ന്യൂഡൽഹി: 2025-ൽ പാകിസ്താനെതിരായി നടന്ന നിർണ്ണായകമായ ‘ഓപ്പറേഷൻ സിന്ദൂർ’ സൈനിക നീക്കത്തിൽ ഇന്ത്യക്ക് തന്ത്രപ്രധാനമായ വിജയം സമ്മാനിച്ച തദ്ദേശീയ ആയുധ സംവിധാനങ്ങൾ സ്വന്തമാക്കാൻ ആഗോള ആയുധ വിപണിയിൽ വൻ തിരക്ക്. യുദ്ധക്കളത്തിൽ പ്രഹരശേഷിയും കൃത്യതയും തെളിയിച്ച ഇന്ത്യയുടെ പ്രതിരോധ മിസൈൽ സംവിധാനമായ ‘ആകാശ്’ (Akash Air-Defence System) മധ്യേഷ്യൻ രാജ്യങ്ങളായ താജിക്കിസ്ഥാനും തുർക്മെനിസ്ഥാനും വാങ്ങിയതായി പ്രതിരോധ മന്ത്രാലയം ഔദ്യോഗികമായി സ്ഥിരീകരിച്ചു. ‘ആത്മനിർഭർ ഭാരത്’ പദ്ധതിക്ക് കീഴിൽ നിർമ്മിച്ച ഇന്ത്യൻ ആയുധങ്ങൾക്ക് അന്താരാഷ്ട്രതലത്തിൽ ലഭിക്കുന്ന ഏറ്റവും വലിയ അംഗീകാരമായാണ് ഈ നീക്കം വിലയിരുത്തപ്പെടുന്നത്.
ഡൽഹിയെ ലക്ഷ്യമിട്ടെത്തിയ പാക് മിസൈലിനെ ഹിസാറിൽ വെച്ച് തകർത്തു
ഓപ്പറേഷൻ സിന്ദൂറിനിടെ ഇന്ത്യൻ പ്രതിരോധ മേഖലകളെയും തലസ്ഥാനമായ ന്യൂഡൽഹിയെയും ലക്ഷ്യമാക്കി പാകിസ്താൻ തൊടുത്തുവിട്ട ഉപരിതല-ഉപരിതല (Surface-to-Surface) ബാലിസ്റ്റിക് മിസൈലിനെ ഹരിയാനയിലെ ഹിസാറിന് മുകളിൽ വെച്ച് വിജയകരമായി തടഞ്ഞുനിർത്തി തകർത്തത് ആകാശ് മിസൈൽ പ്രതിരോധ സംവിധാനമായിരുന്നു. ഇതിനുപുറമേ, ഇന്ത്യൻ വ്യോമാതിർത്തി ലംഘിച്ചെത്തിയ നിരവധി പാകിസ്താനി ഡ്രോണുകളെയും ആകാശ് മിസൈലുകൾ വാനിൽ വെച്ച് തരിപ്പണമാക്കി. മുൻപ് അർമേനിയ ആകാശ് മിസൈൽ സ്വന്തമാക്കിയ ആദ്യ വിദേശ രാജ്യമായി മാറിയിരുന്നു. ഇതിന് പിന്നാലെയാണ് ഇപ്പോൾ താജിക്കിസ്ഥാനും തുർക്മെനിസ്ഥാനും കോടികളുടെ കരാറുകളിൽ ഒപ്പുവെച്ചിരിക്കുന്നത്.
ബ്രഹ്മോസിനും അസ്ത്രയ്ക്കും വൻ ആവശ്യക്കാർ
ആകാശ് മിസൈലിന് പുറമെ, ഓപ്പറേഷൻ സിന്ദൂറിൽ പാകിസ്താന്റെ തന്ത്രപ്രധാന സൈനിക കേന്ദ്രങ്ങൾ തകർത്ത ബ്രഹ്മോസ് സുപ്പർസോണിക് ക്രൂയിസ് മിസൈൽ (BrahMos Supersonic Cruise Missile), ദൃശ്യപരിധിക്കപ്പുറമുള്ള ശത്രുവിമാനങ്ങളെ തകർക്കാൻ ശേഷിയുള്ള അസ്ത്ര എയർ-ടു-എയർ മിസൈൽ (Astra Air-to-Air Missile) എന്നിവ വാങ്ങാനും നിരവധി തെക്കുകിഴക്കൻ ഏഷ്യൻ, മിഡിൽ ഈസ്റ്റ് രാജ്യങ്ങൾ ഇന്ത്യയെ സമീപിച്ചിട്ടുണ്ട്.
ലോകത്തിലെ ഏറ്റവും വേഗമേറിയ സൂപ്പർസോണിക് ക്രൂയിസ് മിസൈലായ ബ്രഹ്മോസിന്റെ കര-നാവിക-വ്യോമ പതിപ്പുകൾ വാങ്ങി സ്വന്തമാക്കാൻ ഒന്നിലധികം ആഗോള ശക്തികൾ താത്പര്യം പ്രകടിപ്പിച്ചിട്ടുണ്ട്. തദ്ദേശീയമായി വികസിപ്പിച്ചെടുത്ത അത്യാധുനിക ആയുധ സാങ്കേതികവിദ്യയിലൂടെ ഇന്ത്യ ആഗോള ആയുധ കയറ്റുമതിയിൽ വൻ കുതിച്ചുചാട്ടത്തിന് ഒരുങ്ങുകയാണെന്ന് അന്താരാഷ്ട്ര പ്രതിരോധ നിരീക്ഷകർ ചൂണ്ടിക്കാണിക്കുന്നു.
