തിരുവനന്തപുരം: സി.പി.എം. സംസ്ഥാനസെക്രട്ടറി കോടിയേരി ബാലകൃഷ്ണന്‍, പാര്‍ട്ടിനേതാക്കളായ പി. ജയരാജന്, ഇ.പി. ജയരാജന് എന്നിവരുടെ ജീവന് ഭീഷണി നിലനില്‍ക്കുന്നതായി ഇന്റലിജന്‍സ് റിപ്പോര്‍ട്ട്. മുസ്ലിംലീഗ്, എസ്.ഡി.പി.ഐ., ആര്‍.എസ്.എസ്. ഉള്‍പ്പെടെയുള്ള സംഘപരിവാര്‍ സംഘടനകള്‍ എന്നിവയില്‍നിന്നുള്ള ഭീഷണി നേരിടുന്ന സി.പി.എം. കണ്ണൂര്‍ ജില്ലാസെക്രട്ടറി പി. ജയരാജനെപ്പറ്റി റിപ്പോര്‍ട്ടില്‍ പ്രത്യേക പരാമര്‍ശമാണുള്ളത്.
ഇദ്ദേഹത്തിന് ഇപ്പോള്‍ നല്‍കിവരുന്ന വൈ പ്ലസ് സുരക്ഷ തുടരണം. ഇന്റലിജന്‍സ് മേധാവി മുഹമ്മദ് യാസിന്‍ തയ്യാറാക്കിയ റിപ്പോര്‍ട്ട് ആഭ്യന്തരവകുപ്പിന് കൈമാറി.
കോടിയേരി ബാലകൃഷ്ണനും ഇ.പി. ജയരാജനും പോപ്പുലര്‍ ഫ്രണ്ടിന്റെ ഭീഷണി ഉള്ളതായി റിപ്പോര്‍ട്ടില്‍ പറയുന്നു. കോടിയേരിക്ക് ഇസഡ് കാറ്റഗറി സുരക്ഷയും മുന്‍മന്ത്രി ഇ.പി. ജയരാജന് എക്‌സ് കാറ്റഗറി സുരക്ഷയും തുടരണമെന്ന് റിപ്പോര്‍ട്ട് ശുപാര്‍ശ ചെയ്യുന്നു. രാജ്യസഭാ ഉപാധ്യക്ഷന്‍ പി.ജെ. കുര്യന് സൂര്യനെല്ലി കേസുമായി ബന്ധപ്പെട്ട് ഭീഷണി നിലനില്ക്കുന്നു. ഇദ്ദേഹത്തിനുള്ള വൈ കാറ്റഗറി സുരക്ഷ തുടരണം.
ബി.ജെ.പി. നേതാക്കളായ എം.ടി. രമേശ്, സി.കെ. പത്മനാഭന്‍, കെ. സുരേന്ദ്രന്‍ എന്നിവര്‍ക്ക് രാഷ്ട്രീയ എതിരാളികളില്‍നിന്ന് ഭീഷണി നിലനില്ക്കുന്നു. ഇവര്‍ക്ക് എക്‌സ് കാറ്റഗറി സുരക്ഷ തുടരണം. എം.ടി. രമേശിന് പോപ്പുലര്‍ ഫ്രണ്ട്, എസ്.ഡി.പി.ഐ., പി.ഡി.പി. തുടങ്ങിയ സംഘടനകളില്‍നിന്നാണ് ഭീഷണിയുള്ളത്.
എക്‌സ് കാറ്റഗറി സുരക്ഷ നിലവിലുണ്ടെങ്കിലും ബി.ജെ.പി. അധ്യക്ഷന്‍ കുമ്മനം രാജശേഖരനും ഒ. രാജഗോപാല്‍ എം.എല്‍.എ.യ്ക്കും സുരക്ഷാഭീഷണികള്‍ ഇല്ല.
ഇസഡ് കാറ്റഗറി സുരക്ഷയുള്ള മുന്‍ കേന്ദ്രമന്ത്രിയും കോണ്‍ഗ്രസ് നേതാവുമായ എ.കെ. ആന്റണിക്ക് ഭീഷണികള്‍ ഇല്ലെന്നും അദ്ദേഹത്തിന്റെ സുരക്ഷ വൈ കാറ്റഗറിയിലേക്ക് കേന്ദ്രസര്‍ക്കാര്‍ മാറ്റിയിട്ടുണ്ടെന്നും റിപ്പോര്‍ട്ടില്‍ പറയുന്നു. മുന്‍ കേന്ദ്രമന്ത്രി മുല്ലപ്പള്ളി രാമചന്ദ്രന് ടി.പി. ചന്ദ്രശേഖരന്‍ വധക്കേസിന്റെ അന്വേഷണവുമായി ബന്ധപ്പെട്ട് രാഷ്ട്രീയ എതിരാളികളില്‍നിന്ന് ഭീഷണി നിലനില്ക്കുന്നു. മുല്ലപ്പള്ളിക്കൊപ്പം എക്‌സ് കാറ്റഗറി സുരക്ഷയുള്ള മുന്‍ കേന്ദ്രമന്ത്രിമാരായ കെ.വി. തോമസ്, വയലാര്‍ രവി എന്നിവര്‍ക്ക് ഭീഷണികളില്ലെങ്കിലും സുരക്ഷ പിന്‍വലിക്കേണ്ടതില്ല.
എം.എല്‍.എ.മാരായ ഐ.സി. ബാലകൃഷ്ണന്‍, സി.കെ. ശശീന്ദ്രന്‍ എന്നിവര്‍ക്ക് മാവോവാദികളുടെ ഭീഷണിയുണ്ട്. എക്‌സ് കാറ്റഗറി സുരക്ഷയുള്ള രാഷ്ട്രീയനേതാക്കളായ കെ.ആര്‍. ഗൗരിയമ്മ, വി.എം. സുധീരന്‍, പി.പി. തങ്കച്ചന്‍, പി.ജെ. ജോസഫ്, ഇബ്രാഹിംകുഞ്ഞ്, കുട്ടി അഹമ്മദ്കുട്ടി, എം.കെ. മുനീര്‍, പി.കെ. അബ്ദുറബ്ബ് എന്നിവര്‍ക്ക് ഭീഷണിയില്ല. ഇന്റലിജന്‍സ് റിപ്പോര്‍ട്ട് ചര്‍ച്ച ചെയ്യുന്നതിനും ഭീഷണിനേരിടുന്ന നേതാക്കളുടെ സുരക്ഷാക്രമീകരണങ്ങള്‍ അവലോകനം ചെയ്യുന്നതിനും ചൊവ്വാഴ്ച ലോക്‌നാഥ് ബെഹ്‌റ ഉന്നതപോലീസ് ഉദ്യോഗസ്ഥരുടെ യോഗം വിളിച്ചുചേര്‍ത്തിരുന്നു.
മുഖ്യമന്ത്രി പിണറായി വിജയന്റെ സുരക്ഷയെക്കുറിച്ച് റിപ്പോര്‍ട്ടില്‍ പരാമര്‍ശമില്ല. ഇസഡ് കാറ്റഗറി സുരക്ഷയാണ് മുഖ്യമന്ത്രിക്കുള്ളത്.
Discussion about this post