വിഡിയോകൾ പ്രചരിപ്പിക്കാൻ ഇസ്‌ലാമിക് സ്റ്റേറ്റ് ഭീകരർ ടിക് ടോക്ക് ഉപയോഗിക്കുന്നുവെന്ന് റിപ്പോർട്ട്. ഇത്തരം ചില വിഡിയോകളും അക്കൗണ്ടും നീക്കം ചെയ്തതായി കമ്പനി വക്താവ് അറിയിച്ചു..
ശവങ്ങളുമായി തെരുവുകളിലൂടെ പരേഡ് ചെയ്യുന്നത്, തോക്ക് പിടിച്ചുള്ള ഇസ്‌ലാമിക് സ്റ്റേറ്റ് ഭീകരരും സ്ത്രീകളും ഉൾപ്പെടുന്ന വിഡിയോകളാണ് പ്രചരിപ്പിക്കുന്നത്. ഹ്രസ്വ വിഡിയോകളിലെ ചില ഭാഗങ്ങൾ മറയ്ക്കാൻ ഹൃദയങ്ങളും നക്ഷത്രങ്ങളും പോലുള്ള ടിക് ടോക്ക് ഫിൽട്ടറുകൾ ഉപയോഗിച്ചതായും റിപ്പോർട്ടുകളുണ്ട്.
സോഷ്യൽ മീഡിയ ഇന്റലിജൻസ് കമ്പനിയായ സ്റ്റോറിഫുൾ തിരിച്ചറിഞ്ഞ രണ്ട് ഡസൻ അക്കൗണ്ടുകളിൽ നിന്നാണ് ഐഎസ് പോസ്റ്റുകൾ വന്നതെന്നാണ് റിപ്പോർട്ട്. എന്നാൽ ടിക്ക് ടോക്ക് വിഡിയോകൾ നീക്കം ചെയ്യുകയും അവ പോസ്റ്റുചെയ്ത ഉത്തരവാദികളായ അക്കൗണ്ടുകൾ റദ്ദാക്കുകയും ചെയ്തിട്ടുണ്ട്.
പുതിയ അംഗങ്ങളെ റിക്രൂട്ട് ചെയ്യുന്നതിനും സന്ദേശം പ്രചരിപ്പിക്കുന്നതിനും ഇസ്‌ലാമിക് സ്റ്റേറ്റും മറ്റ് തീവ്രവാദ സംഘടനകളും വളരെക്കാലമായി സോഷ്യൽ മീഡിയ ഉപയോഗിക്കുന്നു. 2019 ന്റെ ആദ്യ മൂന്ന് മാസങ്ങളിൽ സംശയാസ്പദമായ 10 ലക്ഷത്തിലധികം തീവ്രവാദ വിഡിയോകൾ യുട്യൂബിൽ നിന്ന് നീക്കം ചെയ്തതായി ഗൂഗിൾ പറഞ്ഞു.
തീവ്രവാദ സംഘടനകളെ പ്രോത്സാഹിപ്പിക്കുന്ന ഉള്ളടക്കത്തിന് ഈ വേദിയിൽ ഒരിക്കലും സ്ഥാനമില്ലെന്ന് ടിക് ടോക്ക് പറഞ്ഞു. അത്തരം അക്കൗണ്ടുകളും അനുബന്ധ വിഡിയോകളും ഞങ്ങൾ കണ്ടെത്തി നിരോധിക്കുന്നുണ്ട്, സംശയാസ്പദമായ പ്രവർത്തനം മുൻ‌കൂട്ടി കണ്ടെത്തുന്നതിന് ഞങ്ങൾ എല്ലായ്‌പ്പോഴും ശക്തമായ നിയന്ത്രണങ്ങൾ വികസിപ്പിക്കുന്നുണ്ടെന്നും ഒരു ഇമെയിൽ പ്രസ്താവനയിൽ ടിക് ടോക്ക് വക്താവ് പറഞ്ഞു.
ഹ്രസ്വ പ്രചാരണ വിഡിയോകൾ പോസ്റ്റ് ചെയ്യുന്നതിനായി ഇസ്‌ലാമിക് സ്റ്റേറ്റ് തീവ്രവാദികൾ കൗമാരക്കാർക്കിടയിൽ പ്രചാരമുള്ള സോഷ്യൽ വിഡിയോ ആപ്ലിക്കേഷനായ ടിക് ടോക്കിലേക്ക് തിരിഞ്ഞതായി യുഎസ് മാധ്യമങ്ങളാണ് ആദ്യമായി റിപ്പോർട്ട് ചെയ്തത്.
Discussion about this post