വരാണസി: പ്രധാനമന്ത്രി നരേന്ദ്ര മോദി ഉത്തര്പ്രദേശിയിലെ വരാണസിയില് നാമനിര്ദേശ പത്രിക സമര്പ്പിച്ചു.ഒരു ക്രിമിനല് കേസും മോദിയുടെ പേരിലില്ലെന്ന് സത്യവാങ്മൂലത്തില് പറയുന്നു.1978ല് ഡല്ഹി സര്വകലാശാലയില് നിന്ന് ബിഎ ബിരുദവും 1983ല് ഗുജറാത്ത് സര്വകലാശാലയില് നിന്ന് ബിരുദാനന്തര ബിരുദവും നേടിയിട്ടുണ്ടെന്ന് ഇന്ന് സമര്പ്പിച്ച സത്യവാങ്മൂലത്തില് പറയുന്നു.
2.51 കോടിയുടെ ആസ്തിയുണ്ട്. 1.41 കോടിയുടെ ജംഗമസ്വത്തും 1.1 കോടിയുടെ സ്ഥാവര സ്വത്തും അടങ്ങിയതാണ് ആസ്തി. ശമ്പളവും നിക്ഷേപത്തില് നിന്നുള്ള പലിശയുമാണ് അദ്ദേഹത്തിന്റെ പ്രധാന വരുമാന മാര്ഗം.സ്വന്തമായി ഭൂമിയോ വാണിജ്യ കെട്ടിടങ്ങളോ ഉള്ളതായി സത്യവാങ്മൂലത്തില് കാണിച്ചിട്ടില്ല. ഗാന്ധി നഗറിലുള്ള വീടിന്റെ 25 ശതമാനമാണ് അദ്ദേഹത്തിന് അവകാശപ്പെട്ടത്. ഇതിന് 1.10 കോടി രൂപ വില കണക്കാക്കുന്നു. ഏതെങ്കിലും തരത്തിലുള്ള ബാധ്യതയോ ലോണുകളോ അദ്ദേഹത്തിന്റെ പേരിലില്ല.
38,750 രൂപയാണ് കൈയില് പണമായുള്ളത്. 4143 രൂപ ബാങ്ക് അക്കൗണ്ടിലുണ്ട്. എസ്.ബി.ഐയില് ഫിക്സഡ് നിക്ഷേപമായി 1.27 കോടി രൂപയുണ്ട്. കൂടാതെ 20000 രൂപയുടെ ബോണ്ടും എന്.എസ്.സി (നാഷണല് സേവിങ് സര്ട്ടിഫിക്കറ്റ്) യില് 7.61 ലക്ഷം രൂപയുമുണ്ട്. 1.90 ലക്ഷം രൂപയുടെ രണ്ട് ഇന്ഷൂറന്സ് പോളിസിയാണ് മോദിക്കുള്ളത്.
1.13 ലക്ഷം രൂപ വിലമതിക്കുന്ന നാല് സ്വര്ണ്ണ മോതിരങ്ങള് അദ്ദേഹത്തിനുണ്ട്. വിപുലമായ റോഡ് ഷോയോടെ ഇന്നാണ് വരാണസിയില് സത്യവാങ്മൂലം സമര്പ്പിച്ചത്.
Discussion about this post