റിയാദ്: പശ്ചിമേഷ്യയെ മുൾമുനയിലാക്കി സൗദി അറേബ്യയുടെ തലസ്ഥാനമായ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് നേരെ ഹൂതി വിമതർ നടത്തിയ കനത്ത മിസൈൽ ആക്രമണത്തിൽ 12 പേർ കൊല്ലപ്പെട്ടു.ആക്രമണത്തിൽ 309 പേർക്ക് പരിക്കേറ്റതായും ഇതിൽ പലരുടെയും നില അതീവ ഗുരുതരമാണെന്നും സൗദി ഔദ്യോഗിക വൃത്തങ്ങൾ സ്ഥിരീകരിച്ചു. ഇറാനുമായി ബന്ധപ്പെട്ട് പശ്ചിമേഷ്യയിൽ യുദ്ധം ആരംഭിച്ചതിനു ശേഷം സൗദിക്ക് നേരെ ഉണ്ടായതിൽ വെച്ച് ഏറ്റവും വലിയ മരണസംഖ്യയേറിയ ആക്രമണമാണിത്.
ഇന്നലെ ഉച്ചയോടെയാണ് റിയാദിലെ കിങ് ഖാലിദ് വിമാനത്താവളം ലക്ഷ്യമാക്കി ഹൂതികളുടെ ഭാഗത്തുനിന്ന് സ്ഫോടക വസ്തുക്കളുമായുള്ള ആക്രമണമുണ്ടായത്. സ്ഫോടനത്തെ തുടർന്ന് വിമാനത്താവളത്തിൽ വലിയ രീതിയിൽ പുകയും തീയും ഉയർന്നതായി ദൃക്സാക്ഷികൾ വ്യക്തമാക്കി. കൊല്ലപ്പെട്ടവരിൽ നാല് പേർ സൗദി പൗരന്മാരാണ്. ബംഗ്ലാദേശ്, ജോർദാൻ, ഈജിപ്ത്, പലസ്തീൻ, സിറിയ എന്നീ രാജ്യങ്ങളിൽ നിന്നുള്ളവരും മരണപ്പെട്ടവരിലുൾപ്പെടുന്നു. കൂടാതെ കൊല്ലപ്പെട്ടവരിൽ ഒരു അമേരിക്കൻ പൗരനും ഉൾപ്പെട്ടിട്ടുണ്ടെന്ന് ഔദ്യോഗിക വിവരങ്ങൾ വ്യക്തമാക്കുന്നു.
റിയാദ് വിമാനത്താവളത്തിന് പുറമെ ദമ്മാമിലെ കിങ് ഫഹദ് അന്താരാഷ്ട്ര വിമാനത്താവളത്തിന് നേരെയും ഹൂതികളുടെ ഭാഗത്തുനിന്ന് സമാനമായ ആക്രമണ ശ്രമങ്ങൾ ഉണ്ടായിട്ടുണ്ട്. ജനവാസ മേഖലകളെയും സാധാരണക്കാർ ആശ്രയിക്കുന്ന സിവിലിയൻ വിമാനത്താവളങ്ങളെയും ലക്ഷ്യമിട്ടുള്ള ഈ ഭീകരാക്രമണത്തിന് ശക്തമായ മറുപടിയുമായി സൗദി സഖ്യസേനയുടെ പോർവിമാനങ്ങൾ ശക്തമായ പ്രത്യാക്രമണത്തിന് തുടക്കമിട്ടിട്ടുണ്ട്.
ആക്രമണത്തെ തുടർന്ന് കിങ് ഖാലിദ് അന്താരാഷ്ട്ര വിമാനത്താവളത്തിന്റെ പ്രവർത്തനം പൂർണ്ണമായും താത്കാലികമായി നിർത്തിവെച്ചു. വിമാനത്താവളത്തിലെ നാശനഷ്ടങ്ങളും സുരക്ഷാ സാഹചര്യങ്ങളും അധികൃതർ വിലയിരുത്തിവരികയാണ്. സുരക്ഷാ മുൻകരുതലിന്റെ ഭാഗമായി ഇന്ത്യയടക്കമുള്ള വിവിധ രാജ്യങ്ങളിൽ നിന്നും റിയാദിലേക്കും തിരിച്ചുമുള്ള വിമാന സർവീസുകൾ പ്രമുഖ വിമാനക്കമ്പനികൾ അടിയന്തരമായി റദ്ദാക്കുകയും താത്കാലികമായി നിർത്തിവെക്കുകയും ചെയ്തിട്ടുണ്ട്. വിമാനത്താവളങ്ങൾക്ക് നേരെ തുടർച്ചയായി ഉണ്ടാകുന്ന ഈ ആക്രമണങ്ങൾ മേഖലയിൽ കനത്ത ആശങ്കയാണ് സൃഷ്ടിച്ചിരിക്കുന്നത്.
