ഡല്‍ഹി:ഡല്‍ഹി കൂട്ടമാനഭംഗ കേസ് പ്രതിയുടെ അഭിമുഖം എടുക്കാന്‍ എത്തിയ ബ്രിട്ടീഷ് മാധ്യമ പ്രവര്‍ത്തക ലസ്‌ലി ഉഡ്‌വിനെ ജയിലനികത്തേക്ക് കടത്തിയത് മാനദണ്ഡങ്ങള്‍ പാലിക്കാതെ. ആഭ്യന്തര വകുപ്പ് 2012ല്‍ പുറത്തിറക്കിയ സര്‍ക്കുലറില്‍ ഇന്ത്യന്‍ ജയിലുകളില്‍ വിദേശികളുടെ സന്ദര്‍ശനം നിയന്ത്രിക്കുന്നതിനായി നിഷ്‌ക്കര്‍ഷിച്ച ചട്ടങ്ങള്‍ ലംഘിക്കപ്പെട്ടുവെന്നാണ് ആക്ഷേപം. മാധ്യമപ്രവര്‍ത്തകര്‍, ക്രിമിനോളജിസ്റ്റുകള്‍, എംബസി ഉദ്യോഗസ്ഥര്‍ എന്നിങ്ങനെ എല്ലാവര്‍ക്കും ബാധകമായ ചട്ടങ്ങള്‍ ലംഘിക്കപ്പെട്ടുവെന്നാണ് വിമര്‍ശനം.
ജയില്‍ സന്ദര്‍ശിക്കുന്നതിന്റെ ഉദ്ദേശ്യം, സന്ദര്‍ശകരുടെ പശ്ചാത്തല വിവരങ്ങള്‍ എന്നിവയെല്ലാം കര്‍ശനമായി പരിശോധിച്ചതിന് ശേഷമേ സന്ദര്‍ശനം അനുവദിക്കാവൂ എന്നാണ് സര്‍ക്കുലര്‍ വ്യക്തമാക്കുന്നത്.
എന്നാല്‍ സംവിധായിക ലസ്‌ലി ഉഡ്‌വിനെ സംബന്ധിച്ചുള്ള വിവരങ്ങള്‍ക്കായി ഇന്റലിജന്‍സ് ബ്യൂറോ, രഹസ്യാന്വേഷണ ഏജന്‍സിയായ റിസര്‍ച്ച് ആന്‍ഡ് അനാലിസിസ് വിംങ് (റോ), ഡല്‍ഹി പൊലീസ് എന്നിവരുമായി ജയില്‍ അധികൃതര്‍ ബന്ധപ്പെട്ടിട്ടില്ലെന്ന് പ്രാഥമിക അന്വേഷണത്തില്‍ വ്യക്തമായിട്ടുണ്ട്.
കേസിലെ പ്രതി അഭിമുഖ സമയത്ത് ധരിച്ച വേഷവും വിവാദമായിട്ടുണ്ട്. പ്രതി മുകേഷ് സിങ് സാധാരണ വേഷത്തിലാണ് അഭിമുഖം നടത്തുന്നത്. ഇയാള്‍ എങ്ങനെ സാധാരണ വേഷത്തില്‍ പ്രത്യക്ഷപ്പെട്ടു എന്നത് സംബന്ധിച്ചും കേന്ദ്ര ആഭ്യന്തര വകുപ്പ് അന്വേഷണം ആരംഭിച്ചിട്ടുണ്ട്. ഏതൊരു പ്രതിയും ജയിലിനകത്ത് അനുവദിച്ചിട്ടുള്ള വേഷം മാത്രമേ ഉപയോഗിക്കാവൂ എന്നാണ് നിയമം പറയുന്നത്.
ഇതിനിടെ അഭിമുഖത്തിനായി മുകേഷ് സിംഗ് വന്‍തുക വാങ്ങിയെന്ന വിമര്‍ശനം സോഷ്യല്‍ മീഡിയകളില്‍ ഉയരുന്നുണ്ട്. അഭിമുഖത്തിന് 1.5 ലക്ഷം രൂപ പ്രതിഫലം ആവശ്യപ്പെട്ടു. സംവിധായിക ആവശ്യപ്പെട്ടത് പറയാനായി 40000 രൂപ അധികമായി വാങ്ങിയെന്നും ആരോപണമുണ്ട്.
ബലാത്സംഗത്തിനിരയായ പെണ്‍കുട്ടിയെ കുറ്റപ്പെടുത്തുന്ന വിവാദ പ്രസ്താവന ഇത്തരത്തില്‍ ചിത്രീകരിച്ചവരുടെ പ്രലോഭനത്തിന് വഴങ്ങി പറഞ്ഞതാണെന്ന ചര്‍ച്ചകളും സോഷ്യല്‍ മീഡിയകളില്‍ സജീവമാണ്.
Discussion about this post