പ്രധാനമന്ത്രി നരേന്ദ്ര മോദിയുടെ പിതാവിനെതിരെ കോൺഗ്രസ് അധ്യക്ഷൻ മല്ലികാർജുൻ ഖാർഗെ നടത്തിയ വിവാദ പരാമർശത്തിനെതിരെ കേന്ദ്ര ആഭ്യന്തരമന്ത്രി അമിത് ഷാ രൂക്ഷവിമർശനവുമായി രംഗത്തെത്തി. കഴിഞ്ഞ 12 വർഷത്തോളമായി തുടർച്ചയായ തിരഞ്ഞെടുപ്പ് പരാജയങ്ങൾ സമ്മാനിച്ച കടുത്ത നിരാശയാണ് കോൺഗ്രസിന്റെ ഇത്തരമൊരു താഴ്ന്ന നിലവാരത്തിലുള്ള അധിക്ഷേപത്തിന് പിന്നിലെന്ന് അമിത് ഷാ ആരോപിച്ചു. ഖാർഗെയുടെ വാക്കുകൾ രാഷ്ട്രീയ മര്യാദകളുടെ പരസ്യമായ ലംഘനമാണെന്നും കോൺഗ്രസിന്റെ ഇത്തരം അധിക്ഷേപങ്ങൾക്ക് വരും തിരഞ്ഞെടുപ്പുകളിൽ ജനങ്ങൾ തന്നെ കൃത്യമായ മറുപടി നൽകുമെന്നും അദ്ദേഹം വ്യക്തമാക്കി.
പ്രധാനമന്ത്രിയെയും അദ്ദേഹത്തിന്റെ കുടുംബത്തെയും കോൺഗ്രസ് ഇത്തരത്തിൽ അപമാനിക്കുന്നത് ആദ്യമായല്ലെന്ന് ആഭ്യന്തരമന്ത്രി ചൂണ്ടിക്കാട്ടി. മുൻപും പ്രധാനമന്ത്രിയുടെ അന്തരിച്ച മാതാവിനെ കോൺഗ്രസ് അധിക്ഷേപിച്ചിട്ടുണ്ടെന്നും മോദിയെ ‘മരണത്തിന്റെ വ്യാപാരി’ എന്നും ‘ചായക്കടക്കാരൻ’ എന്നും വിളിച്ച് ആക്ഷേപിച്ചവരാണ് രാഷ്ട്രീയ എതിരാളികളെന്നും അദ്ദേഹം ഓർമ്മിപ്പിച്ചു. ജനങ്ങൾക്ക് മുന്നിൽ അവതരിപ്പിക്കാൻ വ്യക്തമായ നയങ്ങളോ വികസന പരിപാടികളോ ഇല്ലാത്തതിനാൽ കേവലം വ്യക്തിപരമായ അപവാദപ്രചാരണങ്ങൾ മാത്രമാണ് ഇപ്പോൾ കോൺഗ്രസിന്റെ കൈമുതലായി ഉള്ളതെന്നും അദ്ദേഹം കൂട്ടിച്ചേർത്തു.
ബിഹാറിലെ പട്നയിൽ ഡോ. ശ്രീ കൃഷ്ണ സിങ്ങിന്റെ ജന്മവാർഷികത്തോടനുബന്ധിച്ച് നടന്ന ചടങ്ങിൽ സംസാരിക്കവെയായിരുന്നു വലിയ നാടകീയ രംഗങ്ങൾക്കൊടുവിൽ ഖാർഗെയുടെ വിവാദ പരാമർശമുണ്ടായത്. വിദേശത്തുള്ള കള്ളപ്പണം തിരികെ എത്തിക്കുമെന്ന വാഗ്ദാനം പാലിച്ചില്ലെന്ന് കാണിച്ച് കേന്ദ്ര സർക്കാരിനെതിരെ ഖാർഗെ പ്രസംഗിക്കുമ്പോൾ, പ്രധാനമന്ത്രി മോദി എവിടെയും പോകില്ലെന്ന് സദസ്സിൽ നിന്നൊരാൾ ഉറക്കെ വിളിച്ചുപറഞ്ഞു. ഇതോടെ പ്രകോപിതനായ ഖാർഗെ മോദിയല്ല, മോദിയുടെ അച്ഛന് വരെ ഇറങ്ങിപ്പോകേണ്ടി വരും എന്ന് തുറന്നടിക്കുകയായിരുന്നു. തുടർന്ന് മോദി അനുകൂല നിലപാട് ഉയർത്തിയയാളെ സംഘാടകർ ഹാളിൽ നിന്ന് പുറത്താക്കുകയും ചെയ്തു.
