കോവിഡ്-19 ബാധിതരല്ലെന്ന സാക്ഷ്യപത്രം ഇല്ലാത്തതിനെ തുടർന്ന് മലയാളികൾ ഇറ്റലിയിൽ വിമാനത്താവളത്തിൽ കുടുങ്ങി.ഇറ്റലിയിൽ നിന്ന് ഇന്ത്യയിലേക്ക് ടിക്കറ്റെടുത്ത നാൽപതോളം മലയാളികളാണ് വിമാനത്താവളത്തിൽ കുടുങ്ങിക്കിടക്കുന്നത്.
ചൊവ്വാഴ്ച പ്രാദേശിക സമയം ഉച്ചകഴിഞ്ഞ് 3:10 നുള്ള ഫ്ലൈറ്റിൽ ഇന്ത്യയിലേക്ക് പുറപ്പെടാൻ എത്തിയ മലയാളികളുടെ സംഘമാണ് കുടുങ്ങിയത്. കൊറോണ ബാധിതരല്ലെന്ന സർട്ടിഫിക്കറ്റ് കാണിച്ചാൽ മാത്രം ഫ്ലൈറ്റിൽ കയറാൻ അനുവദിച്ചാൽ മതിയെന്നാണ് കേന്ദ്രസർക്കാർ വിമാനക്കമ്പനികൾക്ക് നൽകിയിരിക്കുന്ന നിർദ്ദേശം. വെള്ളിയാഴ്ച തന്നെ ഇതു സംബന്ധിച്ച അറിയിപ്പ് പുറത്തു വിട്ടിരുന്നതായി കേന്ദ്ര ആരോഗ്യ മന്ത്രാലയം പ്രസ്താവിച്ചു.എയർ ഇന്ത്യയും ഈ മുന്നറിയിപ്പ് ട്വീറ്റ് ചെയ്തിരുന്നു.
മടങ്ങിയെത്തിയാൽ, സുരക്ഷയെ മുൻനിർത്തി ആരോഗ്യ വിദഗ്ധരുടെ നിർദേശപ്രകാരം ഐസൊലേഷൻ ക്യാമ്പിൽ പാർക്കാൻ തങ്ങൾക്ക് സമ്മതമാണെന്ന് വെളിപ്പെടുത്തിയ സംഘം, കേന്ദ്രസർക്കാരിനോട് സഹായം അഭ്യർത്ഥിച്ചുകൊണ്ട് വീഡിയോ പുറത്തു വിട്ടിട്ടുണ്ട്.
Discussion about this post