ന്യൂയോർക്കിലെ ജോൺ എഫ്. കെന്നഡി (JFK) അന്താരാഷ്ട്ര വിമാനത്താവളത്തിൽ വെച്ച് ബംഗ്ലാദേശ് മുൻ ഇടക്കാല സർക്കാരിന്റെ മുഖ്യ ഉപദേഷ്ടാവും നോബൽ സമ്മാന ജേതാവുമായ മുഹമ്മദ് യൂനുസിനെതിരെ പ്രവാസി ബംഗ്ലാദേശികൾ നടത്തിയ പ്രതിഷേധത്തിൽ ശക്തമായ നടപടിയുമായി രംഗത്ത് ബംഗ്ലാദേശ് സർക്കാർ. അവാമി ലീഗ് അനുഭാവികളായ പ്രവാസികൾ യൂനുസിനെ വളഞ്ഞ് അപമാനിച്ച നടപടി അംഗീകരിക്കാനാകില്ലെന്നും, ഇതിന് പിന്നിൽ പ്രവർത്തിച്ചവർക്കെതിരെ കർശനമായ നിയമനടപടികൾ സ്വീകരിക്കുമെന്നും പ്രധാനമന്ത്രി താരിഖ് റഹ്മാന്റെ സർക്കാർ ഔദ്യോഗികമായി മുന്നറിയിപ്പ് നൽകി.
സംഭവം അതീവ ഗൗരവത്തോടെയാണ് കാണുന്നതെന്നും ഇത് ‘അവാമി ലീഗ് ഭീകരത’യുടെ ഭാഗമാണെന്നും പ്രധാമന്ത്രിയുടെ വിവര-സംപ്രേഷണ ഉപദേഷ്ടാവ് സാഹിദ് ഉർ റഹ്മാൻ വ്യക്തമാക്കി. വിദേശ രാജ്യങ്ങളിൽ കഴിയുന്ന അവാമി ലീഗ് അംഗങ്ങൾ ഇത്തരം അതിക്രമങ്ങൾ ആവർത്തിച്ചാൽ അത് വെറുതെ വിടില്ലെന്നും, കുറ്റക്കാർക്കെതിരെ ഉറപ്പായും നിയമനടപടി ഉണ്ടാകുമെന്നും അദ്ദേഹം മാധ്യമങ്ങളോട് സംസാരിക്കവെ മുന്നറിയിപ്പ് നൽകി. ഇറ്റലിയിൽ വെച്ച് ആക്ടിവിസ്റ്റായ അജ്മേരിയ ഹഖ് ബാധോൻ ആക്രമിക്കപ്പെട്ട സംഭവവും അദ്ദേഹം ഇതിനോടൊപ്പം ചൂണ്ടിക്കാണിച്ചു.
ഷെയ്ഖ് ഹസീന സർക്കാരിന്റെ പതനത്തിനു ശേഷം രാജ്യത്ത് ഭരണനേതൃത്വം വഹിച്ച മുഹമ്മദ് യൂനുസ് വിമാനത്താവളത്തിൽ വീൽചെയറിൽ പുറത്തേക്ക് വരുമ്പോഴാണ് അവാമി ലീഗ് അനുകൂലികൾ എന്ന് കരുതപ്പെടുന്നവർ അദ്ദേഹത്തിന് നേരെ തിരിഞ്ഞത്. “നീ ഒരു ഭീകരനാണ്, കൊലയാളിയാണ്”, “എന്തിനാണ് ഇവിടെ വന്നത്?”, “രാജ്യത്ത് ആയിരക്കണക്കിന് പൊലീസുകാരെ കൊന്നൊടുക്കി” തുടങ്ങിയ രൂക്ഷമായ മുദ്രാവാക്യങ്ങളുമായി പ്രതിഷേധക്കാർ അദ്ദേഹത്തെ വളയുകയായിരുന്നു. ഒപ്പമുണ്ടായിരുന്ന സഹായി ലാമിയ മോർഷെദ് ലഗേജുകളുമായി ഒപ്പം നടക്കുമ്പോൾ, യൂനുസ് ഒന്നും മിണ്ടാതെ സ്തംഭിച്ചിരിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വൻതോതിൽ പ്രചരിച്ചിരുന്നു. തുടർന്ന് സുരക്ഷാ ഉദ്യോഗസ്ഥരെത്തിയാണ് അദ്ദേഹത്തെ അവിടെ നിന്നും മാറ്റി സുരക്ഷിതമായി കൊണ്ടുപോയത്. ആഗോളതലത്തിൽ രാജ്യത്തെ പ്രമുഖ വ്യക്തികൾക്ക് നേരെ വിദേശ മണ്ണിൽ നടക്കുന്ന ഇത്തരം സംഘടിത നീക്കങ്ങൾക്കെതിരെ ശക്തമായ പ്രതിരോധം തീർക്കാനാണ് പുതിയ സർക്കാരിന്റെ തീരുമാനം.
