ന്യൂഡൽഹി: ടെലികോം രംഗത്ത് വിപ്ലവകരമായ മാറ്റങ്ങൾക്ക് വഴിതുറന്ന് ആറാം തലമുറ (6ജി) സാങ്കേതികവിദ്യ അവതരിപ്പിക്കുന്ന ലോകത്തിലെ ആദ്യ രാജ്യങ്ങളിൽ ഒന്നാകാൻ ഇന്ത്യ ഒരുങ്ങുന്നു. ഇതിനായുള്ള ബൃഹത്തായ തയ്യാറെടുപ്പുകളുമായി രാജ്യത്തെ മുൻനിര ടെലികോം സേവന ദാതാക്കളായ റിലയൻസ് ജിയോ രംഗത്തെത്തി. ന്യൂഡൽഹിയിൽ നടക്കുന്ന ഇന്ത്യ മൊബൈൽ കോൺഗ്രസ് (ഐഎംസി) 2026-ലാണ് സ്വന്തമായി വികസിപ്പിച്ച പ്രീ-6ജി സാങ്കേതിക സംവിധാനവും (Pre-6G Stack) ഇന്ത്യയിലെ ആദ്യ ഗിഗാ മിമോ റേഡിയോയും ജിയോ ഔദ്യോഗികമായി പ്രദർശിപ്പിച്ചത്.
2030-ഓടെ 6ജിയുടെ ആഗോള മാനദണ്ഡങ്ങൾ അന്തിമമാകുന്നതോടെ രാജ്യത്ത് സേവനം ലഭ്യമാക്കാനാണ് ലക്ഷ്യമിടുന്നത്. നിലവിലുള്ള 5ജി നെറ്റ്‌വർക്കുകളെ അപേക്ഷിച്ച് അഞ്ച് മടങ്ങ് അധിക ശേഷിയും (Capacity) ഡാറ്റ കൈമാറ്റത്തിലെ ലേറ്റൻസി (Latency) പത്തിലൊന്നായി കുറയ്ക്കാനും 6ജിയിലൂടെ സാധിക്കുമെന്ന് ജിയോ വ്യക്തമാക്കി. ഡാറ്റ നൽകുന്ന നിർദേശങ്ങളോട് നെറ്റ്‌വർക്ക് പ്രതികരിക്കുന്ന സമയം ഗണ്യമായി കുറയുന്നതോടെ അതിവേഗ ഇൻ്റർനെറ്റ് സേവനവും തടസ്സമില്ലാത്ത കണക്റ്റിവിറ്റിയും ഉപയോക്താക്കൾക്ക് ലഭ്യമാകും.
ആരോഗ്യ സംരക്ഷണം, വിദ്യാഭ്യാസം, കാർഷിക മേഖല, തത്സമയ നിർമിതബുദ്ധി (എഐ) സേവനങ്ങൾ, ഹോളോഗ്രാഫിക് വീഡിയോ കോളുകൾ തുടങ്ങിയ സാങ്കേതിക വിസ്മയങ്ങൾക്ക് 6ജി നെറ്റ്‌വർക്ക് പുതിയ ദിശാബോധം നൽകും. 6ജിയുമായി ബന്ധപ്പെട്ട് ഒട്ടേറെ പേറ്റന്റുകളും സംഭാവനകളും ഇതിനോടകം തന്നെ ജിയോ സ്വന്തമാക്കിയിട്ടുണ്ട്. അഞ്ചാം തലമുറ സാങ്കേതികവിദ്യ രാജ്യത്തുടനീളം വേഗത്തിൽ എത്തിച്ചതിന് പിന്നാലെ 6ജി വിപ്ലവത്തിലും ഇന്ത്യയെ മുന്നിൽ നിർത്തി ചരിത്രം കുറിക്കാനാണ് ജിയോയുടെ നീക്കം.
