രാജ്യത്തിന്റെ അന്തസ്സ് അന്താരാഷ്ട്രതലത്തിൽ ഉയർത്തിയതിന് പ്രധാനമന്ത്രി നരേന്ദ്ര മോദിക്ക് രാജ്യത്തെ പരമോന്നത പുരസ്കാരമായ ഭാരതരത്ന നൽകണമെന്ന് രാജ്യസഭാ എം.പി. വിക്രംജിത് സിംഗ് സാഹ്നി ആവശ്യപ്പെട്ടു. കേന്ദ്ര ആഭ്യന്തര മന്ത്രി അമിത് ഷായുടെ സാന്നിധ്യത്തിലാണ് അദ്ദേഹം ഈ പ്രഖ്യാപനം നടത്തിയത്.
ഗുജറാത്ത് മുഖ്യമന്ത്രിയായി തുടങ്ങി പ്രധാനമന്ത്രി പദത്തിലെത്തിനിൽക്കുന്ന നരേന്ദ്ര മോദിയുടെ 25 വർഷത്തെ പൊതുജീവിതം അടയാളപ്പെടുത്തുന്ന മഞ്ജിത് സിംഗിന്റെ 76 പെയിന്റിങ്ങുകൾ ഉൾപ്പെടുത്തിയ പ്രദർശനം നാഷണൽ മ്യൂസിയത്തിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വേൾഡ് പഞ്ചാബി ഓർഗനൈസേഷൻ സംഘടിപ്പിച്ച പരിപാടിയിൽ ഡൽഹി ലെഫ്റ്റനന്റ് ഗവർണർ തരൺജിത് സിംഗ് സന്ധുവും പങ്കെടുത്തു.
ജവഹർലാൽ നെഹ്‌റുവിനും ഇന്ദിരാഗാന്ധിക്കും ഭാരതരത്ന നൽകിയിട്ടുണ്ടെങ്കിൽ, ജി-20, ബ്രിക്സ് ഉച്ചകോടികളിലൂടെ ഇന്ത്യയുടെ പ്രതിച്ഛായ ലോകത്തിനുമുന്നിൽ ഉയർത്തിയ പ്രധാനമന്ത്രി മോദിയും ഈ ഉയർന്ന സിവിലിയൻ ബഹുമതിക്ക് അർഹനാണെന്ന് സാഹ്നി പറഞ്ഞു. നോട്ടുനിരോധനം, ആർട്ടിക്കിൾ 370 റദ്ദാക്കൽ, ഓപ്പറേഷൻ സിന്ദൂർ തുടങ്ങിയ സുപ്രധാന നാഴികക്കല്ലുകൾ അടങ്ങിയ ഡോക്യുമെന്ററിയുടെ പ്രദർശനത്തിന് ശേഷമായിരുന്നു അദ്ദേഹത്തിന്റെ പ്രസ്താവന. ആം ആദ്മി പാർട്ടിയിലൂടെ രാജ്യസഭയിലെത്തിയ വിക്രംജിത് സിംഗ് സാഹ്നി ഉൾപ്പെടെയുള്ള ചില എം.പിമാർ പിന്നീട് ബി.ജെ.പിയിലേക്ക് മാറിയിരുന്നു. 2008-ൽ പദ്മശ്രീ പുരസ്കാരം ലഭിച്ചിട്ടുള്ള വ്യക്തിയാണ് അദ്ദേഹം.
