ലഡാക് ഉൾപ്പെടെയുള്ള കടുംതണുപ്പുള്ള അതിർത്തി മേഖലകളിൽ പ്രവർത്തിക്കുന്ന കരസേനയുടെ യുദ്ധവാഹനങ്ങൾക്കും ലോജിസ്റ്റിക് വാഹനങ്ങൾക്കും ആശ്വാസമായി ഇന്ത്യയുടെ പുതിയ തദ്ദേശീയ കണ്ടുപിടിത്തം. പൂജ്യത്തിന് താഴെ അതീവ തണുപ്പുള്ള കാലാവസ്ഥയിലും എഞ്ചിൻ തടസ്സമില്ലാതെ പ്രവർത്തിക്കാൻ ശേഷിയുള്ള ‘എക്സ്ട്രീം വെതർ ഗ്രേഡ്’ (XWG) ഡിസൽ കരസേനാ മേധാവി ജനറൽ ധീരജ് സേഥ് പുറത്തിറക്കി. ഇന്ത്യൻ ആർമിയും പൊതുമേഖലാ എണ്ണക്കമ്പനികളും സംയുക്തമായി വികസിപ്പിച്ചെടുത്ത ഈ പ്രത്യേക ഇന്ധനം സേനയുടെ സുരക്ഷയ്ക്കും പ്രതിരോധ സജ്ജതയ്ക്കും വലിയ വഴിത്തിരിവാകും.
സാധാരണയായി ഹിമാലയൻ അതിർത്തികളിലെ കഠിനമായ തണുപ്പിൽ ഡിസൽ ഉറഞ്ഞുപോവുകയും (Gelling) ഫ്യുവൽ ഫിൽട്ടറുകളിൽ തടസ്സം സൃഷ്ടിച്ച് വാഹനങ്ങൾ നിലയ്ക്കുകയും ചെയ്യുന്നത് പ്രതിരോധ സേനയ്ക്ക് വലിയ വെല്ലുവിളിയായിരുന്നു. എന്നാൽ മൈനസ് 42 ഡിഗ്രി സെൽഷ്യസ് വരെയുള്ള അതിശൈത്യത്തിലും പുതിയ XWG ഡിസൽ കട്ടപിടിക്കാതെ പൂർണ്ണമായും കാര്യക്ഷമമായി പ്രവർത്തിക്കും. ബിഎസ്-VI നിലവാരവും IS 1460:2025 നിഷ്കർഷകളും പാലിക്കുന്ന ഈ ഇന്ധനം ഉപയോഗിക്കാൻ കരസേനയുടെ നിലവിലുള്ള വാഹനങ്ങളിൽ എഞ്ചിൻ മാറ്റങ്ങളോ പ്രത്യേക പരിഷ്കരണങ്ങളോ വരുത്തേണ്ടതില്ലെന്നത് ഇതിന്റെ വലിയ പ്രത്യേകതയാണ്.
ആത്മനിർഭർ ഭാരത് പദ്ധതിയിലെ നിർണ്ണായക ചുവടുവെപ്പായ ഈ ഇന്ധനം കഠിനമായ ശൈത്യകാലത്ത് സേനാ അംഗങ്ങളുടെ സുരക്ഷയും ആത്മവീര്യവും വർദ്ധിപ്പിക്കുമെന്ന് ജനറൽ ധീരജ് സേഥ് ചൂണ്ടിക്കാട്ടി. അതിർത്തിയിലെ യുദ്ധ ടാങ്കുകൾക്കും സൈനിക വാഹനങ്ങൾക്കും തടസ്സമില്ലാത്ത യാത്രാസൗകര്യം ഉറപ്പാക്കുന്നതിനൊപ്പം, ഉയർന്ന മഞ്ഞുമലനിരകളിൽ ജീവിക്കുന്ന സാധാരണക്കാർക്കും ഹിമാചൽ, കശ്മീർ തുടങ്ങിയ പ്രദേശങ്ങളിലെ സാധാരണ വാഹനങ്ങൾക്കും ഈ സാങ്കേതികവിദ്യ ഭാവിയിൽ ഏറെ പ്രയോജനം ചെയ്യും.
