കോയമ്പത്തൂരിൽ വാഹനപരിശോധനയ്ക്കിടെ നിർത്താതെ പോയ കാറിനെ സാഹസികമായി പിന്തുടർന്ന് ലഹരിക്കടത്ത് സംഘത്തെ പിടികൂടി പൊലീസ്. വിലങ്കുറിച്ചിയിലാണ് സംഭവം. കർണാടക രജിസ്ട്രേഷനിലുള്ള കാർ പരിശോധനയ്ക്കായി നിർത്താതെ പോയതോടെയാണ് പൊലീസ് പിന്തുടർന്നത്. കാറിൽ ലഹരി വസ്തുക്കൾ കടത്തുന്നതായി സംശയിച്ചാണ് ഉദ്യോഗസ്ഥർ പിന്നാലെ പോയത്.
പിന്തുടരുന്നതിനിടെ കാർ നിർത്താനുള്ള ശ്രമത്തിനിടെ ഹെഡ് കോൺസ്റ്റബിൾ എം. വേൽമുരുകൻ കാറിൽ മുറുകെപ്പിടിച്ച് മുകളിലേക്ക് ചാടിക്കയറി. അമിതവേഗത്തിൽ പാഞ്ഞ കാറിന്റെ മുകളിൽ ഏകദേശം 40 കിലോമീറ്ററോളം പിടിച്ചുകിടന്നാണ് ഉദ്യോഗസ്ഥൻ പ്രതികളെ കീഴടക്കിയത്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.
300 കിലോഗ്രാം ഗുട്കയും മറ്റ് പുകയില ഉൽപ്പന്നങ്ങളും കാറിൽ കടത്തുന്നതായി പൊലീസിന് ലഭിച്ച വിവരത്തിന്റെ അടിസ്ഥാനത്തിലായിരുന്നു പരിശോധന. തെക്കലൂർ ചെക്ക്പോസ്റ്റിന് സമീപം പൊലീസ് സംഘം കാർ തടയാൻ ശ്രമിച്ചു. ഇതിനിടെ വാഹനത്തിലുണ്ടായിരുന്ന രണ്ടുപേർ രക്ഷപ്പെടാൻ ശ്രമിച്ചെങ്കിലും പൊലീസ് പിടികൂടി.
പരിശോധനയിൽ കാറിൽനിന്ന് 200 കിലോഗ്രാം ഗുട്ക പിടിച്ചെടുത്തു. രാജസ്ഥാൻ സ്വദേശികളായ മൂന്ന് പേരെ കസ്റ്റഡിയിലെടുത്ത് ചോദ്യം ചെയ്യുകയാണ്. കർണാടകയിൽനിന്ന് ഗുട്കയുമായി വരുന്നതിനിടെയാണ് ഇവർ പിടിയിലായതെന്നാണ് പൊലീസ് പറയുന്നത്.
Coimbatore cop hangs on top of the car for almost 40 km to catch gutka smugglers 😳 pic.twitter.com/Zq0wvGneAf
— Vije (@vijeshetty) September 27, 2026
