കേസ് നടത്താന്‍ എജി ഓഫിസിന് താല്‍പര്യമില്ലെന്ന് ജസ്റ്റിസ് അലക്‌സാണ്ടര്‍ തോമസ്
‘എജി ഓഫിസിന്റെ കെടുകാര്യസ്ഥതയെ കുറിച്ച് അന്വേഷണം നടത്തി ചീഫ് സെക്രട്ടറി റിപ്പോര്‍ട്ട് നല്‍കണം’
‘രണ്ടാഴ്ചയ്ക്കകം റിപ്പോര്‍ട്ട് നല്‍കണമെന്നും എജി ഓഫിസ്’
‘ഇങ്ങനെ പോയാല്‍ എജി ഓഫിസ് പുനസംഘടിപ്പിക്കേണ്ടി വരും’
കൊച്ചി: അഡ്വക്കേറ്റ് ജനറലിന്റെ ഓഫീസിനെതിരെ വീണ്ടും ഹൈക്കോടതിയുടെ രൂക്ഷ വിമര്‍ശനം. കേസ് നടത്താന്‍ സര്‍ക്കാരിന് താത്പര്യമില്ലെന്ന് ജസ്റ്റിസ് അലക്‌സണ്ടര്‍ തോമസ് വാക്കാല്‍ വിമര്‍ശനം നടത്തി. എ.ജി ഓഫീസ് അടച്ചുപൂട്ടുന്നതാണ് നല്ലതെന്ന നേരത്തെ ജസ്റ്റിസ് അലക്‌സാണ്ടര്‍ തോമസ് വിമര്‍ശിച്ചത് വലിയ ചര്‍ച്ചയായിരുന്നു.
നാല് കേസുകളിലെ നടത്തിപ്പില്‍ എ.ജി ഓഫീസിന്റെ കെടുകാര്യസ്ഥതയെക്കുറിച്ച് ചീഫ് സെക്രട്ടറി അന്വേഷിച്ച് റിപ്പോര്‍ട്ട് നല്‍കണമെന്ന് ജസ്റ്റിസ് അലക്‌സാണ്ടര്‍ തോമസ് നിര്‍ദേശിച്ചു. മേലുദ്യോഗസ്ഥരോട് അഭിപ്രായം ചോദിക്കാതെ രണ്ടാഴ്ചയ്ക്കകം റിപ്പോര്‍ട്ട് തയാറാക്കി രജിസ്ട്രാര്‍ മുമ്പാകെ അറിയിക്കണമെന്നാണ് നിര്‍ദേശം.
കേസ് നടത്തിപ്പില്‍ ക്രിമിനല്‍ കെടുകാര്യസ്ഥതയാണ് ഉണ്ടാകുന്നത്. നാല് തവണ വസ്തതുകള്‍ പരിശോധിച്ച് നല്‍കാന്‍ നിര്‍ദേശിച്ചിട്ടും എ.ജി ഓഫീസ് അത് നല്‍കിയിട്ടില്ല. കോടതിയലക്ഷ്യ നടപടികളാണുണ്ടാകുന്നത്. ഇങ്ങനെ മുന്നോട്ട് പോയാല്‍ ശരിയാകില്ല. കാര്യങ്ങള്‍ കൈവിട്ടുപോകുന്ന അവസ്ഥയാണ്. ചില കേസുകളില്‍ എ.ജിക്ക് പ്രത്യേക താത്പര്യമുണ്ടെന്നും ഹൈക്കോടതി വിമര്‍ശിച്ചു. ഈ രീതിയിലാണെങ്കില്‍ എ.ജി ഓഫീസ് പുന:സംഘടിപ്പിക്കേണ്ടി വരും. കോടതിയുടെ ഉത്തരവുകള്‍ ഒന്നും പാലിക്കുന്നില്ല. ഈ രീതിയില്‍ മുന്നോട്ട് പോകുകയാണെങ്കില്‍ വിരമിച്ച സുപ്രീംകോടതി ജഡ്ജിയെ അമിക്കസ്‌ക്യൂറിയായി നിയമിച്ച് പരിശോധിക്കേണ്ടിവരുമെന്ന മുന്നറിയിപ്പും ജസ്റ്റിസ് അലക്‌സാണ്ടര്‍ തോമസ് നല്‍കി.
പയ്യന്നൂരിലെ ഭൂമിക്കേസുമായി ബന്ധപ്പെട്ട് വിജിലന്‍സുമായി അഴിമതി നിരോധന വകുപ്പ് പ്രകാരമുള്ള ഒരു കേസിലെ വാദത്തിനിടെയാണ് ജസ്റ്റിസ് അലക്‌സാണ്ടര്‍ തോമസ് വീണ്ടും എ.ജിയുടെ ഓഫീസിനെ വിമര്‍ശിച്ചത്. ഈ കേസില്‍ സര്‍ക്കാര്‍ നിലപാട് അറിയിക്കാന്‍ എജി ഓഫിസിന് കഴിയാതിരുന്നതാണ് ജസ്റ്റിസിന്റെ പരാമര്‍ശത്തിനിടയാക്കിയത്.
Discussion about this post