ബംഗാളില്‍ സമരം ചെയ്യുന്ന ഡോക്ടര്‍മാര്‍ക്ക് ഐക്യദാര്‍ഢ്യം പ്രഖ്യാപിച്ച് കൊണ്ട് രാജ്യവ്യാപകമായി തിങ്കളാഴ്ച ഡോക്ടര്‍മാര്‍ പണിമുടക്ക് നടത്തും . ബംഗാളിലെ ഡോക്ടര്‍മാരുടെ സമരം നാലാം ദിവസത്തേക്ക് കടക്കുമ്പോഴാണ് സമരം രാജ്യവ്യാപകമാകുന്നത്. ഐ.എം.എ യാണ് രാജ്യവ്യാപക പണിമുടക്ക് പ്രഖ്യാപിച്ചിരിക്കുന്നത്. ഡോക്ടര്‍മാര്‍ക്ക് എതിരെയുള്ള ആക്രമണങ്ങള്‍ തടയുന്നതിനായി കേന്ദ്രനിയമം കൊണ്ട് വരണമെന്ന് പ്രധാനമന്ത്രിയോടും കേന്ദ്ര അഭ്യന്തര മന്ത്രിയോടും ഐ.എം.എ ആവശ്യപ്പെട്ടു.
രോഗി മരിച്ചതിനെ തുടര്‍ന്ന് കൊല്‍ക്കത്തയിലെ സര്‍ക്കാര്‍ ആശുപത്രിയിലെ ജൂനിയര്‍ ഡോക്ടറെ ബന്ധുക്കള്‍ ആക്രമിച്ചതുമായി ബന്ധപ്പെട്ടാണ് ചൊവ്വാഴ്ച മുതല്‍ ഡോക്ടര്‍മാര്‍ സമരം നടത്തുന്നത്.
നിലവില്‍ സര്‍ക്കാര്‍ ആശുപത്രികളിലെ അത്യാഹിത വിഭാഗങ്ങള്‍ മാത്രമാണ് ഇപ്പോള്‍ പ്രവര്‍ത്തിക്കുന്നത്. ഡല്‍ഹി , മുംബൈ , ഹൈദരാബാദ് എന്നിവിടങ്ങളിലും സമരത്തിന് പിന്തുണയുമായി ഡോകടര്‍മാര്‍ രംഗത്തുണ്ട്. സമരത്തിന് ഇതുവരെ പരിഹാരം കാണുവാന്‍ ശ്രമിക്കാത്ത ബംഗാള്‍ സര്‍ക്കാരിന്റെ നടപടിയില്‍ പ്രതിഷേധിച്ച് സംസ്ഥാനത്തെ വിവിധ ഭാഗങ്ങളില്‍ ഡോക്ടര്‍മാരുടെ രാജി തുടരുകയാണ്.
Discussion about this post