നാല് സംസ്ഥാനങ്ങളിലെ നിയമനിർമാണ കൗൺസിൽ (എംഎൽസി) തിരഞ്ഞെടുപ്പിൽ കോൺഗ്രസിന് ഒരു സീറ്റുപോലും നേടാനാകാത്തതിനെ പരിഹസിച്ച് പ്രധാനമന്ത്രി നരേന്ദ്ര മോദി. ഉത്തർപ്രദേശ്, മഹാരാഷ്ട്ര, ബിഹാർ, കർണാടക എന്നീ സംസ്ഥാനങ്ങളിലായി 28 സീറ്റുകളിലേക്കാണ് തിരഞ്ഞെടുപ്പ് നടന്നത്. “ബാലറ്റ് പേപ്പർ ഉപയോഗിച്ചായിരുന്നു തിരഞ്ഞെടുപ്പ്. കോൺഗ്രസ് എത്ര സീറ്റുകൾ നേടിയെന്ന് ഊഹിക്കാമോ?” എന്നായിരുന്നു മോദിയുടെ ചോദ്യം. ഒക്ടോബർ 28-ന് എക്സിൽ പങ്കുവെച്ച കുറിപ്പിലൂടെയാണ് അദ്ദേഹം കോൺഗ്രസിനെ പരിഹസിച്ചത്. വോട്ടിങ് യന്ത്രങ്ങളിൽ ക്രമക്കേടുണ്ടെന്ന കോൺഗ്രസിന്റെ ആരോപണങ്ങളും ബാലറ്റ് പേപ്പറിലേക്ക് മടങ്ങണമെന്ന ആവശ്യവും നിലനിൽക്കുന്ന സാഹചര്യത്തിലായിരുന്നു പ്രധാനമന്ത്രിയുടെ ഈ പരിഹാസം.
നടന്ന തിരഞ്ഞെടുപ്പിൽ കോൺഗ്രസിന് ഏറ്റവും വലിയ തിരിച്ചടിയുണ്ടായത് കർണാടകയിലാണ്. സംസ്ഥാനത്ത് അധികാരത്തിലിരിക്കുന്ന കോൺഗ്രസിന് നാല് സീറ്റുകളിലും വിജയിക്കാനായില്ല. ബിജെപി മൂന്ന് സീറ്റുകളും സഖ്യകക്ഷിയായ ജനതാദൾ (സെക്കുലർ) ഒരു സീറ്റും നേടി. ബെംഗളൂരു അധ്യാപക മണ്ഡലത്തിൽ കോൺഗ്രസിന്റെ സിറ്റിങ് അംഗമായിരുന്ന പുട്ടണ്ണയെ ജെഡിഎസിന്റെ എ.പി. രംഗനാഥ് പരാജയപ്പെടുത്തി. ഉത്തർപ്രദേശിൽ ബിജെപിയും സമാജ്‌വാദി പാർട്ടിയും നേട്ടമുണ്ടാക്കി. ബിഹാറിൽ പ്രശാന്ത് കിഷോറിന്റെ ജൻ സൂരാജ് പാർട്ടി ദർഭംഗ അധ്യാപക മണ്ഡലത്തിൽ വിജയിച്ച് നിയമനിർമാണ കൗൺസിലിൽ ആദ്യമായി അക്കൗണ്ട് തുറന്നു. കോൺഗ്രസിന്റെ സിറ്റിങ് അംഗമായ മദൻ മോഹൻ ഝായെ പരാജയപ്പെടുത്തിയാണ് പാർട്ടി ഈ നേട്ടം സ്വന്തമാക്കിയത്. ബിഹാറിൽ ആർജെഡിയും ബിജെപിയും സ്വതന്ത്ര സ്ഥാനാർഥികളും വിജയിച്ചു. മഹാരാഷ്ട്രയിൽ അഞ്ച് സീറ്റുകളിലേക്കുള്ള വോട്ടെണ്ണലും രാഷ്ട്രീയ പോരാട്ടവും ശ്രദ്ധ നേടി. നാല് സംസ്ഥാനങ്ങളിലായി 12 സീറ്റുകളിൽ മത്സരിച്ച കോൺഗ്രസിന് ഒന്നിൽപ്പോലും വിജയിക്കാനായില്ലെന്നത് പാർട്ടിക്ക് വലിയ തിരിച്ചടിയായി.
ഇതോടെ ഇവിഎം യന്ത്രത്തെ കുറ്റം പറഞ്ഞ് സ്വന്തം കഴിവുകേട് മറയ്ക്കാൻ നോക്കിയ രാഹുൽ ഗാന്ധിയുടെ രാഷ്ട്രീയ നാടകങ്ങൾക്കാണ് കനത്ത തിരിച്ചടി നേരിട്ടിരിക്കുന്നത്. “യന്ത്രമായാലും പേപ്പറായാലും ജനങ്ങൾക്ക് നിങ്ങളെ വേണ്ടെങ്കിൽ പിന്നെ എന്ത് ചെയ്യാനാണ് രാഹുൽ ജി?” എന്നാണ് സോഷ്യൽ മീഡിയയിൽ ട്രോളന്മാർ ഇപ്പോൾ ചോദിച്ചുകൊണ്ടിരിക്കുന്നത്. ജനവിധി സ്വന്തം വശത്താക്കാൻ വോട്ട് ചോദിക്കുന്നതിന് പകരം സാങ്കേതികവിദ്യയെ കുറ്റം പറഞ്ഞ് സമയം കളയുന്ന കോൺഗ്രസ് നേതൃത്വത്തിന് ഈ ബാലറ്റ് തോൽവി ഒരു വലിയ പാഠമാണ്. തോൽവിയുടെ യഥാർത്ഥ കാരണം വോട്ടിംഗ് രീതിയിലല്ല, മറിച്ച് രാഹുൽ ഗാന്ധിയുടെ നേതൃത്വത്തിലും നിലപാടുകളിലുമാണെന്ന് ഈ തിരഞ്ഞെടുപ്പ് ഫലം ഒരിക്കൽ കൂടി തെളിയിച്ചിരിക്കുകയാണ്.
