സിഎംആർഎൽ-എക്സാലോജിക് മാസപ്പടി കേസിൽ താൻ നടത്തിയ നിയമപോരാട്ടം ഏറെ പ്രയാസകരമായിരുന്നുവെന്നും നിരന്തരമായ ഭീഷണികളും ആക്ഷേപങ്ങളും നേരിടേണ്ടി വന്നിട്ടുണ്ടെന്നും മാത്യു കുഴൽനാടൻ എംഎൽഎ. റാന്നിയിൽ നടന്ന ഒരു പൊതുപരിപാടിയിൽ സംസാരിക്കവെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.
രാഷ്ട്രീയ പോരാട്ടങ്ങളുടെ ഭാഗമായുള്ള ആക്രമണങ്ങൾ സ്വാഭാവികമാണെങ്കിലും, മാസപ്പടി കേസിന് ശേഷം തന്റെ പ്രായാധിക്യം ചെന്ന അമ്മയുടെ ഫോണിലേക്കും ഭാര്യയുടെയും കുടുംബത്തിന്റെയും ഫോണുകളിലേക്കും നിരന്തരം ഭീഷണി സന്ദേശങ്ങൾ എത്തിയതായി അദ്ദേഹം വെളിപ്പെടുത്തി. എന്തിനാണ് ഇത്രയും റിസ്കെടുക്കുന്നതെന്നും ഇതിന്റെ പിന്നാലെ പോകരുതെന്നും അമ്മ ചോദിച്ചിരുന്നുവെന്നും, വഴിയേ നടക്കുമ്പോൾ സൂക്ഷിക്കണമെന്ന് പറഞ്ഞ് അറിയാത്ത നിരവധി പേർ ഭീഷണിപ്പെടുത്തിയെന്നും മാത്യു കുഴൽനാടൻ കൂട്ടിച്ചേർത്തു.
ഇതിനുമുമ്പ് മുഖ്യമന്ത്രിക്കെതിരെ വിരൽ ഉയർത്തിയവരെ എങ്ങനെയാണ് നേരിട്ടിട്ടുള്ളതെന്ന് കേരളം കണ്ടിട്ടുള്ളതാണെന്നും അദ്ദേഹം ചൂണ്ടിക്കാണിച്ചു. എല്ലാ പരിഹാസങ്ങളും ഏറ്റുവാങ്ങി നടത്തിയ പോരാട്ടത്തിനൊടുവിൽ പിണറായി വിജയനെതിരെ വിജിലൻസ് കേസെടുക്കാൻ ഹൈക്കോടതി ഉത്തരവിട്ട സാഹചര്യം വലിയ ആവേശം നൽകുന്നതാണെന്ന് അദ്ദേഹം പറഞ്ഞു. തന്നെ രാഷ്ട്രീയത്തിലേക്ക് കൈപിടിച്ചുയർത്തിയത് വയലാർ രവിയാണെങ്കിലും, തനിക്ക് പ്രതിസന്ധികളുണ്ടായപ്പോഴൊക്കെ ചേർത്തുപിടിച്ച് കരുത്തുപകർന്നത് കെ സുധാകരൻ എന്ന ധീരനായ നേതാവായിരുന്നുവെന്നും മാത്യു കുഴൽനാടൻ വ്യക്തമാക്കി.
