വിദേശ ഒറിജിനൽ എക്യുപ്മെന്റ് നിർമാതാക്കളേക്കാൾ ഏകദേശം നാലിലൊന്ന് വിലയ്ക്ക് ചില മിസൈൽ സംവിധാനങ്ങൾ നൽകാൻ ഇന്ത്യയ്ക്ക് കഴിയുമെന്ന് പ്രതിരോധ സെക്രട്ടറി രാജേഷ് കുമാർ സിംഗ്. ആഭ്യന്തര പ്രതിരോധ ഉൽപാദന ശേഷി വിപുലീകരിക്കുന്നതിന്റെ ഭാഗമായി രണ്ട് യുദ്ധവിമാന നിർമാണ ലൈനുകളും ആറ് മിസൈൽ നിർമാതാക്കളെയും നൂറുകണക്കിന് ഡ്രോൺ നിർമാതാക്കളെയും സജ്ജമാക്കാനുള്ള പദ്ധതികളും അദ്ദേഹം വ്യക്തമാക്കി.
പ്രതിരോധ കയറ്റുമതിയിൽ ഇന്ത്യ വൻ മുന്നേറ്റമാണ് ലക്ഷ്യമിടുന്നത്. 2030-ഓടെ 50,000 കോടി രൂപയുടെ പ്രതിരോധ കയറ്റുമതി എന്ന സർക്കാർ ലക്ഷ്യം 2028-ഓടെ തന്നെ കൈവരിക്കാനാകുമെന്നാണ് രാജേഷ് കുമാർ സിംഗിന്റെ വിലയിരുത്തൽ. ആഭ്യന്തരമായി നിർമിക്കുന്ന മിസൈലുകൾ, പീരങ്കികൾ ഉൾപ്പെടെയുള്ള സൈനിക ഉപകരണങ്ങൾക്ക് വിദേശ രാജ്യങ്ങളിൽ നിന്നുള്ള ആവശ്യം വർധിക്കുന്ന സാഹചര്യത്തിലാണ് പ്രതിരോധ മേഖലയിലെ കയറ്റുമതി സാധ്യതകൾ ഉയരുന്നത്.
2025-26 സാമ്പത്തിക വർഷത്തിൽ ഇന്ത്യയുടെ പ്രതിരോധ കയറ്റുമതി റെക്കോർഡ് 38,424 കോടി രൂപയിലെത്തി. 2013-14ൽ ഇത് വെറും 686 കോടി രൂപയായിരുന്നു. നിലവിലെ വളർച്ച തുടർന്നാൽ 50,000 കോടി രൂപയുടെ കയറ്റുമതി ലക്ഷ്യം നിശ്ചയിച്ച സമയത്തേക്കാൾ നേരത്തെ കൈവരിക്കാനാകുമെന്നാണ് പ്രതിരോധ മന്ത്രാലയത്തിന്റെ പ്രതീക്ഷ.
പബ്ലിക് അഫയേഴ്സ് ഫോറം ഓഫ് ഇന്ത്യയുടെ സമ്മേളനത്തിൽ സംസാരിക്കവെയാണ് പ്രതിരോധ സെക്രട്ടറി ഇക്കാര്യം വ്യക്തമാക്കിയത്. കഴിഞ്ഞ വർഷം മാത്രം ഏകദേശം 38,000 കോടി രൂപയുടെ പ്രതിരോധ ഉപകരണ ഓർഡറുകൾ ലഭിച്ചതായി അദ്ദേഹം പറഞ്ഞു. ഇന്ത്യൻ പ്രതിരോധ ഉൽപന്നങ്ങളുടെ പ്രധാന നേട്ടങ്ങളിലൊന്ന് ചെലവുകുറഞ്ഞ ഉൽപാദന ശേഷിയാണെന്നും അദ്ദേഹം ചൂണ്ടിക്കാട്ടി. പ്രത്യേകിച്ച് മിസൈൽ സംവിധാനങ്ങളിൽ വിദേശ നിർമാതാക്കൾ വാഗ്ദാനം ചെയ്യുന്ന വിലയേക്കാൾ വളരെ കുറഞ്ഞ നിരക്കിൽ ഇന്ത്യൻ സംവിധാനങ്ങൾ നൽകാൻ കഴിയുന്നത് ആഗോള വിപണിയിൽ ഇന്ത്യയുടെ മത്സരശേഷി വർധിപ്പിക്കുമെന്നാണ് വിലയിരുത്തൽ.
യുദ്ധവിമാനങ്ങൾ, മിസൈലുകൾ, ഡ്രോണുകൾ, പീരങ്കികൾ തുടങ്ങിയ മേഖലകളിൽ ആഭ്യന്തര ഉൽപാദന ശേഷി വർധിപ്പിക്കുന്നതിലൂടെ പ്രതിരോധ ആവശ്യങ്ങൾക്കായി വിദേശ ആശ്രയം കുറയ്ക്കുന്നതിനൊപ്പം ഇന്ത്യയെ പ്രധാന പ്രതിരോധ കയറ്റുമതി രാജ്യങ്ങളിലൊന്നാക്കി മാറ്റാനാണ് സർക്കാർ ലക്ഷ്യമിടുന്നത്.
