തിരുവനന്തപുരം ഭരതന്നൂരില്‍ പത്ത് വര്‍ഷം മുന്‍പുള്ള ദുരൂഹമരണക്കേസ് തെളിയിക്കാന്‍ കൂടത്തായി മാതൃകയില്‍ കുഴിമാടം തുറന്ന് പരിശോധിക്കുന്നു. ഏഴാം ക്ളാസ് വിദ്യാര്‍ത്ഥിയെ കുളത്തില്‍ മരിച്ച നിലയില്‍ കണ്ടെത്തിയത് കൊലപാതകമാണെന്ന് തെളിഞ്ഞതോടെയാണ് ക്രൈംബ്രാഞ്ച് നടപടി. പോസ്റ്റുമോര്‍ട്ടം ഉള്‍പ്പെടെ ആദ്യഘട്ട അന്വേഷണത്തില്‍ വീഴ്ചകള്‍ സംഭവിച്ചതിനാല്‍ തിങ്കളാഴ്ച മൃതദേഹം പുറത്തെടുത്ത് റീ പോസ്റ്റുമോര്‍ട്ടവും ഫൊറന്‍സിക് പരിശോധനകളും നടത്തും.
2009 ഏപ്രില്‍ 5, അന്ന് വൈകിട്ട് പാല് വാങ്ങാനായി അടുത്ത കടയിലേക്ക് പോയ ആദര്‍ശിനെ പിന്നീട് കണ്ടെത്തുന്നത് വഴിയരുകിലെ ഒരു കുളത്തില്‍ മരിച്ചനിലയിലാണ്. മുങ്ങിമരണമെന്ന് പാങ്ങോട് പൊലീസ് ആദ്യം തന്നെ വിധിയെഴുതി. മാസങ്ങള്‍ക്ക് ശേഷം ലഭിച്ച പോസ്റ്റുമോര്‍ട്ടം റിപ്പോര്‍ട്ടില്‍ തലയ്ക്കും സുഷുമ്ന നാഡിക്കുമേറ്റ മര്‍ദനമാണ് മരണകാരണമെന്ന് കണ്ടതോടെയാണ് പരാതി ഉയരുന്നത്.
കൊലപാതകമെന്ന് സ്ഥിരീകരിക്കാനുള്ള. ക്രൈംബ്രാഞ്ചിന്റെ കണ്ടെത്തലുകള്‍ ഇവയാണ്. ശ്വാസകോശത്തിലടക്കം വെള്ളം കയറിയിട്ടില്ല, കുളത്തിന്റെ കരയില്‍ നിന്ന് കണ്ടെത്തിയ ആദര്‍ശിന്റെ വസ്ത്രത്തില്‍ നിന്ന് ബീജമുണ്ടായിരുന്നു. മരണദിവസം മഴയുണ്ടായിട്ടും വസ്ത്രങ്ങള്‍ നനഞ്ഞിരുന്നില്ല. മര്‍ദിച്ച് കൊന്നശേഷം കുളത്തിലിട്ടതാവാം എന്നാണ് നിഗമനം.ഇൌ തെളിവുകളുടെ അടിസ്ഥാനത്തിലാണ് മൃതദേഹം പുറത്തെടുത്ത് റീ പോസ്റ്റ്മോര്ട്ടം നടത്തുന്നത്.
Discussion about this post