിൽ പെട്ടെന്ന് സ്വിച്ച് ഓഫ് ചെയ്യുന്നതായിരുന്നു ഈ വീഡിയോകൾ. ആളുകൾ ഇത് വെറുമൊരു വിനോദത്തിനായി ചിത്രീകരിച്ച് റീൽസ് ആക്കിയതോടെയാണ് ഈ സുരക്ഷാ വീഴ്ച പുറത്തുവന്നതും പരാതികൾ ഉയർന്നതും.
ഇതിൽ എന്ന ആപ്പ് ഉപയോഗിച്ച് അടുത്തുള്ള ഏത് ഇ-വാഹനവും കണ്ടെത്താനും ഒറ്റ ടാപ്പിലൂടെ അതിന്റെ പ്രവർത്തനം നിർത്തിക്കാനും സാധിക്കുമെന്ന് കണ്ടെത്തിയിട്ടുണ്ട്. യാത്രക്കാരുമായി പോകുന്ന ഇ-റിക്ഷകൾ ഇങ്ങനെ പെട്ടെന്ന് റോഡിൽ ഓഫാകുന്നത് വലിയ അപകടങ്ങൾക്കും ട്രാഫിക് ബ്ലോക്കുകൾക്കും കാരണമായിരുന്നു.
നമ്മൾ സാധാരണ ബ്ലൂടൂത്ത് ഹെഡ്‌ഫോണുകളോ മറ്റ് ഉപകരണങ്ങളോ കണക്ട് ചെയ്യുന്നത് പോലെയാണ് ഈ ആപ്പുകളും പ്രവർത്തിക്കുന്നത്. എന്നാൽ ഇതിൽ യാതൊരുവിധ പാസ്‌വേഡോ സുരക്ഷാ കോഡുകളോ ആവശ്യമില്ല എന്നതാണ് വില്ലനായത്. 15 മീറ്റർ ചുറ്റളവിലുള്ള ആർക്കും ഈ ആപ്പ് ഡൗൺലോഡ് ചെയ്ത് അടുത്തുള്ള വാഹനത്തിന്റെ ലിഥിയം-അയൺ ബാറ്ററിയുമായി കണക്ട് ചെയ്യാം.
വാസ്തവത്തിൽ ഇവി ബാറ്ററികളുടെ ചാർജ്ജ്, വോൾട്ടേജ്, താപനില എന്നിവ പരിശോധിക്കാനാണ് ‘BAT-BMS’ പോലുള്ള ആപ്പുകൾ നിർമ്മിച്ചിരിക്കുന്നത്. എന്നാൽ പാസ്‌വേഡ് സുരക്ഷ ഇല്ലാത്തതിനാൽ ഏത് സ്മാർട്ട്ഫോണും ഈ ഇ-റിക്ഷകളുടെ ‘കിൽ സ്വിച്ച്’ ആയി മാറി. ഡൽഹി സർക്കാർ ഉദ്യോഗസ്ഥർ വ്യക്തമാക്കുന്നതനുസരിച്ച്, നിലവിൽ ഇന്ത്യയിലോടുന്ന പല ഇ-റിക്ഷകളിലും സുരക്ഷാ മാനദണ്ഡങ്ങൾ കുറഞ്ഞ ചൈനീസ് നിർമ്മിത ബാറ്ററി സിസ്റ്റങ്ങളാണ് ഉപയോഗിക്കുന്നത്. അതുകൊണ്ടാണ് ആപ്പുകൾ ഉപയോഗിച്ച് ആളുകൾ ഇവയെ ‘കുരുട്ടുബുദ്ധിയോടെ’ വഴിയിൽ ചതിക്കുന്നത്. വിലകുറഞ്ഞ ചൈനീസ് ഉപകരണങ്ങൾ രാജ്യ സുരക്ഷയ്ക്കും സാങ്കേതികവിദ്യയ്ക്കും എത്രത്തോളം വലിയ ഭീഷണിയാണെന്ന് തെളിയിക്കുന്നതാണ് ഈ സംഭവം എന്ന് വിദഗ്ദ്ധർ ചൂണ്ടിക്കാണിക്കുന്നു.
