ഐക്യരാഷ്ട്രസഭയുടെ (UN) പ്രത്യേക റിപ്പോർട്ടർ തയാറാക്കിയ ഗോത്രവർഗ്ഗക്കാരുടെ അവകാശങ്ങൾ സംബന്ധിച്ച റിപ്പോർട്ടിലെ ഇന്ത്യക്കെതിരെയുള്ള പരാമർശങ്ങൾ തള്ളി ഭാരതം. ആരോപണങ്ങൾ അടിസ്ഥാനരഹിതമാണെന്ന് വ്യക്തമാക്കിയ ഇന്ത്യ, വനാവകാശ നിയമപ്രകാരമുള്ള ഭൂമി അവകാശങ്ങൾ നൽകുന്ന ഔദ്യോഗിക കണക്കുകളും ഭരണഘടനാപരമായ സംരക്ഷണ സംവിധാനങ്ങളും ചൂണ്ടിക്കാട്ടിയാണ് ഐക്യരാഷ്ട്രസഭയിൽ മറുപടി നൽകിയത്.
ഐക്യരാഷ്ട്രസഭ ജനറൽ അസംബ്ലിയുടെ (UNGA) 81-ാമത് സമ്മേളനത്തിലെ മൂന്നാം കമ്മിറ്റി യോഗത്തിൽ സംസാരിക്കവേ, യുഎന്നിലെ ഇന്ത്യൻ സ്ഥിരം മിഷനിലെ ഫസ്റ്റ് സെക്രട്ടറി അനുജ് സ്വരൂപ് ആണ് ഇന്ത്യയുടെ ശക്തമായ നിലപാട് വ്യക്തമാക്കിയത്. വനവാസി സമൂഹങ്ങൾക്കായി നൽകിയിട്ടുള്ള ഭരണഘടനാ സംരക്ഷണവും പ്രത്യേക ക്ഷേമ പദ്ധതികളും അദ്ദേഹം വിശദീകരിച്ചു. വനാവകാശ നിയമപ്രകാരം (Forest Rights Act) പതിനായിരക്കണക്കിന് ആദിവാസികൾക്ക് ഭൂമിയുടെ അവകാശരേഖ നൽകിയിട്ടുണ്ടെന്നും, ‘സബ്കാ സാഥ്, സബ്കാ വികാസ്’ എന്ന തത്വം മുൻനിർത്തി ഭവന നിർമ്മാണം, കുടിവെള്ളം, ശുചിത്വം, ആരോഗ്യം, വിദ്യാഭ്യാസം, കണക്റ്റിവിറ്റി തുടങ്ങിയ മേഖലകളിൽ വലിയ വികസന പദ്ധതികൾ നടപ്പിലാക്കുന്നുണ്ടെന്നും ഇന്ത്യ വ്യക്തമാക്കി.
ഇന്ത്യയിലെ പട്ടികവർഗ്ഗ വിഭാഗങ്ങൾക്കുള്ള അംഗീകാരം അവകാശ അടിസ്ഥാനത്തിലല്ല, മറിച്ച് കേവലം ഭരണഘടനാപരവും ഭരണപരവുമായ പ്രക്രിയ മാത്രമാണെന്നായിരുന്നു യുഎൻ പ്രത്യേക റിപ്പോർട്ടറുടെ റിപ്പോർട്ടിലെ പ്രധാന വിമർശനം. എന്നാൽ 2007-ലെ ആദിവാസി അവകാശങ്ങൾ സംബന്ധിച്ച യുഎൻ പ്രഖ്യാപനത്തെ പിന്തുണയ്ക്കുമ്പോൾ തന്നെ, യാഥാർത്ഥ്യങ്ങൾ മനസ്സിലാക്കാതെയുള്ള ഇത്തരം വിമർശനങ്ങൾ അംഗീകരിക്കാനാകില്ലെന്ന് ഇന്ത്യ വ്യക്തമാക്കി. അന്താരാഷ്ട്ര മനുഷ്യാവകാശ പ്രസ്ഥാനങ്ങളെയും കൗൺസിലിനെയും പിന്തുണയ്ക്കുമ്പോഴും വസ്തുതാവിരുദ്ധമായ റിപ്പോർട്ടുകൾക്കെതിരെ ഇന്ത്യ നിലപാട് കർശനമാക്കുകയാണ്.
