നെഞ്ചുവേദനയെ തുടര്‍ന്ന് കൊല്‍ക്കത്തയിലെ ആശുപത്രിയില്‍ പ്രവേശിപ്പിച്ച ബിസിസിഐ പ്രസിഡന്റും മുന്‍ ഇന്ത്യന്‍ ക്രിക്കറ്റ് ടീം ക്യാപ്റ്റനുമായ സൗരവ് ഗാംഗുലിയുടെ ആരോഗ്യനില തൃപ്തികരമാണെന്ന് ആശുപ്രതി അധികൃതര്‍. പ്രധാന പരിശോധനകളിലെ ഫലങ്ങളില്‍ പ്രശ്നങ്ങളില്ലെന്ന് അപ്പോളോ ഗ്ലെനിഗില്‍സ് ആശുപത്രി വാര്‍ത്താക്കുറിപ്പില്‍ വ്യക്തമാക്കി .
വ്യാഴാഴ്ച ഗാംഗുലിയെ ആന്‍ജിയോഗ്രഫിക്ക് വിധേയനാക്കുമെന്ന് മുതിര്‍ന്ന ഡോക്ടര്‍ അറിയിച്ചു.
കേന്ദ്ര ആഭ്യന്തര മന്ത്രി അമിത് ഷാ ഗാംഗുലിയുടെ ആരോഗ്യസ്ഥിതി വിലയിരുത്തി.
48കാരനായ ഗാംഗുലിക്ക് ചൊവ്വാഴ്ച വൈകിട്ട് മുതല്‍ ദേഹാസ്വാസ്ഥ്യം അനുഭവപ്പെട്ടിരുന്നതായി കുടുംബവൃത്തങ്ങള്‍ അറിയിച്ചു.
ബുധനാഴ്ച, ഇസിജിയില്‍ ചെറിയ വ്യതിയാനം കാണിച്ചതോടെയാണ് ആശുപത്രിയില്‍ പ്രവേശിപ്പിച്ചത്. ഈ മാസമാദ്യം ഹൃദയാഘാതം ഉണ്ടായതിനെ തുടര്‍ന്ന് അദ്ദേഹത്തെ ആന്‍ജിയോപ്ലാസ്റ്റിക്ക് വിധേയനാക്കിയിരുന്നു.
അഞ്ചുദിവസത്തെ ആശുപത്രിവാസത്തിനുശേഷം ജനുവരി 7നാണ് അദ്ദേഹം ആശുപത്രി വിട്ടത്. സൗരവ് ഗാംഗുലിക്ക് വീണ്ടും ആന്‍ജിയോപ്ലാസ്റ്റി നടത്തേണ്ടി വരുമെന്ന് ഡോക്ടര്‍മാര്‍ നേരത്തെ അറിയിച്ചിരുന്നു. ഹൃദയധമനികളില്‍ മൂന്നിടത്ത് തടസ്സം കണ്ടെത്തിയിരുന്നു.
ഭാര്യ ഡോണ, സഹോദരന്‍ സ്നേഹസിഷ് ഗാംഗുലി എന്നിവര്‍ ആശുപത്രിയില്‍ അദ്ദേഹത്തോടൊപ്പമുണ്ട്.
Discussion about this post