വയനാട്ടിലുണ്ടായ ഉരുൾപൊട്ടൽ ദുരന്തത്തിന്റെ പശ്ചാത്തലത്തിൽ കോൺഗ്രസ് നേതാവ് രാഹുൽ ഗാന്ധിക്കെതിരെ കടുത്ത വിമർശനങ്ങളുമായി ഭാരതീയ ജനതാ പാർട്ടി (ബിജെപി). രാഹുൽ ഗാന്ധിയുടെ സമീപകാല വിദേശ സന്ദർശനങ്ങളെക്കുറിച്ച് അദ്ദേഹം വ്യക്തത വരുത്തണമെന്ന് ആവശ്യപ്പെട്ട ബിജെപി, ദുരന്തം നടന്നിട്ടും വയനാട് മണ്ഡലത്തെ രാഹുലും പ്രിയങ്കാ ഗാന്ധിയും പൂർണ്ണമായും അവഗണിക്കുകയാണെന്ന് ആരോപിച്ചു. ജൂലൈ ഏഴിന് വയനാട്, കോഴിക്കോട് ജില്ലകളെ ബന്ധിപ്പിക്കുന്ന അനാക്കമ്പൊയിൽ-മേപ്പാടി ഇരട്ടത്തുരങ്ക പാതയുടെ നിർമ്മാണ സ്ഥലത്തുണ്ടായ ഉരുൾപൊട്ടലിൽ എട്ട് ജീവനുകളാണ് നഷ്ടപ്പെട്ടത്. രാഹുൽ ഗാന്ധിയുടെ വിദേശയാത്രകൾ ദുരൂഹത നിറഞ്ഞതാണെന്നും ജൂൺ 22 മുതൽ ജൂലൈ 13 വരെയുള്ള കാലയളവിൽ അദ്ദേഹം എവിടെയാണ് പോയതെന്നും ആരെയാണ് കണ്ടതെന്നും വ്യക്തമാക്കാൻ പ്രതിപക്ഷ നേതാവെന്ന നിലയിൽ അദ്ദേഹത്തിന് ഉത്തരവാദിത്തമുണ്ടെന്നും ബിജെപി ഐടി സെൽ മേധാവി അമിത് മാളവ്യ ആവശ്യപ്പെട്ടു. ഈ യാത്രകളുടെ സ്പോൺസർമാർ ആരാണെന്ന് പൊതുജനങ്ങൾക്ക് അറിയാൻ അവകാശമുണ്ടെന്നും ഇത് രാജ്യത്തിന്റെ രാഷ്ട്രീയ അല്ലെങ്കിൽ തന്ത്രപ്രധാനമായ താല്പര്യങ്ങളെ ബാധിക്കുന്നതാണോ എന്ന് വെളിപ്പെടുത്തണമെന്നും അദ്ദേഹം എക്സിലൂടെ കുറിച്ചു.
മുൻപ് വയനാടിനെ പ്രതിനിധീകരിച്ച രാഹുൽ ഗാന്ധിയോ, മണ്ഡലത്തിലെ നിലവിലെ ജനപ്രതിനിധിയായ പ്രിയങ്കാ ഗാന്ധിയോ ദുരന്തബാധിത പ്രദേശം സന്ദർശിക്കാത്തത് എന്തുകൊണ്ടാണെന്ന് ബിജെപി ദേശീയ വക്താക്കൾ ചോദ്യം ചെയ്തു. വയനാട്ടിൽ നിന്നുള്ള ദൃശ്യങ്ങൾ അത്യന്തം ഭീതിജനകമാണെന്നും എന്നാൽ കോൺഗ്രസ് നേതാക്കൾ അവധിക്കാലം ആഘോഷിക്കാൻ മാത്രമാണ് ഇന്ത്യയിലേക്ക് വരുന്നതെന്നും ബാക്കി ഭൂരിഭാഗം സമയവും യൂറോപ്പിലോ അമേരിക്കയിലോ ആണ് ചെലവഴിക്കുന്നതെന്നും ബിജെപി വക്താവ് ഗുരു പ്രകാശ് കുറ്റപ്പെടുത്തി.
ദുരന്തം നടന്ന് ആറ് ദിവസമായിട്ടും ഇരകളുടെ കുടുംബങ്ങളെ നേരിട്ട് കണ്ട് ആശ്വസിപ്പിക്കാൻ പോലും പ്രിയങ്കാ ഗാന്ധി തയ്യാറായില്ലെന്നും സോഷ്യൽ മീഡിയയിൽ ഒരു അനുശോചന പോസ്റ്റ് മാത്രമിട്ട് കടമ അവസാനിപ്പിക്കുകയാണെന്നും ബിജെപി വക്താവ് സി.ആർ കേശവൻ ആരോപിച്ചു. രാഹുൽ ഗാന്ധി വയനാട് എംപിയായിരുന്ന സമയത്തും ഇതേ മാതൃകയാണ് പിന്തുടർന്നതെന്നും അദ്ദേഹം കൂട്ടിച്ചേർത്തു. ഇന്ത്യയിലെ ചൂടും മഴയും സഹിക്കാൻ കഴിയാത്തതുകൊണ്ടാണ് രാഹുൽ ഗാന്ധി വിദേശത്തേക്ക് പോയതെന്ന് സയ്യിദ് ഷാനവാസ് ഹുസൈൻ പരിഹസിച്ചപ്പോൾ, ഇരുവരും വെറും ‘രാഷ്ട്രീയ ടൂറിസ്റ്റുകൾ’ മാത്രമാണെന്ന് വക്താവ് തുഹിൻ സിൻഹ കുറ്റപ്പെടുത്തി.
രാഹുൽ ഗാന്ധിയുടെ അസാന്നിധ്യം കാരണം കോൺഗ്രസ് നടത്താനിരുന്ന ‘ഛാത്രോം കി ഗൂഞ്ച്’ എന്ന വിദ്യാർത്ഥി സമ്പർക്ക പരിപാടി മാറ്റിവെക്കേണ്ടി വന്നതായും ബിജെപി ചൂണ്ടിക്കാട്ടി. പ്രയാഗ്‌രാജ്, പട്ന, ഡൽഹി എന്നിവിടങ്ങളിൽ നടക്കേണ്ടിയിരുന്ന റാലികളാണ് രാഹുലിന്റെ വിദേശയാത്ര ജൂലൈ 17 വരെ നീണ്ടതിനെ തുടർന്ന് മാറ്റിവെച്ചത്. വരാനിരിക്കുന്ന പാർലമെന്റിന്റെ മൺസൂൺ സമ്മേളനം ജൂലൈ 20-ന് ആരംഭിക്കാനിരിക്കെ, പ്രതിപക്ഷ നേതാവിന്റെ തുടർച്ചയായ അസാന്നിധ്യം വലിയ ചോദ്യശരങ്ങളാണ് ഉയർത്തുന്നത്. പാർലമെന്റും പാർട്ടി സംഘടനയും സജീവമായ ഇടപെടലുകൾ ആവശ്യപ്പെടുന്ന ഈ സമയത്ത് സ്വന്തം ഉത്തരവാദിത്തങ്ങളേക്കാൾ രാഹുൽ ഗാന്ധിക്ക് എന്താണ് വിദേശത്ത് ഇത്രയധികം പ്രാധാന്യമുള്ളതെന്ന് അമിത് മാളവ്യ ചോദിച്ചു. പഞ്ചാബ് ഉൾപ്പെടെയുള്ള സംസ്ഥാനങ്ങളിൽ കോൺഗ്രസ് ആഭ്യന്തര വെല്ലുവിളികൾ നേരിടുമ്പോഴും നിർണ്ണായകമായ പാർലമെന്റ് സമ്മേളനം അടുത്തെത്തിയിരിക്കുമ്പോഴും ഉത്തരവാദപ്പെട്ട നേതാവ് പൊതുരംഗത്തുനിന്ന് മാറിനിൽക്കുന്നത് ജനാധിപത്യത്തോട് കാണിക്കുന്ന അനാദരവാണെന്നാണ് ബിജെപി വ്യക്തമാക്കുന്നത്.
