പിഎസ്‍സി പരീക്ഷാ തട്ടിപ്പുമായി ബന്ധപ്പെട്ട് ചെയർമാനും അംഗങ്ങളും നൽകിയ മൊഴികളിൽ വൈരുധ്യം കണ്ടെത്തി. എല്ലാ തീരുമാനങ്ങളും കൂട്ടായി എടുത്തതാണെന്നാണ് ക്രൈംബ്രാഞ്ച് ചോദ്യം ചെയ്യലിൽ പിഎസ്‍സി ചെയർമാൻ എം.ആർ. ബൈജു മൊഴി നൽകിയത്. എന്നാൽ പല തീരുമാനങ്ങളും ചെയർമാൻ ഒറ്റയ്ക്കാണ് എടുക്കുന്നതെന്നാണ് ചില അംഗങ്ങൾ മൊഴി നൽകിയിരിക്കുന്നത്.
കേസിലെ പ്രതിയായ അഡീഷണൽ ചീഫ് സെക്രട്ടറി ആർ. ഹരിയും എം.ആർ. ബൈജുവും തമ്മിൽ വലിയ അടുപ്പമുണ്ടെന്നും ചില അംഗങ്ങൾ മൊഴി നൽകിയിട്ടുണ്ട്. ഹരി ഇപ്പോഴും ഒളിവിൽ തുടരുകയാണ്കയും ഇയാളുടെ വീട് പൂട്ടിയ നിലയിലുമാണ്. അതേസമയം, കേസിൽ അറസ്റ്റിലായ മുൻ ഡെപ്യൂട്ടി സെക്രട്ടറി സതീഷിനെ റിമാൻഡ് ചെയ്തിട്ടുണ്ട്.
ഉദ്യോഗസ്ഥരായ ഹരി, സതീഷ് എന്നിവരെ പൂർണമായും സംരക്ഷിക്കുന്ന രീതിയിലുള്ള മൊഴിയാണ് ചെയർമാൻ എം.ആർ. ബൈജു നൽകിയിട്ടുള്ളത്. ആസൂത്രണ ബോർഡ് പരീക്ഷയിലെ 10 ചോദ്യങ്ങളുടെ മൂല്യനിർണയം നടക്കാതെ പോയതിന് കാരണം ബോധപൂർവമായ വീഴ്ചയല്ലെന്നും സാങ്കേതിക പിഴവാണെന്നുമാണ് ചെയർമാന്റെ വാദം. എന്നാൽ ചെയർമാന്റെ ഈ മൊഴി ക്രൈംബ്രാഞ്ച് പൂർണമായും വിശ്വാസത്തിലെടുത്തിട്ടില്ല. ഇതിന്റെ അടിസ്ഥാനത്തിൽ ചെയർമാനെ വീണ്ടും ചോദ്യം ചെയ്യാൻ സാധ്യതയുണ്ട്.
മുഴുവൻ അംഗങ്ങളെയും ചോദ്യം ചെയ്യാൻ വിളിപ്പിച്ച ശേഷമായിരിക്കും ചെയർമാനെ വീണ്ടും ചോദ്യം ചെയ്യലിനായി വിളിപ്പിക്കുക. ഇതിനിടയിൽ, അസിസ്റ്റന്റ് എം.വി.ഐ. പരീക്ഷയുമായി ബന്ധപ്പെട്ട് പിഎസ്‍സി പരീക്ഷാ ക്രമക്കേടിൽ പുതിയതായി മറ്റൊരു കേസ് കൂടി രജിസ്റ്റർ ചെയ്തിട്ടുണ്ട്. പരീക്ഷയിലെ ഭൂരിപക്ഷം ചോദ്യങ്ങളും ഒരു പ്രത്യേക ഗൈഡിൽ നിന്നുള്ളതാണെന്ന പരാതിയെ തുടർന്നാണ് ഈ നടപടി.
