ആഗോള വൻശക്തികളെക്കുറിച്ചുള്ള കാഴ്ചപ്പാടിൽ അയൽരാജ്യങ്ങളായ ഇന്ത്യയും പാകിസ്ഥാനും രണ്ട് ധ്രുവങ്ങളിലെന്ന് പ്രമുഖ അമേരിക്കൻ തിങ്ക് ടാങ്കായ [Pew Research Center](https://www.pewresearch.org/) നടത്തിയ അന്താരാഷ്ട്ര സർവ്വേ ഫലം വ്യക്തമാക്കി. സർവ്വേയിൽ പങ്കെടുത്ത 36 രാജ്യങ്ങളിൽ നിന്നുള്ള 42,000 ആളുകളുടെ അഭിപ്രായങ്ങൾ വിശകലനം ചെയ്ത റിപ്പോർട്ടിലാണ് ഇന്ത്യയും പാകിസ്താനും തമ്മിലുള്ള നയതന്ത്ര മുൻഗണനകളിലെയും കാഴ്ചപ്പാടുകളിലെയും ഭിന്നതകൾ വ്യക്തമായി പുറത്തുവന്നിരിക്കുന്നത്.
റിപ്പോർട്ട് പ്രകാരം അമേരിക്കയെയും റഷ്യയെയും പങ്കാളികളായി കാണാൻ ഭൂരിഭാഗം ഇന്ത്യക്കാരും ആഗ്രഹിക്കുമ്പോൾ, ചൈനയാണ് തങ്ങളുടെ ഏറ്റവും വലിയ സഖ്യകക്ഷിയെന്നാണ് പാകിസ്താനിലെ ബഹുഭൂരിപക്ഷം ജനങ്ങളും വിശ്വസിക്കുന്നത്. സർവ്വേയിൽ പങ്കെടുത്ത 75 ശതമാനം പാകിസ്ഥാൻ ജനങ്ങളും ചൈനയെ തങ്ങളുടെ അടുത്ത മിത്രമായി കാണുന്നു. ചൈനീസ് പ്രസിഡന്റ് ഷി ജിൻപിംഗിൽ പൂർണ്ണ വിശ്വാസമുണ്ടെന്ന് 83 ശതമാനം പാകിസ്ഥാൻ പ്രായപൂർത്തിയായവരും വ്യക്തമാക്കി. എന്നാൽ 23 ശതമാനം ഇന്ത്യക്കാർക്ക് മാത്രമേ ചൈനയോട് അനുകൂല നിലപാടുള്ളൂ. 21 ശതമാനം ഇന്ത്യക്കാരും ചൈനയെ രാജ്യത്തിന്റെ ഏറ്റവും വലിയ സുരക്ഷാ ഭീഷണികളിലൊന്നായി വിലയിരുത്തുന്നു.
അതേസമയം, പാകിസ്ഥാൻ സർക്കാരും ഭരണകൂടവും അമേരിക്കയുമായി അടുത്ത ബന്ധം നിലനിർത്താൻ ആഗ്രഹിക്കുമ്പോഴും, പാകിസ്ഥാൻ ജനതയ്ക്കിടയിൽ അമേരിക്കൻ വിരുദ്ധത വളരെ ശക്തമാണെന്ന് [ThePrint](https://theprint.in/world/pakistan-govt-sees-us-as-ally-pakistanis-dont-only-15-hold-favourable-view-83-trust-xi/3014863/) വ്യക്തമാക്കുന്നു. പാകിസ്ഥാന്റെ 15 ശതമാനം ആളുകൾക്ക് മാത്രമാണ് അമേരിക്കയോട് അനുകൂല നിലപാടുള്ളത്. അമേരിക്കൻ പ്രസിഡന്റ് ഡൊണാൾഡ് ട്രംപിനെ അനുകൂലിക്കുന്നത് വെറും 12 ശതമാനം പാകിസ്താനിൽ മാത്രമാണ്. ഇതിന് വിപരീതമായി, ഇന്ത്യക്കാരിൽ 45 ശതമാനം പേർ അമേരിക്കയോടും 39 ശതമാനം പേർ ട്രംപിനോടും പോസിറ്റീവായ കാഴ്ചപ്പാട് വെച്ചുപുലർത്തുന്നു. കൂടാതെ, പാകിസ്താനികൾ ഇസ്രായേലിനെയും അമേരിക്കയെയുമാണ് തങ്ങളുടെ പ്രധാന ഭീഷണികളായി ഇന്ത്യയ്ക്ക് തൊട്ടുപിന്നിൽ പ്രതിഷ്ഠിച്ചിരിക്കുന്നത്.
റഷ്യയോടുള്ള സമീപനത്തിലും ഇരുരാജ്യങ്ങളും തമ്മിൽ വലിയ വ്യത്യാസമുണ്ട്. ഇന്ത്യക്കാരിൽ 58 ശതമാനം പേരും റഷ്യയോട് പോസിറ്റീവ് നിലപാട് കാണിക്കുമ്പോൾ, പാകിസ്താനിൽ ഇത് 39 ശതമാനം മാത്രമാണ്. റഷ്യൻ പ്രസിഡന്റ് വ്ളാഡിമിർ പുടിനെ ഇന്ത്യക്കാരിൽ 51 ശതമാനം പേരും പാകിസ്ഥാനികളിൽ 32 ശതമാനം പേരും അനുകൂലിക്കുന്നു. ഇന്ത്യക്കാരുടെ ഏറ്റവും വലിയ സഖ്യകക്ഷി റഷ്യയാണെന്ന് 36 ശതമാനം ആളുകൾ അഭിപ്രായപ്പെട്ടപ്പോൾ, 16 ശതമാനം പേർ അമേരിക്കയെ തങ്ങളുടെ മികച്ച സഖ്യകക്ഷിയായി ഉയർത്തിക്കാട്ടി.
സ്വാതന്ത്ര്യം ലഭിച്ച് 80 വർഷത്തോളമായിട്ടും ഇന്ത്യയും പാകിസ്ഥാനും തമ്മിലുള്ള പരസ്പര അവിശ്വാസം ശക്തമായി തുടരുന്നുവെന്നും സർവ്വേ ചൂണ്ടിക്കാണിക്കുന്നു. പാകിസ്ഥാനികളിൽ 91 ശതമാനം പേരും ഇന്ത്യയോട് കടുത്ത എതിർപ്പുള്ളവരാണ്. ഇന്ത്യക്കാരിലാകട്ടെ 78 ശതമാനം പേരും പാകിസ്ഥാനോട് പ്രതികൂല മനോഭാവം പുലർത്തുന്നു. തങ്ങളുടെ ഏറ്റവും വലിയ ഭൗമരാഷ്ട്രീയ ഭീഷണി അയൽരാജ്യമാണെന്ന് 54 ശതമാനം ഇന്ത്യക്കാരും 43 ശതമാനം പാകിസ്ഥാനികളും ഒരേ സ്വരത്തിൽ സമ്മതിക്കുന്നുണ്ട്. ദക്ഷിണേഷ്യൻ നയതന്ത്രരംഗത്തെ ശക്തിസമവാക്യങ്ങളിൽ ഇരുരാജ്യങ്ങളുടെയും വീക്ഷണങ്ങളിലുള്ള ഈ വൻവ്യത്യാസം ഭാവിയിലും നിർണ്ണായക സ്വാധീനം ചെലുത്തുമെന്നാണ് വിലയിരുത്തപ്പെടുന്നത്.
