കൊണ്ടോട്ടി: മലപ്പുറം, കോഴിക്കോട്, വയനാട് ജില്ലകളിലെ ക്ഷേത്രങ്ങളില്‍ നിന്നു വിഗ്രഹങ്ങള്‍ മോഷ്ടിച്ച മോഷ്ടാക്കള്‍ പിടിയില്‍. മലപ്പുറം, കോഴിക്കോട്, ജില്ലകളിലെ മൂന്നു ക്ഷേത്രങ്ങളില്‍ നിന്ന് 15 വര്‍ഷങ്ങള്‍ക്കുമുമ്പ് മോഷ്ടിച്ച പഞ്ചലോഹ വിഗ്രഹങ്ങളും വയനാട്ടില്‍ നിന്നു മോഷ്ടിച്ച ഒന്നര നൂറ്റാണ്ട് പഴക്കമുള്ള രണ്ടു ജൈനമതവിഗ്രഹങ്ങളുമായി നാലുപേരാണ് കൊണ്ടോട്ടിയില്‍ പിടിയിലായത്. കൊണ്ടോട്ടി മുതുവല്ലൂര്‍ ആക്കത്തൊടി മുഹമ്മദലി(43), കുഴിമണ്ണ പുളിയക്കോട് ആക്കപ്പറമ്പ് മാരത്തില്‍ മുഹമ്മദ്(45), പുളിയക്കോട് പട്ടക്കണ്ടത്തില്‍ ബാബു(45), കൊണ്ടോട്ടി നീറാട് എളക്കുത്ത് ജൈസല്‍(35) എന്നിവരെയാണു കൊണ്ടോട്ടി പോലീസ് അറസ്റ്റ് ചെയ്തത്.
ജൈനമതവിഗ്രഹങ്ങള്‍ കണ്ടെടുക്കുമ്പോള്‍ മുറിച്ചെടുത്തനിലയിലായിരുന്നു. വയനാടിനു പുറമെ കോഴിക്കോട് പെരുവയല്‍ കോട്ടയാട്ട് ഭഗവതിക്ഷേത്രം, മലപ്പുറം പുളിയക്കോട് മുണ്ടക്കല്‍ കരിങ്കാളി ക്ഷേത്രം എന്നിവിടങ്ങളിലും പ്രതികള്‍ ഇക്കാലയളവില്‍ മോഷണം നടത്തിയതായി പോലീസ് കണ്ടെത്തി. കേസിലെ മറ്റൊരു പ്രതി നീറാട് തേനുട്ടിക്കല്ലിങ്ങല്‍ അബൂബക്കര്‍(43) കൊലക്കുറ്റത്തിനു ജയില്‍ശിക്ഷ അനുഭവിച്ചു വരികയാണ്.
2002 ഡിസംബര്‍ 13നു വയനാട് പുളിയാര്‍മല എം.പി. വീരേന്ദ്രകുമാര്‍ ട്രസ്റ്റിയായ അനന്തനാഥസ്വാമി ക്ഷേത്രത്തിലാണു പ്രതികള്‍ കവര്‍ച്ച നടത്തി വിഗ്രങ്ങള്‍ മോഷ്ടിച്ചത്. കേരളത്തിലെ 1500 വര്‍ഷത്തോളം പഴക്കമുള്ള ജൈനക്ഷേത്രത്തില്‍ 1933-ല്‍ പുന:പ്രതിഷ്ഠ നടത്തിയ പത്മാവതിദേവിയുടെയും ജ്വാലാമിലിനി ദേവിയുടെയും പീഠവും പ്രഭാമണ്ഡലങ്ങളും ഉള്‍പ്പെടുന്ന രണ്ടു പഞ്ചലോഹ വിഗ്രഹങ്ങള്‍, രണ്ടു തീര്‍ഥങ്കരന്മാരുടെ പിച്ചള വിഗ്രങ്ങള്‍, പഞ്ചപരമേഷ്ടി വിഗ്രഹം, നവദേവന്മാരുടെ വിഗ്രഹം, മൂന്നു വെള്ളി പൂജാപാത്രങ്ങള്‍, വിഗ്രഹത്തിലണിയിച്ച സ്വര്‍ണാഭരണങ്ങള്‍ എന്നിവയാണ് ഇവിടെ നിന്നു മോഷ്ടിച്ചത്. ഇതില്‍ രണ്ടു വിഗ്രഹങ്ങള്‍ അമൂല്യമാണ്. ശ്രീകോവിലിന്റെ പൂട്ടുപൊളിച്ച് പിക്കാസ് കൊണ്ടു കൊത്തിയിളക്കിയാണു സംഘം കവര്‍ച്ച നടത്തിയത്.
സംഭവവുമായി ബന്ധപ്പെട്ടു കല്‍പ്പറ്റ പോലീസ് കേസെടുത്തു അന്വേഷണത്തിന് പ്രത്യേകസംഘത്തെ നിയോഗിച്ചിരുന്നു. ഇതിനിടെ ഇവര്‍ക്കു വിഗ്രഹങ്ങള്‍ വിദേശത്തേക്കു കടത്താന്‍ കഴിഞ്ഞിരുന്നില്ല. 15 വര്‍ഷത്തിനിടെ സംഘം പലതവണ വില്‍പ്പനക്കായി വിദേശികളെ അടക്കം നാട്ടിലെത്തിച്ചെങ്കിലും ഇടപാട് നടന്നില്ല. ഇതോടെ വിഗ്രഹം മുറിച്ചുവില്‍ക്കാനും വിഗ്രഹത്തില്‍നിന്നു സ്വര്‍ണം ഉരുക്കി വേര്‍തിരിച്ചെടുക്കാനും ശ്രമം നടത്തി. ഇതും വിജയിക്കാതെ വന്നതോടെ പുതിയ സംഘത്തിനു വില്‍പ്പന നടത്താന്‍ ശ്രമം നടത്തുന്നതിനിടെയാണു പോലീസിനു രഹസ്യവിവരം ലഭിച്ചത്. തുടര്‍ന്നു പോലീസ് ഇടനിലക്കാരായി എത്തിയാണു പ്രതികളെ പിടികൂടിയത്.
പ്രതി മാരത്തില്‍ മുഹമ്മദിന്റെ പറമ്പില്‍ കുഴിച്ചിട്ട നിലയിലായിരുന്നു രണ്ടു വിഗ്രഹങ്ങള്‍. ഇവയും മുറിച്ചെടുത്ത നിലയിലായിരുന്നു. എട്ടു വിഗ്രഹങ്ങള്‍ ഇവര്‍ മോഷ്ടിച്ചിട്ടുണ്ടെന്നാണു പേലീസ് അന്വേഷണത്തില്‍ കണ്ടെത്തിയത്. മലപ്പുറം കോടതിയില്‍ ഹാജരാക്കിയ പ്രതികളെ തുടരന്വേഷണത്തിന് കസ്റ്റഡിയില്‍ വാങ്ങും.
Discussion about this post