ഡൽഹിയിലെ വിദ്യാർഥി പ്രക്ഷോഭവുമായി ബന്ധപ്പെട്ട പ്രതികരണത്തിന് പിന്നാലെ നടി പേളി മാണിയും പ്രമുഖ സംവിധായകൻ സിബി മലയിലിന്റെ മകൻ ജോ സിബി മലയിലും തമ്മിലുള്ള സോഷ്യൽ മീഡിയ പോര് പുതിയ തലത്തിലേക്ക്. പേളി നടത്തിയ ‘പരാജയപ്പെട്ട സംവിധായകൻ’ (Failed Filmmaker) എന്ന പരാമർശത്തിനെതിരെ രൂക്ഷമായ മറുപടിയുമായി രംഗത്തെത്തിയിരിക്കുകയാണ് ജോ സിബി മലയിൽ.
ഡൽഹിയിൽ നടക്കുന്ന സമരം അക്രമങ്ങളിലേക്ക് വഴിമാറരുതെന്നും ജീവനാണ് വലുതെന്നും വ്യക്തമാക്കി പേളി മാണി നേരത്തെ ദീർഘമായൊരു കുറിപ്പ് പങ്കുവെച്ചിരുന്നു. എന്നാൽ സമരം ചെയ്യുന്ന വിദ്യാർഥികളോട് വീട്ടിലേക്ക് മടങ്ങാൻ ആവശ്യപ്പെട്ടതും ഭരണകൂടത്തിന്റെ നിലപാടിനെ ചോദ്യം ചെയ്യാതിരുന്നതും ചൂണ്ടിക്കാട്ടി ജോ സിബി മലയിൽ പേളിയുടെ നിലപാടിനെ’ വിമർശിച്ചിരുന്നു. ഇതിനു മറുപടിയായാണ് പേളി ഇൻസ്റ്റഗ്രാം സ്റ്റോറിയിലൂടെ പരിഹാസരൂപേണ പ്രതികരിച്ചത്.
“എന്റെ 4 പേജ് പോസ്റ്റിനെക്കുറിച്ച് ഒരു ഫെയിൽഡ് ഫിലിം മേക്കർ 10 പേജ് സ്ക്രിപ്റ്റ് എഴുതുകയാണ്. അതിൽ മുളകുപൊടിയും അജിനോമോട്ടോയും ചേർത്ത് ആക്കുകയാണ്” എന്നായിരുന്നു പേളി കുറിപ്പിൽ പരിഹസിച്ചത്. ഇതോടെയാണ് പേളി ലക്ഷ്യമിട്ടത് തന്റെ പിതാവിനെയാണെന്ന് വ്യക്തമാക്കി ജോ വീണ്ടും രംഗത്തെത്തിയത്. “ആ ഫെയിൽഡ് ഫിലിം മേക്കർ എന്റെ അച്ഛനാണ്. ആ അച്ഛൻ വളർത്തിയത് നട്ടെല്ലില്ലാത്ത മകനെയല്ല. അദ്ദേഹത്തിന്റെ പേര് സിബി മലയിൽ എന്നാണ്” എന്ന് വ്യക്തമാക്കിയ ജോ, പേളിയുടെ കുറിപ്പിലെ പക്വതയില്ലായ്മയെയും നിഷ്പക്ഷത നടിക്കലിനെയും രൂക്ഷമായി വിമർശിച്ചു.
മലയാള സിനിമയിലെ എക്കാലത്തെയും മികച്ച ക്ലാസിക് ചിത്രങ്ങളായ കിരീടം, ഭരതം, ദശരഥം, കമലദളം, ആകാശദൂത് തുടങ്ങിയ മാസ്റ്റർപീസുകൾ സമ്മാനിച്ച സിബി മലയിലിനെ കുറിച്ച് പേളി നടത്തിയ പരാമർശം തികച്ചും വ്യക്തിപരമായ അധിക്ഷേപമാണെന്ന് കാണിച്ച് വലിയ രീതിയിലുള്ള സൈബർ പ്രതിഷേധമാണ് ഉയരുന്നത്. സോഷ്യൽ മീഡിയയിൽ വിമർശനം കടുത്തതോടെ താൻ പങ്കുവെച്ച കുറിപ്പും സ്റ്റോറിയും പേളി പിൻവലിച്ചെങ്കിലും ഇരുവിഭാഗം ആരാധകരും തമ്മിലുള്ള പോര് കനക്കുകയാണ്.
