ഏഷ്യാ കപ്പ് ഫൈനലിൽ പാകിസ്ഥാനെതിരെ ഇന്ത്യക്ക് തകർപ്പൻ ബാറ്റിങ് പ്രകടനം. ആദ്യം ബാറ്റ് ചെയ്ത ഇന്ത്യ 20 ഓവറിൽ 6 വിക്കറ്റ് നഷ്ടത്തിൽ 211 റൺസ് നേടി. തുടക്കത്തിൽ തന്നെ ആക്രമണാത്മക ബാറ്റിങ്ങിലൂടെ ഇന്ത്യ മികച്ച അടിത്തറ ഒരുക്കിയപ്പോൾ, അവസാന ഓവറുകളിൽ തിലക് വർമ്മയുടെ വെടിക്കെട്ടാണ് ടീമിനെ 200 കടത്തിയത്. പാകിസ്ഥാന് മുന്നിൽ 212 റൺസിന്റെ കൂറ്റൻ വിജയലക്ഷ്യമാണ് ഇന്ത്യ ഉയർത്തിയത്.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യക്ക് വൈഭവ് സൂര്യവംശിയും അഭിഷേക് ശർമ്മയും ചേർന്ന് മികച്ച തുടക്കമാണ് നൽകിയത്. വൈഭവ് 9 പന്തിൽ 15 റൺസെടുത്ത് പുറത്തായെങ്കിലും അഭിഷേക് തന്റെ ആക്രമണ ശൈലി തുടർന്നു. വെറും 28 പന്തിൽ 61 റൺസാണ് അഭിഷേക് അടിച്ചുകൂട്ടിയത്. മൂന്ന് ഫോറും ഏഴ് സിക്സും ഉൾപ്പെട്ട ഇന്നിങ്സ് പാകിസ്ഥാൻ ബൗളർമാർക്ക് തുടക്കം മുതൽ തന്നെ വലിയ സമ്മർദം സൃഷ്ടിച്ചു.
എന്നാൽ സഞ്ജു സാംസണിന്റെ പ്രകടനം വീണ്ടും നിരാശപ്പെടുത്തി. നാല് പന്തുകൾ നേരിട്ട സഞ്ജുവിന് നേടാനായത് വെറും രണ്ട് റൺസ്. അഹമ്മദ് ദനിയാലിന്റെ പന്തിൽ പുൾ ഷോട്ടിന് ശ്രമിച്ച സഞ്ജുവിന് പന്ത് കൃത്യമായി നിയന്ത്രിക്കാനായില്ല. മിഡ് ഓണിൽ അരാഫത്ത് മിൻഹാസ് ക്യാച്ചെടുത്തതോടെ ഇന്ത്യൻ വിക്കറ്റ് കീപ്പർ-ബാറ്ററുടെ ഇന്നിങ്സിന് അപ്രതീക്ഷിതമായി വിരാമമായി. നിർണായക ഫൈനലിൽ സഞ്ജുവിൽ നിന്ന് വലിയൊരു ഇന്നിങ്സ് പ്രതീക്ഷിച്ചിരുന്ന സാഹചര്യത്തിൽ വെറും രണ്ട് റൺസിന് പുറത്തായത് വീണ്ടും ചർച്ചയാകുകയാണ്.
ക്യാപ്റ്റൻ ശ്രേയസ് അയ്യരും കാര്യമായ സംഭാവന നൽകാനാകാതെ 24 പന്തിൽ 21 റൺസെടുത്ത് മടങ്ങി. ഇഷാൻ കിഷൻ 18 പന്തിൽ 20 റൺസെടുത്തപ്പോൾ, ഇന്ത്യയുടെ ഇന്നിങ്സിന്റെ വേഗത പിന്നീട് തിലക് വർമ്മ ഏറ്റെടുത്തു. വെറും 22 പന്തിൽ അർധസെഞ്ചുറി പൂർത്തിയാക്കിയ തിലക് 51 റൺസുമായി പുറത്താകാതെ നിന്നു. മൂന്ന് ഫോറും നാല് സിക്സും അടങ്ങിയ തിലകിന്റെ ഇന്നിങ്സ് ഇന്ത്യയുടെ സ്കോർ അവസാന ഘട്ടത്തിൽ അതിവേഗം ഉയർത്തി.
തിലക്കിന് മികച്ച പിന്തുണ നൽകിയ ശിവം ദുബെയും വേഗത്തിൽ റൺസ് കണ്ടെത്തി. 15 പന്തിൽ 27 റൺസാണ് ദുബെ നേടിയത്. രണ്ട് ഫോറും രണ്ട് സിക്സും ഉൾപ്പെട്ട ഇന്നിങ്സ് ഇന്ത്യയുടെ അവസാന ഓവറുകളിലെ റൺവേഗം കൂട്ടി. അക്സർ പട്ടേൽ ഒരു റൺസുമായി പുറത്താകാതെ നിന്നു. ഇന്ത്യയുടെ ഇന്നിങ്സിന്റെ ആദ്യ ആറ് ഓവറിൽ തന്നെ 81 റൺസ് പിറന്നു. പിന്നീട് മധ്യ ഓവറുകളിൽ റൺനിരക്ക് അൽപം കുറഞ്ഞെങ്കിലും അവസാന അഞ്ച് ഓവറിൽ 74 റൺസ് അടിച്ചെടുത്താണ് ഇന്ത്യ 211 എന്ന വലിയ സ്കോറിലേക്ക് എത്തിയത്. പാകിസ്ഥാൻ ബൗളർമാർക്ക് സമ്മർദം സൃഷ്ടിക്കുന്ന തരത്തിലായിരുന്നു ഇന്ത്യൻ ബാറ്റർമാരുടെ ആക്രമണം.
ഇന്ത്യ-പാകിസ്ഥാൻ ടി20 മത്സരങ്ങളിൽ ഇന്ത്യയുടെ ഏറ്റവും ഉയർന്ന ആദ്യ ഇന്നിങ്സ് സ്കോറുകളിലൊന്നായും 211 റൺസ് മാറി. അതേസമയം, ഫൈനലിൽ 200 റൺസിന് മുകളിൽ വിജയലക്ഷ്യം പിന്തുടരേണ്ടി വരുന്നത് പാകിസ്ഥാനെ വലിയ സമ്മർദത്തിലാക്കുന്നതാണ്. സ്പിന്നിന് അനുകൂലമായ പിച്ചിലാണ് മത്സരം നടക്കുന്നത് എന്നതും ഇന്ത്യൻ ബൗളിങ് നിരയ്ക്ക് പ്രതീക്ഷ നൽകുന്നു.
