യു.ഡി.എഫിലെ ചെറുപ്രശ്നങ്ങൾ രമ്യമായി പരിഹരിക്കുമെന്നും ആ കട്ടിൽ കണ്ട് പ്രതിപക്ഷ നേതാവ് പനിക്കണ്ടതില്ലെന്നും കോൺഗ്രസ് നേതാവും എം.പിയുമായ കെ.സി. വേണുഗോപാൽ. ആലപ്പുഴയിൽ മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. കേരളത്തിൽ യു.ഡി.എഫ് സർക്കാർ സ്വസ്ഥമായും മികച്ച രീതിയിലുമാണ് ഭരണം മുന്നോട്ട് കൊണ്ടുപോകുന്നത്. മുന്നണിയിലെ കൊച്ചുകൊച്ചു പ്രശ്നങ്ങൾ എല്ലാവരും ഒരുമിച്ചിരുന്ന് സംസാരിച്ച് പരിഹരിക്കുമെന്നും അദ്ദേഹം വ്യക്തമാക്കി.
സ്വന്തം പാർട്ടിയിലെ എതിർപ്പുകളെ ഉരുക്കുമുഷ്ടി ഉപയോഗിച്ച് അടിച്ചമർത്തിയാണ് പ്രതിപക്ഷ നേതാവ് മുന്നോട്ട് പോകുന്നത്. എല്ലാ എതിരഭിപ്രായങ്ങളെയും തമസ്കരിക്കുന്ന ആ നിലപാട് കൊണ്ടാണ് ടി.പി. ചന്ദ്രശേഖരനെപ്പോലും വധിക്കാൻ ആ പാർട്ടി തയ്യാറായത്. എന്നാൽ ജനാധിപത്യ പാർട്ടിയായ കോൺഗ്രസിൽ ചില അഭിപ്രായപ്രകടനങ്ങൾ ഉണ്ടാകുന്നത് സ്വാഭാവികമാണ്. അതൊരിക്കലും വലിയ തലത്തിലേക്ക് വളരുന്ന പ്രശ്നമല്ലെന്നും എല്ലാ വിഷയങ്ങളും ഭംഗിയായി പരിഹരിച്ച് മുന്നോട്ടു പോകുമെന്നും കെ.സി. വേണുഗോപാൽ പറഞ്ഞു. അക്കാര്യത്തിൽ പ്രതിപക്ഷ നേതാവിന് സമാധാനമായി ഇരിക്കാമെന്നും അദ്ദേഹം പരിഹസിച്ചു.
