റെഡ് ബുൾ, സ്റ്റിങ്, മോൺസ്റ്റർ ഉൾപ്പെടെയുള്ള പ്രമുഖ ‘എനർജി ഡ്രിങ്ക്’ ബ്രാൻഡുകൾക്കെതിരെ കർശന നടപടിയുമായി കേന്ദ്ര ഭക്ഷ്യസുരക്ഷാ ഗുണനിലവാര അതോറിറ്റി . ഉപഭോക്താക്കളെ തെറ്റിദ്ധരിപ്പിക്കുന്ന രീതിയിലുള്ള പരസ്യങ്ങളും അവകാശവാദങ്ങളും ഉന്നയിച്ചതിനാണ് കേന്ദ്ര ആരോഗ്യ-കുടുംബക്ഷേമ മന്ത്രാലയത്തിന് കീഴിലുള്ള പരമോന്നത ഭക്ഷ്യ നിയന്ത്രണ ബോർഡ് ഈ ബ്രാൻഡുകൾക്ക് നോട്ടീസ് അയച്ചിരിക്കുന്നത്.
വിപണിയിൽ എനർജി ഡ്രിങ്കുകൾ എന്ന പേരിൽ വിറ്റഴിക്കപ്പെടുന്ന പാനീയങ്ങൾ യഥാർത്ഥത്തിൽ അങ്ങനെയല്ലെന്നും, ഇവ ഉപഭോക്താക്കളെ വഞ്ചിക്കുന്ന രീതിയിലാണ് ബ്രാൻഡിങ് നടത്തുന്നതെന്നും എഫ്.എസ്.എസ്.എ.ഐ വ്യക്തമാക്കി. റെഡ് ബുൾ , സ്റ്റിങ് , മോൺസ്റ്റർ എനർജി , അഡ്രിനാലിൻ റഷ് ഹെൽ എനർജി , കാമ്പാ എനർജി, തുടങ്ങിയ പ്രമുഖ ബ്രാൻഡുകൾക്കാണ് നിലവിൽ നോട്ടീസ് ലഭിച്ചിരിക്കുന്നത്.
യഥാർത്ഥത്തിൽ ‘എനർജി ഡ്രിങ്ക്’ എന്നൊരു വിഭാഗത്തിന് എഫ്.എസ്.എസ്.എ.ഐ പ്രത്യേക മാനദണ്ഡങ്ങളൊന്നും നിശ്ചയിച്ചിട്ടില്ല. എന്നിട്ടും ഈ ബ്രാൻഡുകൾ തെറ്റായ രീതിയിൽ ലേബലിങ് നടത്തുന്നു എന്നാണ് കണ്ടെത്തിയിരിക്കുന്നത്. തങ്ങളുടെ ഔദ്യോഗിക ഇൻസ്റ്റാഗ്രാം പേജിലൂടെ എഫ്.എസ്.എസ്.എ.ഐ പുറത്തുവിട്ട പ്രസ്താവന ഇങ്ങനെയാണ്:
“ഭക്ഷ്യ സുരക്ഷാ നിയമപ്രകാരമുള്ള ഫുഡ് കാറ്റഗറി സിസ്റ്റം ഒരിക്കലും ഉൽപ്പന്നങ്ങളുടെ പേരിടാനോ ലേബൽ ചെയ്യാനോ ഉള്ളതല്ല. ‘മനസ്സിനെ ഉണർത്തുന്നു, ശരീരത്തിന് ഊർജ്ജം നൽകുന്നു’, ‘ശ്രദ്ധ കേന്ദ്രീകരിക്കാൻ സഹായിക്കുന്നു’, ‘ഊർജ്ജ നില വർദ്ധിപ്പിക്കുന്നു’, ‘പൊതുവായ ക്ഷീണം മാറ്റുന്നു’ തുടങ്ങിയ പ്രവർത്തനപരമോ ആരോഗ്യപരമോ ആയ അവകാശവാദങ്ങൾ ഉന്നയിക്കാൻ ഭക്ഷ്യസുരക്ഷാ നിയമം പ്രകാരം ഒന്നിനും അനുമതിയില്ല.”
ബെംഗളൂരു ആസ്റ്റർ സി.എം.ഐ ഹോസ്പിറ്റലിലെ ക്ലിനിക്കൽ ന്യൂട്രീഷ്യൻ വിഭാഗം മേധാവി എഡ്വിന രാജ് വ്യക്തമാക്കുന്നത് അനുസരിച്ച്, ഇത്തരം പാനീയങ്ങളിൽ അമിത അളവിൽ കഫീൻ പഞ്ചസാര, മറ്റ് ഉത്തേജക പദാർത്ഥങ്ങൾ എന്നിവ അടങ്ങിയിരിക്കുന്നു. ഇവ താൽക്കാലികമായി ഒരു ഉന്മേഷം നൽകുമെങ്കിലും താഴെ പറയുന്ന ഗുരുതരമായ ആരോഗ്യ പ്രശ്നങ്ങൾക്ക് കാരണമാകാം:
അമിതമായ ഹൃദയമിടിപ്പ്
കടുത്ത ഉത്കണ്ഠയും ഉറക്കക്കുറവും
നിർജ്ജലീകരണം, വിട്ടുമാറാത്ത തലവേദന
പെട്ടെന്ന് ഊർജ്ജം ചോർന്നുപോകുന്ന അവസ്ഥ
കുട്ടികൾ, കൗമാരക്കാർ, ഗർഭിണികൾ, ഹൃദ്രോഗമുള്ളവർ, ഉയർന്ന രക്തസമ്മർദ്ദമുള്ളവർ എന്നിവർ ഇത്തരം പാനീയങ്ങൾ ഉപയോഗിക്കുന്നത് കടുത്ത ആരോഗ്യ പ്രതിസന്ധികൾക്ക് കാരണമാകും.
ശാസ്ത്രീയമായി നോക്കിയാൽ ഒരു പാനീയത്തിനും ശരീരത്തിൽ തനിയെ ഊർജ്ജം നിർമ്മിക്കാനോ സ്ഥിരമായി ശ്രദ്ധ വർദ്ധിപ്പിക്കാനോ കഴിയില്ല. കഫീൻ തലച്ചോറിനെ ഉത്തേജിപ്പിച്ച് താൽക്കാലികമായി മാത്രം അലർട്ട്നെസ്സ് നിലനിർത്തുന്നു എന്ന് മാത്രം. പഞ്ചസാര പെട്ടെന്ന് ഒരു എനർജി നൽകുമെങ്കിലും അത് വളരെ കുറഞ്ഞ സമയത്തേക്ക് മാത്രമായിരിക്കും. കൃത്യമായ ഉറക്കം, സമീകൃതാഹാരം, വ്യായാമം എന്നിവയ്ക്ക് പകരമാകാൻ ഇത്തരം കൃത്രിമ പാനീയങ്ങൾക്ക് ഒരിക്കലും സാധിക്കില്ല.
