നടി നവ്യ നായരെക്കുറിച്ച് താൻ മുഖ്യമന്ത്രിയാകുമ്പോൾ സാരിയുടുത്ത് മുന്നിൽ നിൽക്കണമെന്ന് കഴിഞ്ഞ ദിവസം നടൻ ധ്യാൻ ശ്രീനിവാസൻ നടത്തിയ പരാമർശം വലിയ വിവാദത്തിലേക്ക്. തമിഴ് നടൻ വിജയ് തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്ത ചടങ്ങിൽ നടി തൃഷ പങ്കെടുത്തതിനെ പരാമർശിച്ചായിരുന്നു ധ്യാൻ ഇത്തരമൊരു തമാശ രൂപേണയുള്ള പ്രതികരണം നടത്തിയത്. എന്നാൽ വിജയിയെയും തൃഷയെയും കുറിച്ചുള്ള ഈ വാക്കുകൾ ഇപ്പോൾ തമിഴ് സിനിമാ പ്രേക്ഷകരെയും വിജയ് ആരാധകരെയും കടുത്ത രീതിയിൽ ചൊടിപ്പിച്ചിരിക്കുകയാണ്. ധ്യാനിന്റെ പുതിയ ചിത്രമായ ‘വിസിറ്റർ’ എന്ന സിനിമയുടെ ലോഞ്ചിനിടെയായിരുന്നു സംഭവം.
നടന്റെ ഈ പ്രസ്താവന പുറത്തുവന്നതിന് പിന്നാലെ സോഷ്യൽ മീഡിയയിൽ വലിയ രീതിയിലുള്ള ട്രോളുകളും വിമർശനങ്ങളുമാണ് ധ്യാനിനെതിരെ ഉയരുന്നത്. തമിഴ് ആരാധകർ കടുത്ത ഭാഷയിലാണ് പ്രതികരിക്കുന്നത്. വിജയ് തമിഴ്നാടിന്റെ മുഖ്യമന്ത്രിയാണെന്നും അതിനാൽ മലയാളികളെ പ്രോത്സാഹിപ്പിക്കുന്നത് തമിഴ് ജനത നിർത്തണമെന്നും, മലയാള സിനിമകളെയും താരങ്ങളെയും ഒരു പാഠം പഠിപ്പിക്കണമെന്നും ചിലർ കമന്റുകളിലൂടെ ആവശ്യപ്പെടുന്നുണ്ട്. ധ്യാൻ ചെന്നൈയിലേക്ക് വരാനായി കാത്തിരിക്കുകയാണെന്നും ഇവന്റെ ബ്രദർ വിനീത് ശ്രീനിവാസൻ താമസിക്കുന്നത് ചെന്നൈയിലാണല്ലോ എന്നും ഭീഷണിപ്പെടുത്തുന്ന രീതിയിലുള്ള കമന്റുകളും വരുന്നുണ്ട്.
അതേസമയം വേദിയിൽ വെച്ച് ധ്യാനിനൊപ്പമുണ്ടായിരുന്ന നടൻ അജു വർഗ്ഗീസ് നടത്തിയ പ്രതികരണവും ഇപ്പോൾ മലയാളി ആരാധകർ ചർച്ചയാക്കുന്നുണ്ട്. ധ്യാനിന്റെ ഈ തള്ളലുകൾ കേട്ട് ഇനി നമുക്ക് തമിഴ്നാട്ടിലേക്ക് പോകാൻ പറ്റില്ലെന്ന് അജു തമാശയായി പറഞ്ഞിരുന്നു. കൂടാതെ വേദിയിൽ വെച്ച് “വിജയ് സാർ മന്നിച്ചിടിങ്കേ, എൻ നൻപന്ക്ക് പൈത്യം” (വിജയ് സാർ ക്ഷമിക്കണം, എന്റെ കൂട്ടുകാരന് ഭ്രാന്താണ്) എന്ന് അജു പറഞ്ഞത് ഇപ്പോൾ ഫലത്തിൽ ശരിയായിരിക്കുകയാണെന്ന് സോഷ്യൽ മീഡിയയിൽ കുറിക്കുന്നുണ്ട്. പല തരത്തിലുള്ള വിവാദങ്ങൾ കണ്ടിട്ടുണ്ടെങ്കിലും ധ്യാനിന്റെ ഈ വള്ളി ഇപ്പോൾ ‘പാൻ ഇന്ത്യൻ’ തലത്തിലേക്ക് ഉയർന്നുവെന്നാണ് ട്രോളന്മാർ പറയുന്നത്.
വിഷയത്തിൽ തൃഷയെ വിമർശിച്ചും അനുകൂലിച്ചും നിരവധി ചർച്ചകൾ നടക്കുന്നുണ്ട്. മലയാളികൾ എല്ലാ കാര്യങ്ങളും വളരെ ആഴത്തിൽ മനസ്സിലാക്കുന്നവരാണെന്നും എന്നാൽ ഇപ്പോഴും കാര്യങ്ങളുടെ സത്യാവസ്ഥ മനസ്സിലാക്കാത്തത് തമിഴരാണെന്നും കാണിച്ച് ചിലർ ധ്യാനിനെ പിന്തുണയ്ക്കുന്നുമുണ്ട്. എന്തായാലും സിനിമയുടെ പ്രമോഷൻ വേദിയിൽ ധ്യാൻ ശ്രീനിവാസൻ പതിവ് ശൈലിയിൽ തമാശയായി പറഞ്ഞ കാര്യങ്ങൾ ഇപ്പോൾ ഇരു സംസ്ഥാനങ്ങളിലെയും സിനിമാ ആരാധകർക്കിടയിൽ വലിയൊരു സൈബർ യുദ്ധത്തിനാണ് വഴിതുറന്നിരിക്കുന്നത്.
