ശരീരത്തിൽ കൊളസ്ട്രോളിന്റെ അളവ് ക്രമാതീതമായി ഉയർന്നാലും പ്രകടമായ ലക്ഷണങ്ങൾ പുറത്തുകാണിക്കാത്തതിനാൽ ഇതിനെ ‘സൈലന്റ് കില്ലർ’ എന്നാണ് മെഡിക്കൽ ലോകം വിശേഷിപ്പിക്കുന്നത്. യാതൊരുവിധ ലക്ഷണങ്ങളും പ്രകടിപ്പിക്കാതെ വർഷങ്ങളോളം രക്തധമനികളിൽ കൊഴുപ്പ് അടിയഞ്ഞു കൂടാനും, പിന്നീട് പെട്ടെന്നൊരു ദിവസം ഹൃദയാഘാതത്തിനോ സ്ട്രോക്കിനോ വരെ ഇത് കാരണമാകുകയും ചെയ്തേക്കാം. എന്നാൽ ഹൃദയാരോഗ്യത്തെ ദോഷകരമായി ബാധിക്കുന്നതിന് മുൻപ് തന്നെ കൊളസ്ട്രോൾ വർധനവിന്റെ ചില ചെറിയ സൂചനകൾ ശരീരം പുറത്തുവിടാറുണ്ടെന്ന് മുംബൈയിലെ പ്രമുഖ കാർഡിയാക് സർജൻ ഡോ. ബിപിൻചന്ദ്ര ഭാംരെ വ്യക്തമാക്കുന്നു.
കണ്ണുകൾക്ക് ചുറ്റും, ചർമ്മത്തിലും സന്ധികളിലും, കാലുകളിലുമൊക്കെയാണ് ഈ അപൂർവ്വ ലക്ഷണങ്ങൾ പ്രധാനമായും പ്രത്യക്ഷപ്പെടാറുള്ളത്. കൺപോളകൾക്ക് മുകളിലോ ചുറ്റുമോ കാണപ്പെടുന്ന മഞ്ഞനിറത്തിലുള്ള ചെറിയ മുഴകൾ (Xanthelasma), കണ്ണിന്റെ കറുപ്പിന് ചുറ്റും കാണുന്ന ചാരനിറത്തിലോ വെള്ള നിറത്തിലോ ഉള്ള വളയങ്ങൾ (Arcus Senilis), കൈമുട്ടുകളിലും കാൽമുട്ടുകളിലും കാണപ്പെടുന്ന കൊഴുപ്പ് അടിയുന്ന തിണർപ്പുകൾ എന്നിവ ഉയർന്ന കൊളസ്ട്രോളിന്റെ പ്രധാന ലക്ഷണങ്ങളാണ്. ഇതിനുപുറമെ, രക്തധമനികളിൽ തടസ്സം ഉണ്ടാകുന്നതുമൂലം നടക്കുമ്പോൾ കാലുകളിൽ കടുത്ത വേദനയും തളർച്ചയും അനുഭവപ്പെടുക, കാലുകളിലെ രോമം കൊഴിയുക, കാലുകളിലേക്ക് രക്തയോട്ടം കുറയുന്നത് മൂലം ഉണ്ടാകുന്ന മരവിപ്പ്, പാദങ്ങളിൽ ഉണ്ടാകുന്ന തണുപ്പ് എന്നിവയും അവഗണിക്കരുതെന്ന് വിദഗ്ധർ മുന്നറിയിപ്പ് നൽകുന്നു.
ഈ ശാരീരിക മാറ്റങ്ങൾ കണ്ട ഉടൻ തന്നെ ഭയപ്പെടേണ്ടതില്ലെന്നും എന്നാൽ ഇവ മറ്റ് പല രോഗങ്ങളുടെയും ലക്ഷണമാകാൻ സാധ്യതയുള്ളതിനാൽ കൃത്യമായ പരിശോധനകൾ നടത്തണമെന്നും ഡോക്ടർമാർ ഓർമ്മിപ്പിക്കുന്നു. പ്രത്യേകിച്ചും ചെറുപ്പക്കാരിലും പാരമ്പര്യമായി ഹൃദ്രോഗ പശ്ചാത്തലമുള്ള കുടുംബങ്ങളിലെ അംഗങ്ങളിലും ഈ ലക്ഷണങ്ങൾ കണ്ടാൽ അടിയന്തരമായി രക്തപരിശോധന (Lipid Profile Test) നടത്തേണ്ടതുണ്ട്. അമേരിക്കൻ നാഷണൽ ഹാർട്ട്, ലംഗ് ആൻഡ് ബ്ലഡ് ഇൻസ്റ്റിറ്റ്യൂട്ടിന്റെ (NHLBI) പഠനമനുസരിച്ച് രക്തപരിശോധനയിലൂടെ മാത്രമേ കൊളസ്ട്രോളിന്റെ കൃത്യമായ അളവ് നിർണ്ണയിക്കാൻ സാധിക്കൂ. ശരിയായ ഭക്ഷണരീതി, വ്യായാമം, ആവശ്യമാണെങ്കിൽ ഡോക്ടറുടെ നിർദ്ദേശപ്രകാരമുള്ള മരുന്നുകൾ എന്നിവയിലൂടെ കൊളസ്ട്രോൾ പൂർണ്ണമായും നിയന്ത്രണവിധേയമാക്കാം.
