ഡല്‍ഹി: പത്മ പുരസ്‌കാരങ്ങള്‍ പ്രഖ്യാപിച്ചു. കേരളത്തില്‍ നിന്ന് ആറു പേര്‍ക്ക് ഇത്തവണ പത്മ പുരസ്‌കാരം നല്‍കും. കേരളത്തിന്റെ അനുഗ്രഹീത ഗായകന്‍ ഡോ.കെ.ജെ യേശുദാസ് പത്മ വിഭൂഷണ്‍ പുരസ്‌കാരത്തിന് അര്‍ഹനായി. ഇന്ത്യന്‍ ഹോക്കി ടീം നായകന്‍ പി ആര്‍ ശ്രീജേഷ് പത്മശ്രീ പുരസ്‌കാരം ലഭ്യമായി. മഹാകവി അക്കിത്തം അച്യുതന്‍ നമ്പൂതിരി, പ്രമുഖ കഥകളികലാകാരനും നൃത്താദ്ധ്യാപകനുമായ ചേമഞ്ചേരി കുഞ്ഞിരാമന്‍ നായര്‍, പാറശാല ബി. പൊന്നമ്മാള്‍, മീനാക്ഷി ഗുരുക്കള്‍ എന്നിവരാണ് പത്മശ്രീ പുരസ്‌കാര ജേതാക്കള്‍. 1975-ല്‍ യേശുദാസിന് പത്മ ശ്രീയും 2002-ല്‍ പത്മഭൂഷണും നല്‍കി രാജ്യം ആദരിച്ചിരുന്നു.
യേശുദാസിനെ കൂടാതെ എന്‍.സി.പി സ്ഥാപകന്‍ ശരദ് പവാര്‍, മുതിര്‍ന്ന ബി.ജെ.പി നേതാവ് മുരളി മനോഹര്‍ ജോഷി എന്നിവര്‍ക്കും പത്മ വിഭൂഷണ്‍ ലഭിക്കും. അന്തരിച്ച ജമ്മു കാശ്മീര്‍ മുഖ്യമന്ത്രി മുഫ്തി മുഹമ്മദ് സയിദിന് മരണാനന്തര ബഹുമതിയായും പത്മ വിഭൂഷണ്‍ ലഭിക്കും. ലോക്‌സഭാ മുന്‍ സ്പീക്കര്‍ പി.എ.സാഗ്മ, മദ്ധ്യപ്രദേശ് മുന്‍ മുഖ്യമന്ത്രി സുന്ദര്‍ലാല്‍ പത്‌വ എന്നിവര്‍ക്കും മരണാനന്തര ബഹുമതിയായി പത്മവിഭൂഷണ്‍ പുരസ്‌കാരം ലഭിച്ചു.
ഇന്ത്യന്‍ ക്രിക്കറ്റ് ക്യാപ്ടന്‍ വിരാട് കോഹ്‌ലി, റിയോ ഒളിമ്പിക്‌സില്‍ ഗുസ്തിയില്‍ വെങ്കല മെഡല്‍ നേടിയ സാക്ഷി മാലിക്, ജിംനാസ്റ്റിക് താരം ദിപ കര്‍മാക്കര്‍, ഡിസ്‌കസ് ത്രോ താരം വികാസ് ഗൗഡ എന്നിവര്‍ക്കും പത്മശ്രീ പുരസ്‌കാരം ലഭിച്ചു. മോഹനവീണ സംഗീതജ്ഞന്‍ വിശ്വമോഹന്‍ ഭട്ട്, ഗായിക അനുരാധ പൗദ്‌വാള്‍ എന്നിവരും പത്മശ്രീക്ക് അര്‍ഹരായി.
റിപ്പബ്‌ളിക് ദിനാഘോഷത്തിന് മുന്നോടിയായാണ് പത്മപുരസ്‌കാരങ്ങള്‍ പ്രഖ്യാപിച്ചത്.
Discussion about this post