ഡൽഹി: ധനമന്ത്രി നിർമ്മല സീതാരാമൻ ഇന്ന് അവതരിപ്പിച്ച കേന്ദ്രബജറ്റിൽ വിശ്വാസം പ്രകടിപ്പിച്ച് പ്രധാനമന്ത്രി നരേന്ദ്ര മോദി. ബജറ്റ് രാജ്യത്തിന്റെ അടിസ്ഥാന ആവശ്യങ്ങൾ നിറവേറ്റാൻ ഉതകുന്നതാണെന്നും ദശാബ്ദത്തിന്റെ പ്രതീക്ഷകൾക്ക് കരുത്ത് പകരുന്നതാണെന്നും അദ്ദേഹം അഭിപ്രായപ്പെട്ടു.
ഈ ബജറ്റ് വരുമാനവും നിക്ഷേപവും വർദ്ധിപ്പിക്കുമെന്നും സാമ്പത്തിക സംവിധാനത്തിന് പുത്തൻ ഊർജ്ജം പകരുമെന്നും തനിക്ക് ഉറപ്പുണ്ടെന്ന് അദ്ദേഹം പറഞ്ഞു. വിദേശ നിക്ഷേപം ആകർഷിക്കുന്നതിന് വേണ്ടി നിരവധി നികുതി പരിഷ്കരണങ്ങളും ബജറ്റിൽ ഉൾക്കൊള്ളിച്ചിട്ടുണ്ടെന്നും പ്രധാനമന്ത്രി ചൂണ്ടിക്കാട്ടി. റിയൽ എസ്റ്റേറ്റ് മേഖലയുടെയും സ്റ്റാർട്ടപ്പുകളുടെയും ഉന്നമനത്തിനായി നികുതി ഇളവുകൾ പ്രഖ്യാപിച്ചിട്ടുണ്ടെന്നും പ്രധാനമന്ത്രി വിലയിരുത്തി. ബജറ്റ് അവതരണത്തിന് ശേഷം നടത്തിയ പ്രസ്താവനയിലാണ് പ്രധാനമന്ത്രി ഇക്കാര്യങ്ങൾ വ്യക്തമാക്കിയത്.
അടിസ്ഥാനസൗകര്യ വികസനത്തിനും ബോണ്ട് മാർക്കറ്റുകൾ ശക്തിപ്പെടുത്താനും ബജറ്റിൽ പ്രഖ്യാപനങ്ങളുണ്ട്. ഈ നടപടികളൊക്കെയും സമ്പദ്ഘടനയെ ശക്തിപ്പെടുത്തുമെന്നും പുതിയ തൊഴിലവസരങ്ങൾ സൃഷ്ടിക്കാൻ ഉതകുമെന്നും പ്രധാനമന്ത്രി നരേന്ദ്ര മോദി വ്യക്തമാക്കി. രാജ്യത്തെ വിമാനത്താവളങ്ങളുടെ വികസനത്തിനായി പ്രഖ്യാപിക്കപ്പെട്ട പദ്ധതികൾ ടൂറിസം മേഖലയ്ക്ക് വളരെ മികച്ച പിന്തുണയാണ് നൽകുന്നതെന്നും കുറഞ്ഞ ചിലവിൽ കൂടുതൽ തൊഴിലവസരങ്ങളും വരുമാനവും സാദ്ധ്യമാക്കാൻ ഇവ ഉപകരിക്കുമെന്നും അദ്ദേഹം കൂട്ടിച്ചേർത്തു.
Discussion about this post