ഗുവാഹത്തി: ശ്രീലങ്കയ്ക്കെതിരായ ട്വെന്റി20 പരമ്പരയിലെ ഒന്നാം മത്സരം മഴയെ തുടർന്ന് ഒരു പന്ത് പോലും എറിയാനാകാതെ ഉപേക്ഷിച്ചു. കോരിച്ചൊരിയുന്ന മഴയെ അവഗണിച്ച് വന്ദേമാതരം ആലപിച്ചു കൊണ്ട് സ്റ്റേഡിയത്തിൽ തടിച്ചു കൂടിയ ആയിരക്കണക്കിന് കാണികൾക്ക് നിരാശയോടെ മടക്കം. മഴ ശമിച്ചപ്പോൾ കുറഞ്ഞ ഓവറിൽ മത്സരം നടത്താൻ സാധിക്കുമോയെന്ന് അമ്പയർമാർ പരിശോധിച്ചുവെങ്കിലും ഗ്രൗണ്ടിലെ നനവ് പ്രതീക്ഷകൾക്ക് മങ്ങലേൽപ്പിക്കുകയായിരുന്നു.
നേരത്തെ ടോസ് നേടിയ ഇന്ത്യ ആദ്യം ബൗൾ ചെയ്യാൻ തീരുമാനിച്ചിരുന്നു. മൂന്ന് മത്സരങ്ങളുടെ പരമ്പരയിലെ രണ്ടാമത്തെ മത്സരം ഏഴാം തീയതി ഇൻഡോറിൽ നടക്കും.
