കൊല്ലത്ത് കേന്ദ്ര ആഭ്യന്തര മന്ത്രി അമിത് ഷായ്ക്കെതിരെ യൂത്ത് കോൺഗ്രസ് നടത്തിയ കരിങ്കൊടി പ്രതിഷേധത്തെ പിന്തുണച്ച് എഐസിസി ജനറൽ സെക്രട്ടറി കെ.സി. വേണുഗോപാൽ. അമിത് ഷാ പ്രതിഷേധത്തിന് അതീതനല്ലെന്നും കൊല്ലത്ത് നടന്നത് സ്വാഭാവിക പ്രതിഷേധമാണെന്നും വേണുഗോപാൽ പറഞ്ഞു. മുഖ്യമന്ത്രിക്കെതിരെ പോലും കരിങ്കൊടി പ്രതിഷേധം നടക്കാറുണ്ടെന്നും അമിത് ഷാ ദൈവമൊന്നുമല്ലെന്നും വേണുഗോപാൽ പറഞ്ഞു.
യൂത്ത് കോൺഗ്രസ് സംസ്ഥാന വൈസ് പ്രസിഡന്റ് ബിനു ചുള്ളിയിലിന്റെ നേതൃത്വത്തിലായിരുന്നു കൊല്ലത്ത് അമിത് ഷായുടെ വാഹനവ്യൂഹത്തിന് നേരെ കരിങ്കൊടി പ്രതിഷേധം നടന്നത്. ആശ്രാമം മൈതാനത്ത് ഹെലികോപ്റ്ററിൽ എത്തിയ അമിത് ഷാ വാഹനത്തിൽ പോകുന്നതിനിടെയാണ് പ്രവർത്തകർ പ്രതിഷേധിച്ചത്. പൊലീസ് പ്രതിഷേധക്കാരെ അറസ്റ്റ് ചെയ്ത് നീക്കി. പ്രതിഷേധത്തിന് സാധ്യതയുണ്ടെന്ന ഇന്റലിജൻസ് റിപ്പോർട്ടിന്റെ അടിസ്ഥാനത്തിൽ കനത്ത സുരക്ഷ ഏർപ്പെടുത്തിയിരുന്നെങ്കിലും പ്രവർത്തകർ സുരക്ഷാ വലയം മറികടന്നാണ് പ്രതിഷേധിച്ചത്.
സംഭവത്തെ തുടർന്ന് പ്രതിഷേധത്തിന്റെ സുരക്ഷാ വീഴ്ചയെച്ചൊല്ലി രാഷ്ട്രീയ വിമർശനങ്ങളും ഉയർന്നു. ബിജെപി, യുവമോർച്ച പ്രവർത്തകരും വിവിധയിടങ്ങളിൽ പ്രതിഷേധവുമായി രംഗത്തെത്തി.
തനിക്കെതിരായ സൈബർ ആക്രമണങ്ങളിൽ കേസെടുക്കുന്നതിനെക്കുറിച്ചും വേണുഗോപാൽ പ്രതികരിച്ചു. തനിക്കെതിരെ സൈബർ ആക്രമണം നടത്തിയവർക്കെതിരെ കേസ് എടുക്കരുതെന്നാണ് തന്റെ നിലപാടെന്നും സ്വന്തം നേതാവിനെ സൈബറിടത്തിൽ അപമാനിക്കുന്നവർ ആത്മപരിശോധന നടത്തണമെന്നും അദ്ദേഹം പറഞ്ഞു.
സൈബറിടത്തും പുറത്തുമായി നിരവധി ആക്രമണങ്ങൾ നേരിട്ടിട്ടുണ്ടെന്നും അതൊന്നും തന്നെ ബാധിക്കില്ലെന്നും വേണുഗോപാൽ വ്യക്തമാക്കി. യുഡിഎഫ് വിജയത്തിന് പിന്നാലെ കോൺഗ്രസിലെ മുഖ്യമന്ത്രി സ്ഥാനവുമായി ബന്ധപ്പെട്ട തർക്കങ്ങളുടെ പശ്ചാത്തലത്തിൽ വേണുഗോപാലിനെതിരെ സൈബർ ആക്രമണം നടന്നതായും സംഭവത്തിൽ അഞ്ച് കോൺഗ്രസ് അനുഭാവികൾക്കെതിരെ കേസെടുത്തതായും റിപ്പോർട്ടുകളുണ്ട്.
