തിരുവനന്തപുരം : തദ്ദേശ തിരഞ്ഞെടുപ്പില്‍ സ്ഥാനാര്‍ഥികളായി എസ്എന്‍ഡിപി യോഗം പ്രവര്‍ത്തകരെ ബിജെപി പരിഗണിക്കുമെന്നു സൂചന. സ്ഥാനാര്‍ഥികളെക്കുറിച്ചു പാര്‍ട്ടി ആലോചന തുടങ്ങി. പാര്‍ട്ടിക്കു സാധ്യത കൂടുതലുള്ള സ്ഥലങ്ങളില്‍ പാനല്‍ തയാറാക്കല്‍ ആരംഭിച്ചു. 17നു സംസ്ഥാന നേതൃയോഗം തിരഞ്ഞെടുപ്പിന്റെ മറ്റു കാര്യങ്ങള്‍ തീരുമാനിക്കും. കേന്ദ്രമന്ത്രി സദാനനന്ദ ഗൗഡ യോഗത്തില്‍ പങ്കെടുക്കും.
ജയസാധ്യതയുള്ള വാര്‍ഡുകള്‍, ശ്രമിച്ചാല്‍ ജയിക്കാവുന്നവ, സാധ്യത കുറഞ്ഞവ എന്നിങ്ങനെ മൂന്നായി തദ്ദേശവാര്‍ഡുകളെ ബിജെപി തരംതിരിച്ചിട്ടുണ്ട്. ബിജെപി കേന്ദ്രനേതൃത്വം മുന്‍കയ്യെടുത്ത് എസ്എന്‍ഡിപിയുമായി നടത്തിയ ചര്‍ച്ചകള്‍ പഞ്ചായത്തു തിരഞ്ഞെടുപ്പില്‍ പ്രതിഫലിപ്പിക്കാനുള്ള തീരുമാനത്തിലാണു സംസ്ഥാന നേതൃത്വം.
സ്ഥാനാര്‍ഥി നിര്‍ണയത്തിലടക്കം ഇതു കണക്കിലെടുക്കും. കെപിഎംഎസ് പ്രവര്‍ത്തകരുമായും ഇതുപോലെ ബന്ധമുണ്ടാക്കാന്‍ ശ്രമമുണ്ട്. കെപിഎംഎസ് നേതാക്കളും ബിജെപി ദേശീയ അധ്യക്ഷന്‍ അമിത് ഷായെ കണ്ടിരുന്നു. ഇതാദ്യമായി മുഴുവന്‍ വാര്‍ഡിലും മല്‍സരിക്കാനുള്ള തീരുമാനത്തിലാണു ബിജെപി. ഏതാനും സീറ്റുകള്‍ എന്‍ഡിഎ ഘടകകക്ഷികള്‍ക്കും നീക്കിവയ്ക്കും. വിവിധ കക്ഷികള്‍, ഗ്രൂപ്പുകള്‍, വ്യക്തികള്‍ എന്നിവരെ തിരഞ്ഞെടുപ്പിനു മുന്‍പായി ബിജെപി പാളയത്തില്‍ എത്തിക്കാനുള്ള നീക്കവും ആരംഭിച്ചിട്ടുണ്ട്. ഇതിനായി രൂപീകരിച്ച സമിതി ആദ്യവട്ട ചര്‍ച്ചകള്‍ ആരംഭിച്ചു.
Discussion about this post