സിജെപി ഒക്ടോബർ 10-ന് പ്രഖ്യാപിച്ച പ്രതിഷേധ സമരത്തിന്റെ പശ്ചാത്തലത്തിൽ സെൻട്രൽ ഡൽഹിയിൽ മൊബൈൽ ഇൻ്റർനെറ്റ് സേവനങ്ങൾ താൽക്കാലികമായി നിരോധിക്കാൻ കേന്ദ്ര ആഭ്യന്തര മന്ത്രാലയം ഉത്തരവിട്ടു. ഒക്ടോബർ 9 രാത്രി 10 മണി മുതൽ ഒക്ടോബർ 10 രാത്രി 10 മണി വരെ 24 മണിക്കൂർ നേരത്തേക്കാണ് ഈ നിയന്ത്രണം നിലവിൽ വരുന്നത്. ജൻപഥ്-കർത്തവ്യ പഥ് ക്രോസിംഗിന് ചുറ്റുമുള്ള നാല് കിലോമീറ്റർ ചുറ്റളവിൽ എല്ലാത്തരം മൊബൈൽ ഇന്റർനെറ്റ് സേവനങ്ങളും ലഭ്യമാകില്ലെന്ന് അധികൃതർ അറിയിച്ചു.
ടെലികമ്മ്യൂണിക്കേഷൻസ് ആക്ട് പ്രകാരം പുറപ്പെടുവിച്ച ഈ ഉത്തരവ് നടപ്പിലാക്കാൻ എയർടെൽ, ജിയോ, വോഡഫോൺ ഐഡിയ, എംടിഎൻഎൽ എന്നീ പ്രമുഖ ടെലികോം സേവനദാതാക്കൾക്ക് ഡൽഹി പോലീസ് നിർദ്ദേശം നൽകിയിട്ടുണ്ട്. ചീഫ് ഇലക്ഷൻ കമ്മീഷണറുടെ രാജിയും വോട്ട് മോഷണ ആരോപണങ്ങളും ഉന്നയിച്ച് കോക്രോച്ച് ജനതാ പാർട്ടി (സിജെപി) ജന്തർ മന്ദറിൽ സംഘടിപ്പിക്കുന്ന പ്രതിഷേധത്തിൽ ക്രമസമാധാന പ്രശ്നങ്ങൾ ഉണ്ടാകാതിരിക്കാനാണ് ഈ നടപടി. അനാവശ്യമായ വ്യാജപ്രചരണങ്ങളും സംഘർഷസാധ്യതകളും തടയുകയാണ് നിയന്ത്രണത്തിന്റെ പ്രധാന ലക്ഷ്യം.
സമരത്തിന് അനുമതി നിഷേധിച്ചതിന് പിന്നാലെ ഇൻ്റർനെറ്റ് സേവനങ്ങൾ കൂടി വിച്ഛേദിച്ചതിനെതിരെ പ്രതിപക്ഷ പാർട്ടികളും സംഘടനകളും പ്രതിഷേധവുമായി രംഗത്തെത്തിയിട്ടുണ്ട്. എന്നാൽ തലസ്ഥാനത്തെ ക്രമസമാധാന പരിപാലനം ഉറപ്പാക്കാൻ ആറായിരത്തിലധികം സുരക്ഷാ ഉദ്യോഗസ്ഥരെയാണ് പ്രദേശത്ത് വിന്യസിച്ചിരിക്കുന്നത്. ഇതിന് പുറമെ നഗരത്തിലെ പ്രധാന മെട്രോ സ്റ്റേഷനുകളിലും ഗതാഗത റൂട്ടുകളിലും കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ട്.
