ഇടത് സർക്കാരിന്റെ കിഫ്ബി കടമെടുപ്പ് നടപടികൾക്കെതിരെ മുൻ ധനകാര്യമന്ത്രി കെ.എൻ ബാലഗോപാലിന്റെ ഗുരുതര ആശങ്കകൾ വ്യക്തമാക്കുന്ന ഫയൽ പുറത്തുവന്നു. കടമെടുക്കുന്നത് സംസ്ഥാനത്തിന്റെ ധനസ്ഥിതിയെ പ്രതികൂലമായി ബാധിക്കുമെന്ന് ചൂണ്ടിക്കാട്ടി 2023 സെപ്റ്റംബറിലാണ് ബാലഗോപാൽ നോട്ട് എഴുതിയത്. കടമെടുപ്പ് പരിധിയുമായി ബന്ധപ്പെട്ട് കോടതിയിൽ നിന്ന് അനുകൂല നിലപാട് ഉണ്ടായാൽ മാത്രമേ അധിക കടമെടുപ്പും ഗ്യാരണ്ടിയും നടപ്പിലാക്കാൻ കഴിയുകയുള്ളൂവെന്നും, ഇക്കാര്യം മുഖ്യമന്ത്രി പരിശോധിക്കണമെന്നും നോட்டில் വ്യക്തമാക്കിയിരുന്നു. എന്നാൽ ഈ ആശങ്കകളെല്ലാം മറികടന്നാണ് കിഫ്ബി വഴിയുള്ള കടമെടുപ്പുമായി മുൻ സർക്കാർ മുന്നോട്ടുപോയത്.
ഇതിനുപുറമേ, കിഫ്ബി മസാല ബോണ്ട് ഇറക്കുന്നതിനെതിരെ അന്ന് ചീഫ് സെക്രട്ടറിയും ധനകാര്യ സെക്രട്ടറിയുമായിരുന്ന ടോം ജോസും മനോജ് ജോഷിയും കടുത്ത എതിർപ്പ് പ്രകടിപ്പിച്ചിരുന്നതിന്റെ മിനുട്‌സിന്റെ പകർപ്പും പുറത്തുവന്നിട്ടുണ്ട്. കിഫ്ബിയുടെ ബോർഡ് യോഗത്തിലാണ് ഇരുവരും എതിർപ്പറിയിച്ചത്. ആഭ്യന്തര വിപണിയിൽ നിന്ന് വായ്പയെടുക്കുന്നതിനേക്കാൾ വലിയ പലിശ നൽകേണ്ടി വരുമെന്നും, ഹെഡ്ജ് ചെയ്യാത്ത ബാധ്യതകൾ ഭാവിയിൽ വലിയ സാമ്പത്തിക പ്രതിസന്ധി സൃഷ്ടിക്കുമെന്നും ഉദ്യോഗസ്ഥർ അന്ന് മുന്നറിയിപ്പ് നൽകിയിരുന്നു.
കിഫ്ബിയുടെ പ്രവർത്തനങ്ങൾക്കെതിരെ ഗുരുതരമായ ആരോപണങ്ങളാണ് നിലവിൽ സർക്കാരും പ്രതിപക്ഷവും ഉയർത്തുന്നത്. ധനവകുപ്പിനെ കിഫ്ബി നോക്കുകുത്തിയാക്കിയെന്നും ഭൂമി ഏറ്റെടുക്കലിൽ വൻ ക്രമക്കേടുകൾ നടന്നിട്ടുണ്ടെന്നും റിപ്പോർട്ടുകൾ ചൂണ്ടിക്കാണിക്കുന്നു. കിഫ്ബി വായ്പയ്ക്ക് സർക്കാർ ഗ്യാരണ്ടി നൽകേണ്ടതില്ലെന്ന ധനവകുപ്പിന്റെ നിർദേശം മറികടന്നത് റൂൾസ് ഓഫ് ബിസിനസിന്റെ ലംഘനമാണെന്നും വിമർശനമുയരുന്നുണ്ട്.
കിഫ്ബി വഴി വന്ന അധിക ചെലവ് പതിമൂന്നായിരത്തിലധികം കോടി രൂപയാണെന്നും, മസാല ബോണ്ട് വഴിമാത്രം 181 കോടി രൂപയുടെ നഷ്ടമുണ്ടായെന്നും, സർക്കാർ നേരിട്ട് വായ്പ എടുത്തിരുന്നെങ്കിൽ ഉണ്ടാകുന്നതിനേക്കാൾ കോടികളുടെ അധിക പലിശ ബാധ്യതയാണ് സംസ്ഥാനത്തിന് ഉണ്ടായതെന്നും ആരോപണങ്ങൾ ഉയരുന്നുണ്ട്.
